Josua 17

Manasɛ dwi dem tega kam

1Ba déem ma ke tega kam jei sedwoŋi ba pa Manasɛ dwi dem. Manasɛ déem ye Josɛf bu-kwea mo, o de bu-kwea ya maa ye Makira. Wonto déem ye bembea mo. O maa ye Gilead tiina kwo. O ya maŋe o jwoŋi Gilead de Basan laŋa kam na wo Jɔdan buga kam wɛ-puli seeni to mo. 2Ko nam ná ye dwia yadwonna na nwoŋi Manasɛ yera ne to, ba déem pɔɔre tega Jɔdan buga kam wɛ-zoore seeni mo ba pa-ba, sɔ-yuu maama de ko nyem. Banto maa ye: Abizeri, de Heleke, de Asireli, de Sɛkɛm, de Hefera, dedaane Semida. Baara balo na ye Josɛf bu Manasɛ bia to mo konto.

3Hefera bu Zelofehada déem loge bukwa banu mo ye o ba jege bakeira.#Jeelim 27:1-7 O nabaara maa ye Gilead de Makira. Ba ye Manasɛ dwi dem tiina mo. Zelofehada bukwa bam yera mo ye: Maala, de Noah, de Hogela, de Milika, dedaane Tiraza.

4Kaana bam konto ma zaŋe ba vo Isarele nakwa bam tei, de Eleaza na ye Wɛ kaanem tu to de Josua de tei. Ba ma ta de-ba ba we, “Baŋa Wɛ déem pɛ Moses ni se o ná lage o ke tega o pa dé dwi dem baara bam, se o pɔɔre ka wone o pa debam de.” Josua ma ke o tɔge Baŋa Wɛ ni dem. O ma pa-ba tega se ba taa tei, nenɛɛne o déem na ke tei de ba baara bam to. 5-6Manasɛ dwi dem déem nɛ jei kuni fuga mo tega kam pɔɔrem baŋa ne, se ko woli de ba ya na maŋe ba jege tega kalo Jɔdan bubɛ dedwoŋi dem seeni to. Gilead de Basan laŋa kam mo konto. Ko nam ye Manasɛ dwi delo na ye kaana to de déem na jwoŋi tega nenɛɛne ba baara bam na jwoŋi tei to ŋwaane mo ko ye konto.

7Manasɛ dwi dem laŋa kam ma zege Asere dwi dem siseini ne, se ko taa vei Mikimefa na wo Sɛkɛm wɛ-puli seeni to mo. Siseini dem ta zege Mikimefa ne mo de tu kuri seeni, de yi Tapua tiina na zoore mɛ to. 8Tega kalo na gilimi Tapua teo to nam ye Manasɛ dwi dem nyem mo, ye Tapua teo kom tete ye Efrayim nyem. Ko déem jei Manasɛ siseini baŋa ne mo. 9Ba laŋa siseini dem ta tole tega-kuri seeni mo de yi Kana bu-nɔgɔ kom ne. De ma tɔge bu-nɔgɔ kom baŋa seeni konto ko vo ko zo Mediterania naneo kom wone. Teene dedwonna maa na tɔge bu-nɔgɔ kom kuri seeni to déem ye Efrayim teene mo, ye de wo Manasɛ siseini wone. 10Efrayim tega kam wo bu-nɔgɔ kom kuri seeni mo. Manasɛ tega kam maa wo ko baŋa seeni, ye Mediterania naneo kom jei ko wɛ-zoore seeni. Asere dwi dem tega wo baŋa seeni mo, ye Isakara dwi dem tega wo wɛ-puli seeni.

11Teene dedwonna déem ye Manasɛ dwi dem nyem mo, ye de wo Isakara dedaane Asere dwia yam tega baŋa ne. De maa ye: Bɛte-San, de Ibeleyam, de Dora tiina (Nafofa-Dora mo konto), de Endora, de Taanaka dedaane Megido, ko ta woli de dento nawuura yam de.

12Manasɛ dwi tiina nam wo wane ba zeili balo na zoore teene dem konto ne to. Ko ma pa se Kanaan tiina bam de yɔɔre ba zoore de wone. 13Isarele tiina bam maa na tu ba dana maŋa kalo to, ba ta wo zeili Kanaan tiina bam. Ba déem jege-ba ba pa se ba toŋe totoŋ-chɛɛra mo ba pa-ba.

Josɛf dwi tiina lwoori Josua ba tega kam ŋwaane

14Ko na wora ko wora to, Josɛf dwi tiina ma vo ba lwoori Josua ba we, “Bɛ mo ke ye n pa debam tega kam pɔɔrem dedoa yerane se dé taa tei? Nii Baŋa Wɛ na tiini o ke zaane debam yuu ne pa se dé kɔgɔ kom daga tei!”

15Josua de ma leiri-ba o we, “Abam na daga konto ye á maane we Efrayim zwonnu laŋa kam muri se á pɔɔre-ka á pa daane to, nam zo-na Pɛrizi tiina dedaane Refayi tiina kagoa kam wone. Dáane mo abam wó wane á de teeni ye á daare á chɛ gula se tega taa wora ka pa abam.” 16Ba daa ma leiri‑o ba we, “Zwonnu laŋa kam seene ka muri debam dedɛ. Dé ta maa bá wane dé jeeri Kanaan tiina balo na zoore bwollu tem ne to dé zeili. Banto mae luuru mo ba ma ke torokooro ba jege ba ke ba jara, ko ná ye balo na zoore Bɛte-San seeni de balo na wo Jezerele bwollu tem ne to maama de.”

17Josua ma ta de Efrayim dwi dem de Manasɛ dwi dem o we, “Abam seene á ye nɔn-kɔgɔ mo ye á jege dam. Abam nam wó wane á na tega a woli a tega kam ne. 18Zwonnu seeni laŋa kam na ye goa to ye se á kwei á pɔɔre á pa daane mo. Véi-na dáane á zage gula á na lage tei maama to. Ko nam ná ye Kanaan tiina balo na zoore jei sem konto ne ye ba jege dam, pa ba taa jege jara-keim torokooro to maama de, á wó wane-ba á zeili á daare ba tega kam á ta‑á tei.”

Currently Selected:

Josua 17: KBG

Highlight

Copy

Compare