Josua 22
22
Isarele dwia yadwonna jwoori wɛ-puli seeni
1Josua laam ma toŋe ni se Ruben dwi tiina bam de Gad dwi tiina bam dedaane Manasɛ dwi chichworo kom na wo wɛ-puli seeni to ba se o na-ba. 2O ma ta-ba o we, “Abam ke chega de á na ke kolo maama Baŋa Wɛ tontoŋeno Moses déem na pɛ ni se á ke to. Kolo maama amo de maa na bere se á ke to, á seene á ke-ko. 3Abam peene mo ye á sɛ á Tu Baŋa Wɛ nia yam, á daare á woli á chorro tem taa se ko yi leile. Á maa wo nwoŋi ba kwaga ne. 4Ko nam yi se á jwoori á sam dem na wo Jɔdan buga kam wɛ-puli seeni, ye Baŋa Wɛ tontoŋeno Moses kwei o pa abam to. Kolo ŋwaane, Baŋa Wɛ na gwoni ni se o pa á chorro tem sii de jara keim to, o seene o ke konto mo. 5Nam kwaane-na se á ta‑á ke kolo maama Moses na bere se á ke to. O maŋe o bere abam se á ta‑á swoi á Tu Baŋa Wɛ wom, ye á daare á ta‑á jege chega á pa‑o. Abam ta jege se á zuli‑o mo ye á sɛ o ni dedaane á bochara de á dam maama.”
6-8Josua laam ma sɔɔle Wɛ swolim o ke ba yuu ne ye o daare o bane-ba o yage chwoŋa ne se ba viiri. O na bane-ba o yage chwoŋa ne konto to, o ma ta o we, “Abam ma‑á jwoori á sam de jejegero dedɛ mo á na vere á dona tei ne. Abam vara daga lanyerane, ye á ta jege lu-nyenno, de sabu-seŋa, de channa, de luuru, de gwaaro dedɛ. Véi-na á chɛ te maama de á chorro. Wɛ wó pa se á yi lanyerane.”
Ko ná ye Manasɛ dwi dem, Moses déem pɔɔre ba chichworo mo o pa-ba tega Basan laŋa kam ne. Josua de ma kwei tega o pa ba chichworo kodwoŋi kom Jɔdan buga kam wɛ-zoore seeni, se ba jeini de Isarele dwia yadwonna yam.
9Ruben dwi tiina bam de Gad dwi tiina bam dedaane Manasɛ dwi chichworo kom maama ma kwei chwoŋa ba maa jwoori ba sam ne. Ba yage Isarele tiina badwonna bam mo Kanaan teo Siloo ne. Ba ma jwoori ba tete tega kam na wo Gilead ne ye Moses kwei o pa-ba se ko tɔge de Baŋa Wɛ ni dem to.
Baŋa Wɛ gula bimbini dem
10Ruben tiina bam, de Gad tiina bam, de Manasɛ dwi chichworo kom ma vo ba yi Gelilofa. Jei sem konto de wo Kanaan laŋa kam ne mo, ye ko wo Jɔdan buga kam ni ne. Ba ta na wo bɛ buga kam to, ba ma zege dáane ba lɔ bimbin-kamunu ba yage da. 11Ko na wora ko wora to mo Isarele dwia yadwonna nigi we Ruben tiina bam, de Gad tiina bam de Manasɛ dwi chichworo kodwoŋi kom mo lɔge kaanem bimbini ba zege Gelilofa ne, ko na maŋe de banto bubɛ dem na wo Jɔdan buga kam ne to. 12Isarele kɔgɔ kom maama ma jeeri Siloo ne, se ba vo ba kwaare jara de ba chorro tem na wo Jɔdan buga kam wɛ-puli seeni to.
13Ba ma toŋe Wɛ kaanem tu Eleaza bu Finehase se o vo o ŋɔɔne de-ba se ko laam daare se ba jeeri-ba de jara. 14Ba ta ma le yiga tiina fuga se ba nwoŋi ba dwia fuga kam maama wone ba tɔge de Finehase ba vo ba tei. Banto maama jege sam mo ba nii de baŋa ne. 15Finehase de nɔɔna fuga bam ma vo Gilead ba jeeri de Ruben tiina bam, de Gad tiina de Manasɛ dwi chichworo kodwoŋi kom, ye ba ta de-ba ba we, 16“Baŋa Wɛ kɔ-fɔrɔ kom mo toŋe debam á tei ne se dé bwei abam dé nii kolo ŋwaane á daa na ba jege chega dedaane Baŋa Wɛ to. Bɛ mo kea ye abam lɔ Baŋa Wɛ kwaga ne, ye á daare á lɔ bimbini se á ta‑á ke kaanem de baŋa ne? Abam daa ba zuli Baŋa Wɛ wom. 17Abam swei wɛleere delo dé déem na ke Peora ne ye Baŋa Wɛ waare debam to mo na? O pɛ se jawe-chɛɔ to dé wone ye ko go dé kɔgɔ kom dedɛ. Wɛleere dem konto nam ta wo nwoŋi dé tetare ne. #Jeelim 25:1-9 18Abam daa boŋe se á nwoŋi Baŋa Wɛ kwaga ne mo na? Abam zem ná ve‑o, o bane jwa wó zaŋe mo dedaane Isarele tiina kɔ-fɔrɔ kom maama. 