Josua 16

Efrayim dwi de Manasɛ dwi taane

1Ba déem na kuri tega kalo ba pa Josɛf dwi dem to bobo Jɔdan buga kam ne, ka na bwola de Jeriko mɛ to mo. Ka zege Jeriko buli-yia yam wɛ-puli seeni mo, ka tɔge kagoa kam ne ka kɛ ka yi Bɛtel teo kom na wo zwonnu laŋa kam ne to. 2Ka na zege Bɛtel ne to, ka tɔge Luzi ye ka tole ka zo Atarofa, Ariki tiina bam na zoore mɛ to mo. 3Ka laam ma tu wɛ-zoore seeni ka yi Jafeleti tiina jei sem, se ko taa vei Bɛte-Horon kuri seeni. Ka daa ta ma kɛ ka vo Gezere, se ka vo ka kweeli Mediterania naneo kom ni ne.

4Ko dɛ konto mo ye Manasɛ de Efrayim jwoŋi ba tega kam pɔɔrem dem. Josɛf bia balei bam mo konto.

Efrayim dwi dem tega kam

5Laŋa kanto mo ba déem pɔɔre ba pa Efrayim dwi dem, sɔ-yuu maama de ko nyem:

Ba tega kam na jeeri wɛ-puli seeni to zege Atarof-Adara ne mo. Ka laam ma tole konto, ka di Bɛte-Horon baŋa seeni, 6ye ko kɛ ko yi Mediterania naneo kom. Se ko ná ye baŋa seeni siseini dem, tega kam yi Mikimefa mo. Ka laam ma gugwoli wɛ-puli seeni ka kɛ ka yage Tanafa-Siloo, ka gaale dáane ka yi Janoa na wo wɛ-puli seeni to. 7Tega kam daa zege Janoa ne konto ka vo Atarofa de Naara seeni mo. Ka ma daare ka yi Jeriko, ye ka laam vo ka kweeli Jɔdan buga kam ne. 8Ko na zege Tapua ne to, tega kam siseini yale mo de vo wɛ-zoore seeni. De ma tɔge Kana bu-nɔgɔ kom de vo de kweeli Mediterania naneo kom ni ne. Mo tega kalo Efrayim dwi dem déem na jwoŋi se ba taa tei to mo konto, sɔ-yuu maama de ko nyem. 9Efrayim tiina bam déem ta jwoŋi teene dedwonna na wo Manasɛ dwi dem laŋa kam wone mo.

10Kanaan tiina déem ya zoore Gezere teo wone ye Efrayim tiina bam wo zeili-ba. Banto de Efrayim tiina bam maa zoore daane de zem maama. Efrayim tiina bam déem za fe-ba mo, se ba taa toŋe totoŋ-chɛɛra.

Currently Selected:

Josua 16: KBG

Highlight

Copy

Compare