Yiga tiina 1
1
Isarele tiina bam jaŋe se ba jwoŋi Kanaan tega kam maama
1Josua toone dem kwaga ne, Isarele tiina bam ma bwei se ba lɔre Baŋa Wɛ boboŋa ye ba we, “Isarele dwia yam wone dwi dɔ mo wó lwoori yiga se ba kwaare jara de Kanaan tiina bam?”
2 Baŋa Wɛ ma leiri o we, “Judah dwi tiina bam mo wó da yiga ba vo ba jeeri-ba de jara. Amo nam wó pa se ba di-ba ye ba daare ba taa tei tega kam.”
3Judah tiina bam ma vo Simeon tiina bam tei, ba na ye chorro to ŋwaane, ye ba ta we, “Kanaan tiina mo zoore tega kalo Baŋa Wɛ na kwei o pa debam to baŋa ne. Nam ba-na á zeini debam se dé di-ba, se á de ná lage á ke jara á tega kam ŋwaane se debam de woli abam.” 4-5Simeon tiina bam ma sɛ ba woli Judah tiina bam ye ba vo ba jeeri Kanaan tiina bam dedaane Pɛrizi tiina bam de jara. Jara yam nam ke Bezeki ne mo. Kanaan de Pɛrizi tiina kɔgɔ kom nam ya ye morro fuga mo, ye Baŋa Wɛ woli-ba pa se ba di Kanaan tiina bam dedaane Pɛrizi tiina bam maama. Judah tiina bam ma na Pɛ Adoni-Bezeki na wo mɛ seeni to. Ba ma yi‑o de jara, 6ye Adoni-Bezeki kwaane se o duri o lu ba jeŋa ne, ye o wo wane. Ba na jaane‑o to, mo ba gwoni o nu-kweero tem dedaane o namimbi-kweero tem ba yage. 7Ba na jege keim dem konto ba ke to, mo Adoni-Bezeki tage o we, “Amo de ya jaane pwa fuserepɛ mo a gwoni ba nu-kweero dedaane ba namimbi-kweero tem, pa se ba twɛ wodi-mumuga kalo amo na di ye ka siiri tega ne to ba di. Wɛ zem laam wora o ŋwe o jene mo a baŋa ne.” Ba ma ja‑o ba vo Jerusalem ye o te.
8Judah tiina bam ma jeeri Jerusalem teo kom de jara. Ba ma di-ko, ye ba go ko nɔn-bia bam ba daare ba zwɛ-ko.
9Kanaan tiina badwonna nam ya zoore zwonnu laŋa kam ne mo, de tega-kuri kagoa kam seeni, dedaane wɛ-zoore seeni bwollu tem ne. Judah tiina bam déem ta ma zege Jerusalem ne ba vo ba kwaare jara de ba maama. 10Ba ma pa se jara yam yi Kanaan tiina balo na wo Heboron teo wone to. Boboa kam ne, jei sem konto yere déem ye Kiriaf-Araba mo. Dáane mo ba di Sesayi, de Ahiman dedaane Talimayi de ba dwi dem maama.
11Judah tiina bam daa ma zege dáane ba vo se ba jeeri Debiri tiina de jara. Boboa ne to, teo kom konto yere déem mo ye Kiriaf-Sefera. 12Judah dwi tu dedoa yere mo Kaleb. O déem ma ta o we, “Amo wó kwei a bukɔ Akisa a pa nɔɔno wolo maama na wó wane o vo o ke jara dedaane Kiriaf-Sefera tiina bam ye o wane-ba to.” 13Kenazi bu Ofineli déem ma vo o ke jara yam, ye o wane teo kom nɔɔna bam. Kenazi de ye Kaleb nyaane mo. O ma kwei o bukɔ Akisa o pa Ofineli, se o di o ma o ji o kaane.
14Kadiri dem maŋa kam ne mo, Akisa tage de o baro wom se ba beeri tega ba jwoŋi o kwo wom tei ne. O déem ma di bonaga o vo o tu o kwo yiga ne, ye o kwo bwei‑o o we, “Bɛ mo nmo lage se a ke a pa‑m?” 15Akisa ma leiri‑o o we, “A lwoori se n ke-ne zaane mo. Nmo na pɛ-ne tega kalo to ye kagoa yerane mo. Konto to, a lage se n beeri buli-yia jei mo n pa-ne.” Kaleb ma beeri buli-yia jei o pa‑o, baŋa seeni de tega-kuri seeni maama.
16Moses tembaaro dwi dem mo ye Keni tiina bam. Ba ma zege Jeriko#1:16 Jeriko: Hiburu = Konkware teo kom ne ba woli dedaane Judah tiina bam ye ba vo Judah kagoa kam kuri seeni. Ba maa zoore Arada ne dedaane jei sem konto nɔɔna bam.
