Josua 21

Levi dwi tiina teene dem

1Konto kwaga ne mo balo na wo Levi dwi tiina yiga ne to vei kaanem tu Eleaza, de Nun bu Josua dedaane Isarele dwia yam maama yiga tiina bam tei. 2Maŋa kam kam konto ne de ba ta zoore Kanaan teo Siloo wone mo. Levi yiga tiina bam ma yi ba tei ba ta ba we, “Baŋa Wɛ nam ya maŋe o pa Moses ni mo we, debam jege se dé jwoŋi teene mo dé taa zoore da se dé daare dé taa kɔna.” 3Isarele tiina bam tete déem ma da Baŋa Wɛ ni dem ŋwaane ba le ba dwia yam dedoa dedoa teene dedwonna ba pa-ba se ba taa zoora. Ba ta ma pa-ba vara pwoli se ba taa maa kɔne vara.#Jeelim 35:1-3; 1 Tigisim 6:54

Kohafe sɔ-yuu tiina teene dem

4Ba ma ta jɔrɔ se ba lɔre Baŋa Wɛ na lage se teene dem pɔɔre de pa Levi dwi tiina bam tei to. Kohafe tiina bam nam mo dɛ yiga ba na ba teene dem popɔra, diga maama de ka nyem. Banto balo na ye Wɛ kaanem tu Aron diga kam to ma jwoŋi teene fuga-detɔ, ye de maama wo Judah de Simeon dedaane Benjamin dwia yam laŋa wone. 5Ko maa na daare Kohafe tiina balo to, ba de déem nɛ teene fuga mo na wo Efrayim dwi dem, de Dan dwi dem, dedaane Manasɛ dwi chichworo kom laŋa wone. 6Ko nam ná ye Gereson tiina bam, banto déem nɛ teene fuga-detɔ mo na wo Isakara dwi dem, de Asere dwi dem, de Nafitali dwi dem, de Manasɛ dwi chichworo kokom kom laŋa wone. 7Merari tiina bam de ma na teene fuga-delei na wo Ruben dwi dem, de Gad dwi dem, dedaane Zebulun dwi dem laŋa wone, diga maama de ka nyem.

8 Baŋa Wɛ déem na pɛ Moses ni se ba pɔɔre teene dem ba pa Levi tiina bam tei to mo Isarele tiina bam de kea, ko woli dedaane vara pwoli se ba taa kɔne ba vara.

9Ko ná ye Judah dwi dem dedaane Simeon dwi dem laŋa kam, teene dento mo ba déem le se ba pa 10balo na ye Kohafe sɔ-yuu tiina ye ba ye Aron bia to. Ba pɛ-ba teene dem konto kolo ŋwaane jɔrɔ kom kuri banto mo yiga.

11Judah zwonnu laŋa kam ne mo ba le Kiriaf-Araba ba pa-ba, ko woli dedaane ko vara pwoli sem. Ba laam bwoi-ko we Heboron mo. Araba déem ye Anaki kwo mo. 12Se ko ná ye teo kom kare sem dedaane ko nawuura yam, ba ya maŋe ba kwei tento ba pa Jefunɛ bu Kaleb mo se o taa tei. 13Heboron ya ye teo kolo ba na tiŋi ka-duri-ka-zo-ka-seigi ŋwaane to mo. Wɛ kaanem tu Aron bia bam ma jwoŋi-ko. Ba ta ma woli teene dento:

Libina, 14de Jatira, de Esetemoa, 15de Holon, de Debiri, 16de Ayin, de Juta, de Bɛte-Semesa. Teene dento dedaane de vara pwoli sem ye teene nogo mo ya na ye Simeon dedaane Judah laŋa kam nyem. 17Ko daare Benjamin laŋa kam ne mo ba pɛ-ba teene dena mo: Gibeon, de Geba, 18de Anatofe, de Alemon mo ko woli dedaane de vara pwoli sem.

19Konto to, teene fuga-detɔ dedaane de vara pwoli sem mo ba déem kwei ba pa Aron diga tiina bam na ye kaanem tiina to. 20Ko maa ná ye Levi dwi dem na ye Kohafe sɔ-yuu kom ye ba dae Aron bia to, ba le teene dena mo Efrayim dwi dem laŋa kam ne ba pa-ba.

21Sɛkɛm déem ye laŋa kam konto teo mo. Ko maa ye teo kolo ba na tiŋi ka-duri-ka-zo-ka-seigi ŋwaane to mo. Ko maa wo Efrayim zwonnu laŋa kam ne. Ba déem kwei-ko ba pa-ba, ba woli de Gezere, 22de Kibizayim, de Bɛte-Horon. Teene dena dem konto dedaane de vara pwoli mo ba pɛ-ba.

