Josua 14

Jɔdan buga kam wɛ-zoore seeni tega kam popɔre sem

1Kanaan tega kam na wo Jɔdan buga kam wɛ-zoore seeni to déem ta daare se ba pɔɔre-ka ba pa Isarele tiina bam. Wɛ kaanem tu Eleaza, ko woli de Nun bu Josua, dedaane Isarele dwi tiina nakwa bam déem laam ma pɔɔre tega kam konto ba pa Isarele tiina bam maama. 2Ba déem tage jɔrɔ mo tega kam ŋwaane ba pɔɔre-ka ba pa Isarele dwia nogo de chichworo kolo na daare to, nenɛɛne Baŋa Wɛ na maŋe o pa Moses ni se o ke tei to. 3-4Ko ná ye dwia yalei de chichworo kodwoŋi kom, Moses ya maŋe o pa banto na ba jeiŋa jei. Banto tega kam wo Jɔdan buga kam wɛ-puli seeni mo. Moses nam wo pɛ Levi dwi tiina tega kam dwoŋi. O déem za kuri teene de vara pwoli mo o pa-ba, se ba de wane ba taa zoore de wone ye ba ke kɔnɔ.#Jeelim 35:1-3 Ko daare Josɛf dwi dem déem pɔɔre kuni belei mo: o bia balei Manasɛ dedaane Efrayim dwia yam mo konto. 5Isarele tiina bam déem na pɔɔre tega kam tei to ke ko maŋe dedaane Baŋa Wɛ ya na bere Moses se ba ke tei to mo.

Kaleb jwoŋi Heboron

6Isarele tiina bam déem ta maa wo Giligal ne. Ba na wora to mo Judah dwi tiina toŋe nɔɔna Josua tei ne. Ba dedoa déem ye Jefunɛ bu Kaleb, o na nwoŋi Kenizi sɔ-yuu kom ne to. Kaleb ma ta de Josua o we, “Yé swei Baŋa Wɛ déem na tage debam balei taane tetei maama o bere o tontoŋeno Moses, ye dé déem ta wo Kadese-Baranea ne to. 7Maŋa kam konto ne amo déem jege bena finna mo. Moses déem zege Kadese-Baranea ne o toŋe ne, se a vo a ŋɔ a nii tega kanto na ye tei to. Amo déem ma ja ta-ŋom a ba a pa‑o, de a wo maama. 8Se ko ná ye amo chorro telo déem na tɔge de amo ba vo se dé ŋɔ dé nii tega kam to, ba déem ke foone mo nɔɔna bam maama kuri ne. Amo déem nam yɔɔre a tɔge a Tu Baŋa Wɛ wom mo de a wo maama.#Jeelim 13:30 9Dento dɛ dem ne mo Moses déem tage o pwooli de amo o we, ‘Nmo na nɔne n naga Kanaan tega kalo ne konto to wó taa ye nmo nyem. Nmo de n bia mo wó taa tei-ka se ko taa vei wuu, n na tɔge Baŋa Wɛ de n wo maama to ŋwaane.’#Jeelim 14:24; Nia Gulim 1:36

10Tɔ. Moses na tage Baŋa Wɛ taane dem konto o bere-ne, se ko yi zem to, ko ye bena finna-yanu mo. Maŋa kam konto ne debam Isarele tiina ta wo kagoa yuu ne mo dé via. Nii amo! Amo ta ŋwe nenɛɛne Baŋa Wɛ na tage tei to, pa se a zem jege bena funɔnɔ yanu mo. 11De zem maama amo nam ta dana, ye a wara mo, nenɛɛne a déem na ye tei dɛ dem Moses na toŋe-ne to. Dam dem ta wora se a ma a ke jara de totoŋa yalo maama a na lage to. 12Konto to, kwei zwonnu laŋa kalo Baŋa Wɛ déem na pwooli se ka taa ye amo nyem to n pa-ne. Nmo wó guli we Anaki tiina bam mo wo daane. Ba teene dem ma lɔ de di vili vili. De ko de, Baŋa Wɛ na wo amo tei ne to ŋwaane, a wó wane-ba a zeili, nenɛɛne Baŋa Wɛ na tage se a ke tei to.”

13Jefunɛ bu Kaleb na tage konto maama o ti to, Josua ma sɔɔle Wɛ swolim o yage o yuu ne. O ma daare o kwei Heboron o pa‑o, se ko taa ye o tete jejegero. 14Ko na zege dɛ dem konto ne se ko yi zem to, Heboron laam lɛɛre ko ji Jefunɛ bu Kaleb dedaane o bia nyem mo. Kokuri, wonto déem tɔge Isarele Baŋa Wɛ wom mo dedaane o wo maama.#Jeelim 14:24 15Kanto maŋa ya ta na wo yi to, ba déem jege teo kom mo ba bwoi we Kiriaf-Araba, Araba déem na ye Anaki tiina bam nɔn-sawɔrɔ to ŋwaane.

Tega kam laam ma sii ye jara daa tera.

Currently Selected:

Josua 14: KBG

Highlight

Copy

Compare