17Judah dwi dem ma nwoŋi ba woli Simeon dwi dem ye ba vo ba kwaare jara de Kanaan tiina balo na zoore Zefafa ne to. Ba ma di teo kom konto ye ba yɔɔre ba chɔge-ko pa se ko ji Wɛ nyem. Konto ŋwaane mo ba laam bwoŋi teo kom konto yere we ‘Horama’.#1:17 Horama kuri mo yechɔgem. 18Judah tiina bam ta ma di Gaza, de Asekelon, de Ekoron, teene dem konto maama dedaane de nawuura yam.
19 Baŋa Wɛ déem mo woli Judah tiina bam ye ba di teene delo maama na wo zwonnu laŋa kam ne to. Se ko ná ye Kanaan tiina balo na zoore bwollu tem seeni to, ba déem wo wane banto ba di, nɔn-dwoa bam konto na mae luuru mo ba ke jara-keim torokooro to ŋwaane. 20Moses na pɛ ni se ba ke tei to mo ba de kea. Ba kwei Heboron mo ba pa Kaleb. Wonto de déem ya zeili Anaki bia batɔ bam mo o daare jei sem konto o jwoŋi o tei. 21Benjamin dwi tiina bam déem wo wane se ba zeili Jebusi tiina bam. Nɔn-dwoa bam konto zoore Jerusalem ne mo, ye de zem maama, Jebusi tiina bam gwaane de Benjamin tiina bam mo ba zoore teo kom konto ne.
22-23Josɛf dwi tiina#1:22-23 Josɛf dwi tiina: Efrayim de Manasɛ dwia yam bam de ma vo ba jeeri Bɛtel de jara. Boboa ne to teo kom yere ye Luzi mo. Baŋa Wɛ déem ma woli-ba. Ba ma toŋe nɔɔna se ba vo ba ŋɔ ba nii teo kom na ye tei to. 24Balo na vei se ba ŋɔ ba nii to ma na nɔɔno na zege teo kom wone o maa nwoŋa. Ba déem ma ta‑o ba we, “Nmo ná bere debam chwoŋa se dé wane dé zo abam teo kom wone, dé bá ke‑m kolokolo dé chɔge.” 25Nɔɔno wom ma seene o bere-ba chwoŋa kam, ye ba de vo ba zo teo kom wone ba go ko nɔn-bia maama ye ba yage nɔɔno wom de o diga tiina se ba taa ŋwe. 26Nɔɔno wom laam ma vo o zoore Hiti tiina bam laŋa ne. O déem lɔge teo mo ye o bwoŋi-ko yere we Luzi. Teo kom ta jege yere dem konto de zem maama.
27Manasɛ dwi dem déem wo wane se ba zeili Bɛte-San tiina bam, naa Taanaka tiina bam, naa Dora tiina bam, naa Ibeleyam tiina bam, na Megido tiina bam dedaane balo maama na zoore teene dem nawuura yam ne to. Kokuri to, Kanaan tiina bam yɔɔre ba ja we ba wó taa wo teene dem konto ne mo. 28Isarele tiina bam maa na tu ba dana maŋa kalo to, ba fe Kanaan tiina bam se ba taa toŋe totoŋ-chɛɛra mo ba pa-ba. Ba nam ya wo zeili ba maama ba ti.
29Kanaan tiina badwonna de déem zoore Gezere ne, ye Efrayim dwi dem wo zeili-ba. Kanaan tiina bam déem ma lɛɛre ba zoore de-ba. 30Zebulun tiina bam de maa wo zeili Kanaan tiina balo na zoore Kitiron ne dedaane Nahalali ne to. Ba yage-ba mo pa ba tɔge ba zoore de-ba ye ba laam fe-ba se ba taa toŋe totoŋ-chɛɛra ba pa-ba. 31Asere dwi dem maa wo zeili Kanaan nɔn-dwoa balo na zoore Akoo, de Sidon, de Ahalabi, de Akiziba, de Heliba, de Afeka, de Rehobi teene dem wone to mo, 32pa se ba tɔge ba zoore de-ba. 33Nafitali dwi tiina de maa wo zeili balo na zoore Bɛte-Semesa de Bɛte-Anafa ne to. Ko ma pa se Nafitali tiina bam dedaane tega kam konto nɔɔna bam lɛɛre ba zoore daane. Nafitali tiina bam déem za fe teene dem konto tiina bam mo se ba taa toŋe totoŋ-chɛɛra ba pa-ba. 34Amori tiina bam dam déem dwoi Dan dwi dem dam. Ba ma che-ba ba yage zwonnu laŋa kam ne pa se ba daa wo wane se ba tu ba ba bwollu tem seeni. 35Amori tiina bam déem ma yɔɔre ba maŋe Ayijalon ne, de Saalibim ne, dedaane Heresi Peo kom seeni ba zoora. Ko daare maŋa kalo Josɛf dwi dem na tu ba na dam to, mo ba fe Amori tiina se ba taa toŋe totoŋ-chɛɛra ba pa-ba. 36Amori tiina bam tega kam siseini déem zege zwonnu chwoŋa kalo ba na bwoi we ‘Nɔŋɔ chwoŋa’ to mo, ka vo ka tɔge Sela seeni ka kɛ yiga.
Currently Selected:
Yiga tiina 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
