Josua 24

Isarele tiina fɔge ba ke ni-sɛɛm de Baŋa Wɛ

1Josua laam ma bwoŋi Isarele tiina bam maama se ba jeeri Sɛkɛm ne, banto de ba nakwa bam, de ba yiga tiina dedaane dedɛɛra balo na nii ba baŋa ne to. Ba maama ma ja ba tete ba yi Wɛ yiga.

2Josua ma ta de nɔɔna bam maama o we, “Isarele Tu Baŋa Wɛ wom kwora mo tento:

Boboa kam ne abam kwoa nabaara bam ya ta wo Yuferata buga kam bubɛ dedwoŋi dem ne mo. Ba dwi dem maama déem maa zuli jwona. Abaraham de Nahora kwo Tera de déem tɔge ba zuli-ya mo.#Pulim 11:27 3Amo déem ma kuri abam nabaaro Abaraham. Amo ma pa se o nwoŋi da tega kalo na kɛ ka bɛ Yuferata buga kam to, ye a tiini a pa‑o dwi na daga. Da-yiga to a déem kwei Izaak mo a pa‑o. 4Ko na yi se Izaak lo bia to, a ma kwei Jakob de Esawu a pa‑o. Amo ma pa Esawu tei Seyira zwonnu laŋa kam, ye a kuri se Jakob de o bia bam tu ba vo Ejipti teo ba zoore da.

5Dáane mo amo toŋe Moses dedaane Aron se ba tɔge á yiga. A ma pa se ko zo Ejipti tiina bam yera ye a ja abam a nwoŋi ba teo kom ne. 6Amo na jaane á nabaara bam a nwoŋi Ejipti ne to, ba ma yi Nane-soŋo kom ni. Ejipti tiina bam déem ya kwei sisein-nɔɔna de se torokooro mo ba ma pare á nabaara bam ba vo ba yi Nane-soŋo kom ni ne. 7Ba déem ma keeri ba jare-ne se a woli-ba. Amo Baŋa Wɛ ma tiŋi lim banto de Ejipti tiina bam tetare ne ye a ta pa se naneo kom di Ejipti tiina bam. Ba yibia ne mo a ke konto Ejipti tiina bam baŋa ne.

Ko kwaga ne, á nabaara bam laam ma zo kagoa ne ba daane ka wone. 8Amo ma ja abam teo nɔɔna bam a yi Amori tiina bam tega kam. Banto déem zoore Jɔdan buga kam wɛ-puli seeni mo. Nɔɔna bam konto na nwoŋi se ba ke jara de abam to, a ma pa se á di-ba. Abam ma yɔɔre á chɔge-ba, ye á jwoŋi ba tega á laam tei. 9Moaba teo pɛ Balaki na ye Zipore bu to déem ma boŋe se o ke jara de abam. O déem ma beeri Beora bu Balaam jei, se o ba o sɔɔle lwarem o yage abam yuu ne.#Jeelim 22:2–24:25 10Amo ma jwoŋi abam a yage Balaki jeŋa ne de a na ve se a cheigi Balaam taane dem to. A ma pa se o jwoori o sɔɔle swolim dedɛ o pa abam.#Jeelim 24:15

11Abam déem na bɛ Jɔdan buga kam á vo á yi Jeriko to, ba teo kom tiina nwoŋi mo se ba ke jara de abam. Amori tiina bam, de Pɛrizi tiina, de Kanaan tiina, de Hiti tiina, de Giragasi tiina, de Hivi tiina, dedaane Jebusi tiina de ta jeeri abam mo de jara ye amo pa se abam di ba maama. 12Abam déem na gwɛ tega kam ne á ma‑á vei to, amo ma vugimi á dona boboŋa ye ba duri ba daare abam. Ko dae á se-zɔɔro de á tɛ mo á kwei á ma á zeili-ba. Ko nye de amo ya na ke Amori tiina pwa balei bam tei to mo. 13Abam wo yaare tega kanto ŋwaane, amo mo kwei-ka a pa abam. Abam laam zoore teene delo á na wo lɔge to wone mo, á nam wo de kare ye á jege-se á di. Abam ta jege teeni-bia á di ye á wo jeiri-de.”#Nia Gulim 6:10-11

14Josua laam ma ta de-ba o we, “Ko nam ye se abam ta‑á zuli Baŋa Wɛ de á chega maama mo. Dole-na jwona yalo á kwoa bam déem na jege ba zuli Yuferata buga bubɛ dedwoŋi dem ne to, de yalo ba déem na jege ba zuli Ejipti ne to á yage, se á zuli Baŋa Wɛ yerane. 15Abam wo nam ná wo dɛ se á ta‑á zuli Baŋa Wɛ, se á kuri wɛ delo á na wó zuli to. Abam wó zuli wa yalo á kwoa bam déem na jege ba zuli Yuferata buga bubɛ dedwoŋi dem ne to mo, naa á laam na zoore Amori tiina tega ne to, á wó zuli ba jwona yam mo? Ko nam ta wo á tei ne. Se ko ná ye amo de a diga tiina maama, debam wó taa zuli Baŋa Wɛ mo.”

