Josua 8

Isarele tiina bam di Ayi teo kom

1 Baŋa Wɛ laam ma ta Josua o we, “Yé ta‑n fona, nam yé pa se n vɔna pare. Ja á kɔgɔ kom maama na ye jar-keira to n vo n jeeri Ayi teo kom, se amo seene a kwei teo kom Pɛ, de o nɔɔna bam, ko woli de teo kom tete dedaane ba laŋa kam maama mo a pa abam. 2Ke-na Ayi teo kom de ko Pɛ nenɛɛne á na ke Jeriko de ko Pɛ wom tei to. Tento mo za wó leiri: Wonnu telo maama á na wó di Ayi teo kom wone to ye á nyem mo se á ta‑á jega. Ko maa ye ba naane dem de ba jejegero mo konto. Nam véi-na á vwɛ se ko taa bwola de teo kom.”

3Josua ma kuri jar-keira balo na yei jara keim chekke to, se ba yi nɔɔna morro fintɔ. Tete dem konto ne, ba ma vo se ba kwaare jara dedaane Ayi tiina bam. 4O déem ma pa nɔɔna bam ni dento:

“Baare-na teo kom kwaga á vwɛ konto bwola bwola se ko taa twɛ de teo kom, se á daare á cheigi ziim, ko ná ba ye tei ŋwaane. 5Ko daare jar-keira balo maama na tɔge de amo to wó vo se dé jeeri-ba dedaane jara. Ayi tiina bam maa wó nwoŋi nenɛɛne boboa kam ne to, se ba kwaare jara dedaane debam. Dé maa wó tutwoni se dé duri dé daare-ba. 6Dé lage dé pa ba pare debam mo, ye dé wora dé gane-ba mo konto se ba maama nwoŋi ba daare ba teo kom. Kokuri, ba wó boŋe ba tete ne we, ‘Dé daa pɛ se Isarele tiina bam duri debam yiga ne nenɛɛne boboa kam to.’ 7Maŋa kalo ne ba maama ná nwoŋi ba ti ye ba daa ba ŋwae de ba teo kom to, mo abam wó zaŋe á na vwɛ mɛ to se á zo á vere ba teo kom. Baŋa Wɛ mo wó kwei-ko o pa abam. 8Á maa ná nɛ we á vere teo kom maama, se á zwɛ-ko. Baŋa Wɛ we á ke konto mo, amo de nam pɛ abam ni se á ke konto.”

9Nɔɔna bam ma zaŋe tete dem konto ne, ba vo ba vwɛ jei na twɛ dedaane teo kom to. Ayi wɛ-zoore daa kam seeni mo ba vwɛ, Bɛtel de Ayi tetare laŋa ne. Se ko ná ye Josua, wonto maŋe dáane mo tete dem konto. O ma peini o nɔɔna bam tei ne.

10Tega na jege ka poore to, Josua ma la Isarele jar-keira bam o ke daane. O de Isarele nakwa bam ma to ba yiga ne ye ba laam kwei Ayi chwoŋa ba maa kɛa. 11Ba ma vo ba maŋe Ayi teo kom baŋa seeni daa kam ne ba chwi ba vwoa. Bwolo mo déem tigi ba dedaane Ayi teo kom tetare ne. 12Tete dem konto ne, Josua ma pa nɔɔna morro tenu vo ba seigi Bɛtel dedaane Ayi tetare ne, se ko maŋe de teo kom wɛ-zoore seeni. 13Ba na ke tei to mo tento: Ba nɔn-kɔgɔ kom ma zege ba maŋe dedaane teo kom baŋa seeni daa kam, ye balo na seigi ba vwɛ to zege ba maŋe de teo kom wɛ-zoore seeni. Josua tete laam ma vo bwolo kom ne tete dem konto.

14Tega kam na poore ye Ayi teo Pɛ na-ba to, o ma ke lela o la o nɔɔna bam pa se ba kwaare jara dedaane Isarele tiina bam. Ya déem ke ya maŋe de bwolo kom siseira kam ne mo. Ayi teo Pɛ maa wo lɔre we nɔɔna badwonna mo vwɛ se ba zo o teo kom wone. 15Josua dedaane Isarele kɔgɔ kom maama ma ke nenɛɛne ba lage ba duri mo se ba lu, ye ba déem kwei kagoa chwoŋa kam ba maa kɛa. 16Ayi teo Pɛ wom ma bwoŋi o teo kom nɔɔna bam maama se ba nwoŋi ba pare Isarele tiina bam. Ko dɛ chwoŋa kam konto ne mo, ye ba maama nwoŋi ba daare ba teo kom. 17Nɔɔn-nɔɔno déem daa wo daare Ayi ne naa Bɛtel teo ne. Ba maama déem nwoŋi mo se ba pare ba ja Isarele tiina bam. Ba teo kom manchwo-peena yam ma daare ya tiga woo.

18 Baŋa Wɛ ma ta de Josua o we, “Twe n chichwei dem n jeeri Ayi teo kom, se a lage a kwei teo kom mo a ke n jeŋa ne.” Josua ma ke Baŋa Wɛ na bere se o ke tei to. 19Josua na yɔɔre o tei o chichwei dem o jeeri Ayi teo kom to mo nɔɔna balo na vwɛ ba cheiga teo kom ni ne to pɔpɔ ba nwoŋi ba vwɛɛm jei sem ne. Ba ma zo ba di teo kom ye ba daare ba zwɛ-ko.

