Josua 19

Simeon dwi dem tega kam

1Simeon dwi dem déem mo saŋe se ba jwoŋi ba popɔra kam. Ba tega kam déem tole ka vo ka gaale Judah tega siseini dem mo. 2Teene dento nam ya wo Simeon tega kam ne mo:

Beeriseba (Seba mo konto), de Molada, 3de Hazara-Suwala, de Bala, de Ezem, 4de Eletolada, de Betula, de Horama, 5de Zikalag, de Bɛte-Marakabota, de Hazara-Susa, 6de Bɛte-Lebayofa, de Saruhen.

Dento ye teene fuga-detɔ mo, dedaane de nawuura yam.

7Ko ta woli de Ayin, de Rimon, de Efera, de Asan. Ba teene dem konto ye dena mo de de nawuura yam maama. 8Te-balwa na gilimi teene dem konto to déem tole kuri seeni mo de yi Baalafe-Beya mo. Rama mo konto.

Tega kam konto mo ba déem pɛ Simeon dwi dem, sɔ-yuu maama de ko nyem.

9Judah popɔra kam déem daga ka dwoi ba nɔn-bia bam. Konto ŋwaane mo Simeon dwi tiina déem jwoŋi Judah tega kam kadwoŋi ba jega.

Zebulun dwi dem tega kam

10Tega kam popɔra batɔ tu mo ba déem pɛ Zebulun dwi dem, sɔ-yuu maama de ko nyem:

Ba tega kam déem tole ka vo ka yi Saridi mo. 11Ka siseini dem tɔge wɛ-zoore seeni ka yi Marala. Ka déem ta ma vo ka dwei Dabesɛfa, se ko laam yi bu-nɔgɔ kolo na wo Jokeneam wɛ-puli seeni to. 12Ko nam ná ye ba tega kam daa kakam kam, ka zege Saridi ne mo ka yɔɔre wɛ-puli seeni ka yi Kisilofa-Tabora siseini, ka daare ka ta yi Daberafa dedaane Jafia. 13Ka ta tole wɛ-puli seeni mo ka yi Gafa-Hefera dedaane Efakazina, ye ka laam pipiri ka da Nea seeni ka vo ka yi Rimon. 14Ka siseini dem baŋa seeni pipiri mo de jeeri Hanafona, se de vo de kweeli Ifitah-Eli bwolo kom ne.

15Zebulun teene déem ye fuga-delei mo dedaane de nawuura yam maama. Ba teene dem dedwonna mo tento:

Katafa, de Nahalali, de Simiron, de Idala, de Bɛtelehem.

16Teene dem konto de de nawuura yam mo ba déem pɛ Zebulun dwi dem, sɔ-yuu maama de ko nyem.

Isakara dwi dem tega kam

17Ko ná ye tega kam popɔra bana tu wom, ba déem kwei-ka ba pa Isakara dwi dem mo, sɔ-yuu maama de ko nyem. 18Banto laŋa kam ba déem na jwoŋi to mo tento:

Jezerele, de Kesulofa, de Sunem, 19de Hafarayim, de Sion, de Anaharafa, 20de Rabifa, de Kision, de Ebeza, 21de Remefa, de En-Ganim, de En-Hada, de Bɛte-Pazeza. 22Ba siseini dem ta vei de dwei Tabora peo kom, de Sahazuma, dedaane Bɛte-Semesa. Ka laam ma vo ka kweeli Jɔdan buga kam ne.

Isakara dwi dem teene dem nam ye fuga-deredo mo, de de nawuura yam. 23Teene dem konto de de nawuura yam mo ba déem pɛ Isakara dwi dem, sɔ-yuu maama de ko nyem.

Asere dwi dem tega kam

24Asere dwi dem déem ma jwoŋi tega kam popɔra banu tu, sɔ-yuu maama de ko nyem. 25Ba teene dem nam ya ye:

Helikafa, de Hali, de Beten, de Akasaf, 26de Alam-Mɛlɛka, de Amada, de Misala.

