Josua 23
23
Josua na tage taane delo o kweeli to
1Ko na wora ko wora to, Baŋa Wɛ déem laam ma pa se Isarele tiina bam dona maama daa ba daane-ba. Josua de nam ya tiini o kwe mo ka maŋa ne. 2Dɛ dedwe mo o bwoŋi Isarele tiina nakwa bam, de ba yiga tiina bam, dedaane dedɛɛra balo na nii ba baŋa ne to. O ma ta de-ba o we, “Amo tiini a kwe dedɛ. 3Abam nam nɛ á Tu Baŋa Wɛ wom na dɛ abam ŋwaane o ke tei maama de teene delo ya na wo ywo to. Wonto mo jaŋe o di-de o pa abam. 4Teene delo ta na daare se á di-de jara baŋa ne to, abam yei we amo maŋe a pɔɔre-de a pa á dwia yam maama se ba di ba daare ba taa tei. Amo ta pɔɔre teene delo maama dé na maŋe dé di ko zege Jɔdan buga kam ne se ko yi Mediterania naneo kom seeni to a pa abam. 5Abam ná vei se á jeeri-ba de jara, Baŋa Wɛ wó pa se ba duri abam yiga ne. O ni-gwonim dem ŋwaane mo o lage o zeili-ba se abam wane ba tega kam á jwoŋi.
6Konto ŋwaane, ke-na dam á tete kuri ne se á daare á ke á tɔge Wɛ nia tɔnɔ kom Moses na popone to chekke. Yé kuri-na yadwonna á yage. 7Abam ba jege se á ta‑á ye de teene delo na gilimi abam to. Yé zuli-na ba jwona. Ta lɔre-na se á yé kwei ya yera á ma á ke ni-gwonim kolokolo baŋa ne. 8Abam nam ye se á ta‑á jege chega mo de á Tu Baŋa Wɛ wom nenɛɛne á na ke tei se ko yi zem tento to.
9Kokuri, abam na jeeri teene delo na daga ye de ta tiini de dana to, Baŋa Wɛ zeili-ba mo, ye nɔɔn-nɔɔno ware se o dwoni de abam. 10Baŋa Wɛ na jaŋe o pa abam to ŋwaane mo pa se á wone dedoa tete wó zeili á dona moro, nenɛɛne o na gwoni ni de abam we o wó ke tei to. 11Nam kwaane-na á ta‑á swoi á Tu Baŋa Wɛ wom.
12Abam nam ná nwoŋi á chega kam kwaga ne, pa se á ye de teene delo na gilimi abam to, ye á sɛ se á taa di da-bukwa, 13nam lɔre-na se Baŋa Wɛ wom daa bá zeili-ba se abam zo. Teene dem konto maa wó jwoori de ji da-bunnu á yiga ne. De wó taa nye de fena kalo na fere ka zoore á yera to mo, ye de ta ji sabare se zɔa á yia. Ba wó yaare abam taa se ko yi maŋa kalo Baŋa Wɛ na wó saare abam yere te-ywoŋa kalo o na kwei o pa abam to baŋa ne.
14Ko daa bá dáane se amo te. Abam tete nam yei we Baŋa Wɛ seene o ke o ya na gwoni ni se o ke tei maama to, kolokolo wo maŋe kwaga ne. 15Nam lɔre-na se Baŋa Wɛ na pɛ se wo-laaro tem maama seene te ke nenɛɛne o na gwoni ni tei to, o nam ta wó wane o chɔge abam nenɛɛne o na tage tei to, se á yere saare te-ywoŋa kanto o na pɛ abam to baŋa ne. 16Abam ná ve se á tɔge Baŋa Wɛ ni-sɛɛm dem, ye á bobo se á ta‑á zuli wa yadwonna, lɔre-na we o bane wó zaŋe de abam mo se o chɔge abam lela. Abam wolowolo daa ma bá daare te-ywoŋa kanto o na kwei o pa abam to baŋa ne.”
Currently Selected:
Josua 23: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