20Ayi teo nɔɔna bam na pipiri se ba nii to, ba nɛ we nyoa mo zaŋa ba teo kom ne kulululu. Ba daa maa yeiri ba na wó ke tei tei ba lu, kolo ŋwaane Isarele tiina balo ya na duri ba yɔɔre kagoa kam seeni to jwoori ba pipiri mo ba kwaare jara de-ba. 21Josua de nɔɔna balo na wo o tei ne to maane we, balo na vwɛ teo kom ni ne to wane-ko. Ba ma pipiri ba jeeri Ayi tiina bam ba di-ba jara wone. 22Isarele tiina balo de ya na vwɛ teo kom teiŋa ne ye ba laam wo ko wone to ma nwoŋi ba bobo se ba zege kwaga ne ba taa goe Ayi tiina bam. Banto déem laam wo Isarele tiina bam tetare ne mo. Ba wolowolo wo daare. Nɔɔn-nɔɔno nam wo lugi. 23Ko daare Ayi teo Pɛ wom yerane mo ba jaane ye o ta ŋwe. Ba ma ja‑o ba vo Josua tei.

24Isarele tiina bam déem ma pare Ayi teo kom nɔɔna balo maama na nwoŋi ko wone to ye ba go ba maama nyɔ pwola kam ne! Konto kwaga ne mo ba duri ba zo teo kom wone ba go balo maama na wo ko wone to. 25Ayi nɔn-bia bam maama, baara de kaana déem ye morro fuga-telei (12,000) mo. Isarele tiina bam ma ti ba ni dem maama nyɔ! Nɔɔn-nɔɔno déem daa wo daare. 26Kokuri, Josua chichwei delo o na zei to ta twe konto mo taa, se ko yi maŋa kalo Isarele tiina bam na yɔɔre ba chɔge Ayi nɔɔna bam maama to. 27Isarele tiina bam déem ya wo chɔge teo kom vara de ko jejegero tem. Baŋa Wɛ déem pɛ Josua ni se o pa-ba chwoŋa se ba kwei tento ba taa jega. Ba ma seene ba ke konto.

28Josua ma zwɛ Ayi teo kom pa se ko ji tampuuri ko ba yi zem. 29Se ko ná ye Ayi teo Pɛ wom, Josua kuuni‑o mo o yage tio yera ne pa se o leiga da konto taa, se ko yi dedaan-ni maŋa. Wɛ-zoore maŋa ne, Isarele tiina bam ma fwoli‑o ba ja ba vo ba dole ba yage teo kom manchwoŋo ni ne. Ba déem ma la kandwa ba pane o maama. Kandwa yam déem diini mo vili vili ye ya ta wora se ko ba yi zem.

Ba guli Baŋa Wɛ ni-gwonim dem gula

30Ba déem ma vo ba yi Ebal Peo kom jei sem. Josua ma tigisi kandwa dáane o lɔ bimbini o ma zuli Isarele Baŋa Wɛ wom. 31Wɛ tontoŋeno Moses déem na popone kolo maama se ba taa ke to mo o déem kea. Ko popone Wɛ nia yam tɔnɔ kom ne we, “Seene-na kandwa yalo á na wo mɛ luuru naa kolokolo á ma á gwoni to, se ko taa ye kaanem bimbini ko pa-ne.”#Nwoŋim 20:25 Ba na lɔge-de to, ba ma ke zwɛɛm pɛɛra dedaane yazura pɛɛra ba kaane ba pa Baŋa Wɛ. 32Josua ma zege Isarele kɔgɔ kom yiga ne o popone Wɛ nia yam o ke kandwa baŋa ne se ko lwoni Wɛ nia yalo Moses na popone to.#Nia Gulim 27:8 33Isarele kɔgɔ kom maama, tembia dedaane veira, ko woli de ba nakwa de ba yiga tiina de ba dedɛɛra balo na nii ba baŋa ne to maama déem pɔɔre mo kuni belei ba zega. Popɔra dedoa déem zege ye ba kwaga jeeri Gerizim Peo kom mo. Popɔra kadwoŋi kam de maa zega ye ba kwaga jeeri Ebal Peo kom. Levi dwi kaanem tiina bam laam maa wo ba tetare ne ye ba zeŋe Wɛ ni-gwonim dakaa kam. Ba ke konto maama se ko tɔge dedaane Wɛ tontoŋeno Moses déem na bere we ba taa ke tei to ye ba laam kwei Wɛ zaane ba ma swɛ Isarele tiina bam swolim.

34Konto kwaga ne Josua daa ma jwoori o ga Wɛ nia yam maama, Wɛ swolim dedaane o sɔɔlem delo maama Moses déem na popone o tiŋi Wɛ nia tɔnɔ kom wone to. 35Taane tera Moses na popone o tiŋi Wɛ nia tɔnɔ kom wone ye Josua wo gage se Isarele tiina kɔgɔ kom maama ni. O déem gage ko maama mo nyɔ pa se ba cheigi. Kaana bam de bia bam maama déem woli da mo ba cheigi ye veira bam de déem wo maŋe kwaga ne.#Nia Gulim 31:12-13

Currently Selected:

Josua 8: KBG

Highlight

Copy

Compare