19Abam tega kam nam ná chɔge mo pa se á ware Baŋa Wɛ se á zuli‑o ka wone, se á bɛ Jɔdan buga kam á ba á ta‑á zoore debam tei ne Baŋa Wɛ vwei dem na wo mɛ to. Yé ywori-na Baŋa Wɛ kwaga ne, dedaane debam maama kwaga ne, se á ke bimbini á woli debam Tu Baŋa Wɛ kaanem bimbini dem wone. 20Nam ta guli-na maŋa kam Zera bu Akane na chɔge Wɛ yiga ye o kwei wonnu telo Baŋa Wɛ na we te ye o nyem to. Ko déem dae Isarele tiina kɔ-fɔrɔ kom maama mo nɛ waarem ko ŋwaane na? Nɔɔna dedɛ mo dɛ ba te Akane wɛleere dem ŋwaane se ko déem dae o yerane mo tega.”#7:1-26
21Ruben tiina bam, de Gad tiina bam, de Manasɛ dwi chichworo kom ma leiri-ba ba we:
22“Yuu-tu Baŋa Wɛ wom mo dwoi maama! Wonto mo wó ta o pa debam! O yei kolo ŋwaane dé na ke bimbini dem to. Ta‑á yei-na we dé bere dé wo baare Baŋa Wɛ kwaga ne. Ko nam ná dae konto, se dé yé lu zem dɛ dento. 23Dé taane dem ná ye vwa se Baŋa Wɛ waare debam. Dé wo ke bimbini dem se dé ma nwoŋi Baŋa Wɛ kwaga ne. Dé nam wo boŋe se dé kwei-de dé ma dé ke vara zwɛɛm kaanem, naa wodiu-kaanem, naa yazura kaanem se dé jwoŋi swolim Baŋa Wɛ tei ne. 24Debam dɛ foone ŋwaane mo dé ke konto. Dé tete mo boŋe dé ja we, abam bia jwa wó bwei debam bia ba we, ‘Abam dedaane Isarele Baŋa Wɛ wom jege bɛ mo se á ke daane? 25Baŋa Wɛ kwei Jɔdan buga kam o ma o ji siseini mo se ka pɔɔre debam Isarele tiina bam dedaane abam Ruben tiina de Gad tiina bam daane. Abam dae Baŋa Wɛ nyem!’ Tɔ. Ko ná ke konto, abam bia wó che debam bia se ba yé tɔge ba zuli Baŋa Wɛ. 26Konto nam mo pɛ se dé ke bimbini dem. Ko dae se dé ma dé ke vara zwɛɛm kaanem de kaanem dwi maama. 27Dé ke-de se de taa ye maana mo debam de abam tetare ne. De ta wó ji maana de pa debam bia dedaane abam bia. Ko ná ye vara zwɛɛm kaanem naa kaanem dwi maama, dé wó taa jaane dé pɛɛra dé tui Baŋa Wɛ vwei dem ne se dé ma zuli‑o. Ko ta wó pa se á bia jwa yé ta we, debam bia ba jege kolokolo se ba ke dedaane Baŋa Wɛ wom. 28Dé ta boŋe we ko ná ye konto, debam bia wó ta de abam bia we, ‘Nii-na! Debam kwoa ke bimbini mo na lwoni Baŋa Wɛ kaanem bimbini dem. Ba nam wo ke-de se ba taa ke kaanem da ba zuli Baŋa Wɛ, se de ye maana mo de pa debam dedaane abam.’ 29Wɛ wó che se dé yé baare o kwaga ne dé daare dé ke bimbini dé kwei-de dé ke vara zwɛɛm kaanem, naa wodiu-kaanem, naa yazura kaanem dé pa‑o. Debam bá sɛ se dé ke bimbini dé ma zuli Baŋa Wɛ, ko ná dae kaanem bimbini delo na wo Baŋa Wɛ wara-jei sem ne to.”
30Wɛ kaanem tu Finehase de Isarele kɔgɔ kom yiga tiina fuga bam ma cheigi Ruben tiina, de Gad tiina, de Manasɛ dwi chichworo kom ni dem maama. Ba wo ma to de taane dem. 31Eleaza bu Finehase ma ta de-ba o we, “Debam laam lɔre we Baŋa Wɛ seene o wo dé tei ne. Kokuri to, abam wo chɔge Baŋa Wɛ yiga. Ko ta bere we abam wo pɛ chwoŋa se Baŋa Wɛ waare debam Isarele tiina bam.”
32Finehase de Isarele kɔ-fɔrɔ yiga tiina bam ma zaŋe Gilead ne ba jwoori ba vo Kanaan. Ba ma lwoni ba bere Isarele tiina bam maama ba dedaane Ruben de Gad tiina bam jeiŋa kam na tu tei to. 33Isarele tiina bam wo ma to ye ba bobo se ba taa tei Wɛ. Ba ya boŋe se ba ke jara de Ruben de Gad tiina bam mo se ba ti ba dwi dem. Ba laam ma dole boboŋe dem konto ba yage. 34Ruben de Gad tiina bam ma ta ba we, “Bimbini dento ye maana mo de pae debam maama we, Baŋa Wɛ mo seene o ye debam Tu Wɛ.” Ba maa jege-de ba bwoi we ‘Maana Bimbini’.
Currently Selected:
Josua 22: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
