Josua 4

Nɔɔna bam tigisi gula kandwa

1Isarele nɔn-kɔgɔ kom maama na bɛ Jɔdan buga kam ba ti to mo Baŋa Wɛ tage de Josua o we, 2“Ta de Isarele dwia fuga-yalei yam se dwi maama le nɔɔno dedoa. 3Banto wó vo mɛ kaanem tiina bam na zege buga kam tetare ne to, ba kwei kandwa-kamuna fuga-yalei. Ba laam maa wó ja-ya ba nwoŋi ba vo ba tigisi jei selo abam na wó chwi á vwoa zem tete ne to.”

4Josua ma seene o kuri nɔɔna fuga-balei pa ba dedoa maama nwoŋi Isarele dwi maama wone, ye o bwoŋi-ba o ke daane. 5O ma daare o ta de-ba o we, “Zo-na buga kam tetare se á gaale jei selo ba na zeŋe Baŋa Wɛ ni-gwonim dakaa kam ba zege to. Abam dedoa dedoa maa wó kwei kandwɛ-kamunu o dwi dem ŋwaane, o daŋe o bakale baŋa ne o ja o ba mɛ dé na wó peini zem to. 6Kandwa yam konto lage ya taa ye gula mo ya pae abam. Abam bia jwa ná bwei abam ba we, ‘Kandwa yanto na tigisi ywo-seeni to kuri mo bɛ?’, 7se á ta de-ba we, ‘Ya guli debam maŋa kalo Wɛ ni-gwonim dakaa kam na wora ka bɛ Jɔdan buga kam, ye buga kam na kɔ to mo. Ya ye gula mo ya pae Isarele kɔgɔ kom se ko taa vei wuu.’ ”

8Nɔɔna bam ma sɛ ba ke Baŋa Wɛ na bere Josua se ba ke tei maama to. Ba fuga-balei bam dedoa maama ma kwei kandwɛ dedwe se ko maŋe de ba dwia yam ni na mae tei to. Ba ma ja kandwa yam ba vo jei selo nɔɔna bam na lage ba peini tete dem konto ne to, ye ba tigisi-ya da. 9Josua ma pa se nɔɔna badwonna maŋe Jɔdan buga kam tetare ne ba tigisi kandwa fuga-yalei. Ba tigisi-ya mɛ seeni kaanem tiina bam na zeŋe ni-gwonim dakaa kam ba zege to mo. Kandwa yam konto ta wora de zem maama.

10Kaanem tiina bam déem maŋe buga kam tetare ne mo ba zeŋe Wɛ ni-gwonim dakaa kam taa, ye Isarele kɔgɔ kom de ke kolo maama Baŋa Wɛ na bere Josua se ba ke to. Moses de ya maŋe o pa Josua ni dem konto mo.

Nɔɔna bam ma ke lela ba bɛ kakam daa kam ne. 11Ba maama na bɛ ba ti to, kaanem tiina bam ma zeŋe Wɛ ni-gwonim dakaa kam ba bɛ bubɛ dedwoŋi dem ne, ye nɔɔna bam maama zege ba nia. 12-13Jar-keira balo déem na bɛ to yi morro finna (40,000). Ba ye nɔɔna balo na ti yiga se ba ke jara to mo. Ko nam ye Ruben dwi dem, de Gad dwi dem dedaane Manasɛ dwi chichworo kom jar-keira bam déem mo to Isarele kɔgɔ kom maama yiga ne, nenɛɛne Moses ya na bere-ba se ba ke tei to. Ba maama déem ma bɛ ba vo ba yi te-kampare jei selo na bwola de Jeriko to, ye Baŋa Wɛ wo ba tei ne.#Jeelim 32:17

14Kikia yam konto Baŋa Wɛ na ke dento dɛ dem ne to pɛ se Josua na yere-kamunu Isarele kɔgɔ kom wone. Ba ma yɔɔre ba nege‑o taa se ko yi o ŋwea tiim maŋa, nenɛɛne ba déem na nege Moses tei to.

15 Baŋa Wɛ daa ma ta dedaane Josua o we, 16“Pa kaanem tiina bam na zeŋe Wɛ ni-gwonim dakaa kam to ni se ba bɛ buga kam.” 17Josua ma seene o ke konto. 18Kaanem tiina bam na yɔɔre ba zeŋe Wɛ ni-gwonim dakaa kam ba bɛ Jɔdan buga kam to, mo ka na bam daa duri ba su ba wɛɛle buga kam ni maama.

19Boboa chana kam da fuga dɛ dem ne mo Isarele tiina bam déem bɛ Jɔdan buga kam. Ba ma yi Giligal ye ba chwi ba vwoa da. Teo kom konto wo Jeriko teo wɛ-puli seeni mo. 20Ko nam ya ye Giligal ne mo Josua pɛ se ba tigisi gula kandwa fuga-yalei yam ba na jaane ba nwoŋi Jɔdan buga kam ne to. 21Josua ma ta de nɔɔna bam o we, “Maŋa beena se á bia bwei abam we, ‘Kandwa yanto tigisi ywo-seeni bɛŋwaane mo?’ 22Abam maa wó ta á bere-ba we, ‘Dé na yi ywo-seeni to mo Baŋa Wɛ pɛ se Isarele tiina bam nɔne te-kora baŋa ne ba bɛ Jɔdan buga kam.’ 23Abam ta maa wó pa se ba lɔre we, dé Tu Baŋa Wɛ pɛ se buga kam we á yibia ne nenɛɛne o déem na ke tei Nane-soŋo kom ni ne ye dé nɔɔna bam maama bɛ to. 24O nam ke konto mo se logo baŋa teene dem maama lɔre we, Baŋa Wɛ ye Wɛ-kamunu ye o jege dam. Konto maa wó pa se abam ta‑á zuli‑o se ko taa vei wuu.”

Currently Selected:

Josua 4: KBG

Highlight

Copy

Compare