Tega kam wɛ-zoore seeni siseini dem déem yi Kamele peo kom dedaane Sihora-Libinafa. 27Ka ta ma gugwoli ka vo wɛ-puli seeni ka yi Bɛte-Dagon se ka laam vo ka dwei Zebulun dwi dem laŋa kam ka daare ka yi Ifitah-Eli bwolo kom. Ba tega kam ta vei baŋa seeni ka yi Bɛte-Emeke, de Neyeli. Ka ma kɛ ka vo Kabuli, 28de Eboron, de Rehobi, de Hamon, dedaane Kana, se ka kɛ ka vo ka yi Sidon teo kamunu. 29Ba siseini ta ma pipiri de yɔɔre Rama seeni, de tole de yi Tura, de na ye teo kolo na lɔge ko pe de dam to. Siseini dem laam ma gugwoli de vo Hosa seeni, de vo de kweeli Mediterania naneo kom ne. Ba laŋa kam déem ta yi Mahalaba, de Akiziba, 30de Wuma, de Afeka, de Rehobi.

Teene dem déem ye finlei-delei mo, de de nawuura yam maama. 31Teene dem konto de de nawuura yam mo ba déem pɛ Asere dwi dem, sɔ-yuu maama de ko nyem.

Nafitali dwi dem tega kam

32Nafitali dwi dem mo déem jwoŋi tega kam popɔra baredo tu wom, sɔ-yuu maama de ko nyem.

33Ba siseini dem ma zege Helefa ne de yi tei-zɔŋɔ kolo na zege Zaananim ne to. De ta tole de vo Adami-Nekeba de Jaminia mo se de yi Lakum, ye de laam kweeli Jɔdan buga kam ne. 34De daa ma gugwoli wɛ-zoore seeni de vo Azanof-Tabora, de Hukoka. Ba tega kam kuri seeni déem dwei Zebulun dwi dem laŋa kam mo. Asere laŋa kam ma jeeri ka wɛ-zoore seeni. Jɔdan buga kam de jeeri wɛ-puli seeni.

35Ba teene dento mo lɔge de pe de dam: Zidim, de Zera, de Hammafa, de Rakafa, de Kinerefa, 36de Adama, de Rama, de Hazora, 37de Kedesa, de Ederi, de En-Hazora, 38de Yiron, de Migadal-Eli, de Horem, de Bɛte-Anafa, de Bɛte-Semesa.

De déem ye teene fuga-nogo mo, dedaane de nawuura yam maama. 39Teene dem konto de de nawuura yam mo ba déem pɛ Nafitali dwi dem, sɔ-yuu maama de ko nyem.

Dan dwi dem tega kam

40Dan dwi dem nam mo jwoŋi tega kam popɔra barepɛ tu wom, sɔ-yuu maama de ko nyem. 41Teene dento wo banto laŋa ne mo:

Zora, de Esatola, de Irasemesa, 42de Saalabin, de Ayijalon, de Ifala, 43de Elon, de Timina, de Ekoron, 44de Eleteke, de Gibefon, de Baalafe, 45de Jehudi, de Beneberaka, de Gafa-Rimon, 46de Mejarekon, de Rakon, de jei selo maama na jeeri Jopa to.

47Dan dwi dem nam ya gɛ ba tega kam mo. Ko ma pa se ba fe ba vo ba jeeri Lesem tiina bam de jara. Ba ma di-ba ye ba jwoŋi ba tega kam ba zoore ka wone. Dan dwi tiina laam maa bwoi tega kam yere we Dan, se ko maŋe de ba nabaaro wom yere dem.

48Teene dem konto de de nawuura yam mo ba déem pɛ Dan dwi dem, sɔ-yuu maama de ko nyem.

Josua tega kam

49Isarele tiina bam nam ya na pɔɔre tega kam ba pa daane to, ba déem daare laŋa kadwoŋi mo ba pa Nun bu Josua se o taa tei. 50Baŋa Wɛ nam maŋe o pa-ba ni mo se ba kwei mɛ maama Josua na wó kuri to ba pa‑o. O ma kuri Timinaf-Sera na wo Efrayim zwonnu laŋa kam ne to, ye ba kwei-ko ba pa‑o. O ma fɔge o lɔ teo kom konto o zoore ko wone.

51Ko déem na ke tei Wɛ jeerim vwei dem na wo Siloo ne konto to, ko nam ye Wɛ kaanem tu Eleaza, de Josua, de Isarele sɔ-yuni yiga tiina bam mo zege Baŋa Wɛ yiga ne ba pɔɔre pɔɔre tega kam ba pa daane.#Josua 18:1 Ba ma pɔɔre-ka ba ti, pa se Isarele dwi maama jwoŋi ba tega.

Currently Selected:

Josua 19: KBG

Highlight

Copy

Compare