23Dan laŋa kam ne mo ba le teene dento ba pa-ba:

Eleteke, de Gibefon, 24de Ayijalon, de Gafa-Rimon. Teene dena dedaane de vara pwoli sem mo konto. 25Manasɛ dwi chichworo kom na wo wɛ-zoore seeni to laŋa ne mo ba ma kwei teene dento ba pa-ba: Taanaka, de Gafa-Rimon. Teene delei dedaane de vara pwoli sem mo konto.

26Ko maa bere we Kohafe sɔ-yuu tiina balo na dae Aron bia to déem jwoŋi teene fuga mo dedaane de vara pwoli sem.

Gereson sɔ-yuu tiina teene dem

27Ko daare ko ná ye Levi dwi tiina balo na ye Gereson sɔ-yuu tiina to, ba déem le teene dento mo ba pa-ba:

Manasɛ dwi chichworo kodwoŋi kom laŋa ne mo ba le: Basan teo Golan dedaane Be-Esetara. Golan ya ye teo kolo ba na tiŋi ka-duri-ka-zo-ka-seigi ŋwaane to mo. Ba nam kwei teene delei dem konto mo dedaane de vara pwoli sem ba pa-ba.

28Ba ma jwoŋi teene dento Isakara dwi dem laŋa ne: Kision, de Daberafa, 29de Jaremuf, de En-Ganim. Teene dena de de vara pwoli mo ba le ba pa-ba.

30Ba déem ta jwoŋi teene dento Asere dwi dem laŋa ne: Misale, de Abedon, 31de Helikafe, de Rehobi. Teene dena de de vara pwoli sem mo ba pɛ-ba.

32Ko na daare Nafitali dwi dem laŋa kam to, ba jwoŋi teene dento mo: Kedesa na wo Galili ne to, de Hamofa-Dora, de Karatan. Kedesa ya ye teo kolo ba na tiŋi ka-duri-ka-zo-ka-seigi ŋwaane to mo. Ba nam kwei teene detɔ dem konto de de vara pwoli sem ba pa-ba.

33Ko maa bere we Gereson sɔ-yuu tiina bam déem jwoŋi teene fuga-detɔ mo dedaane de vara pwoli sem.

Merari sɔ-yuu tiina teene dem

34Merari tiina bam laam mo daare ye ba ta ye Levi dwi dem wone. Ba ma jwoŋi teene dento mo ba pa-ba:

Zebulun dwi dem laŋa kam ne mo ba le teene dento: Jokeneam, de Karata, 35de Dimina, de Nahalali. Teene dena dedaane de vara pwoli sem mo konto.

36Ko na ye Ruben dwi dem laŋa kam to, ba jwoŋi teene dento mo ba pa-ba: Bezere, de Jahaza, 37de Kedemofa, de Mefaafa. De ta maa ye teene dena de de vara pwoli sem.

38Gad dwi dem laŋa ne mo ba ta ma jwoŋi teene dento: Ramofa na wo Gilead ne to, de Mahanayim, 39de Hesebon, de Jazera. Ramofa ya ye teo kolo ba na tiŋi ka-duri-ka-zo-ka-seigi ŋwaane to mo. Ba nam kwei teene dena dem konto de de vara pwoli sem ba pa-ba.

40Ko maa bere we Merari sɔ-yuu tiina bam déem jwoŋi teene fuga-delei mo dedaane de vara pwoli sem.

41Konto to, Isarele dwi tiina tega kam maama wone mo Levi tiina bam déem jwoŋi teene finna-nana dedaane de vara pwoli sem. 42Teo maama maa jege vara pwoli selo na kaare-ko to.

43 Baŋa Wɛ déem ma pa Isarele tiina bam tega kalo maama o ya na gwoni ni de ba nabaara se o pa-ba to. Ba de ma jaŋe ba di-ka ye ba jeini ka wone. 44Baŋa Wɛ déem ma pa ba sii de jara keim, ne o na gwoni ni de ba nabaara bam se o ke tei to. Isarele tiina dona bam wolowolo wo wane-ba ba chɔge, Baŋa Wɛ na pɛ-ba dam se ba di-ba to ŋwaane. 45Baŋa Wɛ déem na gwoni ni se o ke wo-laaro telo maama o pa Isarele tiina bam to mo o seene o ke o pa-ba. Dedoa tete wo maŋe kwaga ne.

Currently Selected:

Josua 21: KBG

Highlight

Copy

Compare