Josua 18

Ba pɔɔre tega kadwoŋi kam

1Ko na woli fee ye Isarele tiina bam laam jwoŋi Kanaan tega kam maama ba tei to, mo ba kɔgɔ kom maama jeeri Siloo ne. Ba ma chwi Baŋa Wɛ jeerim vwei dem dáane. 2Ba ya ta wo pɔɔre tega ba pa Isarele kɔ-fɔrɔ kom wo dwia yarepɛ se ba taa tei.

3Josua ma bwei Isarele tiina bam o we, “Dɛ dɔ mo abam boŋe se á vo á jwoŋi tega kam á nabaara Baŋa Wɛ wom na maŋe o kwei o pa abam to á ta‑á tei? 4Kuri-na nɔɔna batɔ batɔ se ba nwoŋi Isarele dwi maama wone. Amo wó toŋe-ba se ba vo ba beeri tega kam mɛ de mɛ ba boboŋa na dɛ to ne. Ba ná popone kolo maama ba yi na su to ba tiŋi, se ba jwoori ba ja-te ba ba ba bere-ne. 5Judah dwi dem wó maŋe ba tega kam na wo kuri seeni to ne. Josɛf dwi tiina de maa wó taa wo baŋa seeni de ba tega kam. Dé wó pɔɔre tega kalo na daare to kuni berepɛ mo. 6Abam nam ná popone tega kam popɔra berepɛ kam na nye tei maama to, se á ja ka memaŋa á ba á pa-ne. Amo laam wó ta jɔrɔ a pa abam se Baŋa Wɛ bere tega kam seina. 7Nam yé swei-na we Levi dwi tiina bam bá tɔge ba jwoŋi tega. Banto kaanem totoŋa yam ba na toŋe ba pa Baŋa Wɛ to mo ye kolo Wɛ na pɔɔre o pa-ba to. Ko nam ná ye Gad dwi dem, de Ruben dwi dem dedaane Manasɛ dwi chichworo kom, Baŋa Wɛ tontoŋeno Moses mo maŋe o pɔɔre tega o pa-ba. Ka nam wo Jɔdan bubɛ delo na jeeri wɛ-puli seeni to mo.”

8Nɔɔna bam na kwei chwoŋa se ba vo ba maŋe tega kam to, Josua ma ta-ba o we, “Véi-na á maane tega kam lanyerane se á popone ka memaŋa na ye tei to. Abam laam maa wó jwoori Siloo ywo-seeni. Amo de wó ta jɔrɔ Baŋa Wɛ yiga ne a pa abam.”

9Nɔɔna bam ma seene ba ke konto. Ba nɔne tega kam ni maama mo ba ja, ye ba ta pɔɔre-ka laŋa de laŋa kuni berepɛ. Ba ma popone ba bere laŋa maama na ye tei to de ka teene. Ba na ti to, mo ba jwoori Josua de nɔn-kɔgɔ kom maama tei Siloo ne. 10Josua ma ta jɔrɔ se o lɔre Baŋa Wɛ na lage se tega kam pɔɔre ka pa-ba tei to. O laam ma pɔɔre pɔɔre tega kam o pa Isarele dwia yalo na daare to maama.

Benjamin dwi dem tega kam

11Ba na tage jɔrɔ to, Benjamin dwi dem mo bobo se ba na ba tega kam popɔra, sɔ-yuu maama de ko nyem. Ba tega kam déem wo Judah dwi dem de Josɛf dwi dem tega tetare ne mo.

12Ka baŋa seeni siseini dem zege Jɔdan buga kam ne mo de di Jeriko baŋa. Ba tega kam daa ma tɔge wɛ-zoore seeni ka kwei zwonnu laŋa kam ka vo ka yi Bɛte-Aven kagoa kam. 13Siseini dem zege dáane de vo de kɛ Luzi kuri seeni mo. Bɛtel mo konto. Ka ta kɛ ka yi Atarof-Adara mo. Teo kom konto wo peo baŋa ne mo, ko na wo Bɛte-Horon kuri seeni to. 14Ka ma pipiri ka kwei peo kom wɛ-zoore seeni daa kam ka duri ka vo kuri seeni, ka maa vei Kiriaf-Baal. Kiriaf-Jeerim mo konto. Ko maa ye Judah dwi tiina nyem. Benjamin wɛ-zoore seeni siseini dem mo konto.

15Ko nam ná ye ba tega-kuri seeni siseini dem, de déem bobo Kiriaf-Jeerim ni ne mo de vo de yi Nefatoa buli-yia yam seeni. 16Ka ta vo ka yi peo kolo na wo Refayim bwolo kom baŋa seeni ye ko tole ko nii Hinom bwolo kom teiŋa to. Siseini dem ta siseiri de tɔge bwolo kom de tu kuri de kɛ Jebusi tiina teo kom kuri seeni, de yi En-Rogele. 17Ba tega kam zege dáane ka diini baŋa seeni mo ye siseini dem gugwoli de yi En-Semesa, de Gelilofa. Jei sem konto lɛɛne Adumim sisworo kom mo. Siseini dem daa ta ma kɛ de yi Bohan Kandwɛ dem. Bohan déem ye Ruben bu mo. 18Siseini dem ma kɛ Bɛte-Araba sisworo kom baŋa seeni de tu de zo Jɔdan bwolo kom wone. 19Tega kam laam ma tole ka gaale Bɛte-Hogala baŋa seeni sisworo kom, ka vo ka kweeli Yɛ naneo kom#18:19 Yɛ naneo kom = The Dead Sea baŋa seeni bubɛ dem ne, Jɔdan buga kam na vei ka guri mɛ to mo. Dento nam mo ye Benjamin kuri seeni siseini dem.

20Jɔdan buga kam tete mo ye Benjamin tega kam wɛ-puli seeni siseini dem. Siseina yalo ba déem na pɔɔre se Benjamin dwi dem taa jege to mo konto.

21Benjamin dwi dem déem jwoŋi teene dento mo, sɔ-yuu maama de ko nyem:

Jeriko, Bɛte-Hogala, Emeki-Kezizi, 22Bɛte-Araba, Zemarayim, Bɛtel, 23Awim, Para, Ofera, 24Kefare-Amoni, Ofini, Geba. De déem ye teene fuga-delei mo dedaane de nawuura yam.

25Ko ta woli de Gibeon, Rama, Beerofa, 26Mizipa, Chefira, Moza, 27Rekem, Irapeela, Tarala, 28Zela, Hayelefa, Jebusi tiina teo Jerusalem, Gibea, Kiriaf-Jeerim.

Dento nam ya ye teene fuga-dena mo dedaane de nawuura yam maama. Tega kam konto mo ba déem pɛ Benjamin dwi dem, pa se sɔ-yuu maama na ko nyem.

Currently Selected:

Josua 18: KBG

Highlight

Copy

Compare