Josua 20

Ka-duri-ka-zo-ka-seigi teene dem

Jeelim 35:6-34

1Maŋa kadwoŋi ne mo Baŋa Wɛ tage de Josua o we, 2“Laam ta de Isarele tiina bam se ba le teene dedwonna, ka-duri-ka-zo-ka-seigi ŋwaane, nenɛɛne a na maŋe a ta de Moses se o bere‑m tei to. 3Wolo ná wo paale o go nɔɔno, o wó wane o duri o vo o seigi teo kom konto wone se o lu balo na beeri o gom to jeŋa ne. 4O maa ná duri o vo o yi teene dem konto dedoa, o wó vo ko manchwoŋo ni ne o lwoni o taane dem de teo kom nakwa bam mo. Banto maa wó beeri jei ba pa‑o se o zo ba teo kom o taa zoore de-ba. 5Wolo na beeri o gom to nam ná pare‑o o yi da, ko dae se teo kom tiina le‑o ba pa konto tu, kolo ŋwaane o wo paale o go nɔɔno wom. O nam ya ba chuli‑o. 6Teo kom nakwa bam wó di o taane se ba lɔre ko ke ko maŋe mo naa o paale o go o dwoŋi wom mo. O ná wo paale o ke, ba maa wó yage se o taa zoore de-ba se ko yi kaanem yiga tu wom ná tega. Konto mo o laam wó wane o jwoori o tete teo kom.”

7Ko ma pa se ba le Galili teo Kedesa na wo Nafitali zwonnu laŋa kam ne to ba zege ko ŋwaane. Ba ta le Sɛkɛm na wo Efrayim zwonnu laŋa kam ne to mo, de Kiriaf-Araba na wo Judah zwonnu laŋa kam ne to. Teo kom konto laam mo ye Heboron. 8Ko daare teene delo na wo Jɔdan buga kam wɛ-puli seeni to mo ba kuri Bezere na wo Ruben dwi dem laŋa kam ne to. Jei sem konto ye te-kampare mo ka yi kagoa kam na wo Jeriko wɛ-puli seeni to. Ba ta ma le Gad dwi dem teo Ramofa na wo Gilead ne to, dedaane Manasɛ dwi dem teo Golan na wo Basan ne to.

9Isarele tiina bam ma kuri teene dem konto ba tiŋi ka-duri-ka-zo-ka-seigi ŋwaane. Ko maa ye se nɔɔno ná wo paale o go nɔɔno, o ná ye Isarele tu naa veiru, se konto tu duri o zo de wone o seigi se wolo o na go to yera nɔɔna yé yi‑o ba go. Ko ta ye se teo kom nakwa bam wane o taane dem mo ba di de chega.

Currently Selected:

Josua 20: KBG

Highlight

Copy

Compare