16Nɔɔna bam maama ma leiri‑o ba we, “Debam bá yage Baŋa Wɛ wom se dé daare dé zuli wa yadwonna. 17Baŋa Wɛ mo ye debam Wɛ. Debam dedaane dé kwoa ya ye kabɛ mo Ejipti wone, ye dé yi na o na toŋe wo-kenkagela se o ma o vere debam o ja o nwoŋi Ejipti ne tei to. Dwi-gɛ tiina déem seene ba gilimi debam jei maama ne. De ko de, dé ná vei mɛ maama, Baŋa Wɛ yeini o kwoli debam mo. 18Debam déem na gwɛ tega kam ne dé maa beene to, mo Baŋa Wɛ zeili Amori tiina bam dedaane teene dedɛ, se debam na pwola dé zo tega kanto wone. Baŋa Wɛ yerane mo ye debam Wɛ, ye debam de wó taa zuli wonto mo.”

19Josua daa ma ta de nɔɔna bam o we, “Baŋa Wɛ ye wose mo. Abam bá wane‑o á zuli. O yi nam page abam baŋa ne mo. Abam maa ná lɔge o kwaga ne naa á ná ke wɛleera, o bá kwei o chɛ abam. 20Abam ná yage‑o se á daare á zuli wa-yɔɔro, wonto de wó pipiri o yage abam mo. O maa na boŋe se o ke abam lanyerane to, o laam wó waare abam mo, ye o daare o chɔge abam.”

21De konto maama de, nɔɔna bam ta leiri Josua ba we, “Debam boboŋa tiini ya ja se dé taa zuli Baŋa Wɛ mo.”

22Josua laam ma ta-ba o we, “Abam tete mo pɛ maana we á kuri se á ta‑á zuli Baŋa Wɛ mo.” Ba maama ma leiri we, “Ɛɛ! Debam tete mo pɛ maana.”

23Josua ma ta o we, “Ko nam ná ye konto, chɔge-na wa-gɛ sem ta na wo á tetare ne to, se á daare á kwei á bochare maama á pa Isarele Tu Baŋa Wɛ wom.” 24Nɔɔna bam de ma ta we, “Debam wó zuli dé Baŋa Wɛ wom mo, se dé daare dé sɛ wonto yerane ni.”

25Dɛ dem konto ne mo Josua zege Sɛkɛm ne o woli Isarele tiina bam se ba ke ni-sɛɛm de Baŋa Wɛ. O ta ma pa-ba nia se ba taa tɔga. 26O déem ta popone wonnu tem konto maama o ke Wɛ nia tɔnɔ kom wone mo. O ma daare o kwei kandwɛ-kamunu o chwi tei-zɔŋɔ kom kuri ne se ko maŋe dedaane Baŋa Wɛ wara-jei sem. 27Josua ma ta nɔɔna bam o we, “Kandwɛ dento nigi Baŋa Wɛ na tage tei maama de debam to. Ko bere we de ye maana mo dé maama tei ne, se abam yé lɔ Baŋa Wɛ ni dem kwaga ne.”

Ba suli Josua te-ywoŋa kam ne

28Josua déem ma pa se nɔɔna bam maama jage se ba vo ba jeini mɛ ba na pɔɔre tega kam ba pa-ba to ne. 29Wonnu tento maama ke ko ti mo, ye Nun bu Josua na ye Baŋa Wɛ tontoŋeno to laam te. O tege ye o jege bena bi de fuga mo. 30Josua nam ya jege o tete tega Timinaf-Sera ne. Ka wo Gaasa Peo kom baŋa seeni mo, Efrayim zwonnu laŋa kam ne. Ba ma kwei‑o ba suli ka wone.

31Josua ŋwea maŋa kam maama ne, Isarele tiina bam yɔɔre ba sɛ Baŋa Wɛ ni mo chekke. Ba nakwa badaara de déem nɛ kolo maama Baŋa Wɛ na ke o pa Isarele tiina bam to. Banto ta na ŋwe to, ba kɔ-fɔrɔ kom ta zuli Baŋa Wɛ mo, ye ba wo ywori o ni dem kwaga ne. 32Isarele tiina bam déem ya zeŋe Josɛf kwi sem mo ba ja ba nwoŋi Ejipti ne ba yi dáane. Ba ma suli-se Sɛkɛm ne, tega kalo Jakob déem na yeigi Hamora bia bam tei ne to. Hamora nam ya ye Sɛkɛm kwo mo. Jakob déem ma ŋwe sabu-dala bi ba tega kam ŋwaane.#Pulim 33:19 Josɛf dwi dem laam ma jwoŋi tega kam konto ba tei.

33Aron bu Eleaza de déem ma te. Ba ma suli‑o Gibea ne, teo kolo ba na pɔɔre ba pa o bu Finehase Efrayim zwonnu laŋa kam ne to.

Currently Selected:

Josua 24: KBG

Highlight

Copy

Compare