Josua 13

Tega kalo ta na daare se ba di to

1Josua déem na tiini o kwe maŋa kalo to, mo Baŋa Wɛ tage ded‑o o we:

“Nmo laam kwe dedɛ, ye tega kam jei dedɛ ta wora se á vo á jwoŋi á ta‑á tei. 2Jei sento nam mo daare se nɔɔna vo ba jwoŋi: Filisi tiina laŋa kam, ko woli de Gesura tiina laŋa kam maama. 3Ka zege Sihora bu-nɔgɔ kom ne mo, Ejipti siseini dem na wo mɛ to, se ko yi Ekoron siseini dem na wo baŋa seeni to. Jei sem konto maama ye Kanaan tiina laŋa mo. Filisi dedɛɛra banu teene dem maa ye: Gaza, de Asedodi, de Asekelon, de Gafa, dedaane Ekoron. Ko woli de Awa tiina laŋa kalo na wo kuri seeni to, 4dedaane Kanaan tiina tega kalo na zege Sidon tiina teo Ara ne se ka ta vo ka yi Afeka laŋa kam, Amori tiina siseini dem na wo mɛ to. 5Abam ta maa wó jwoŋi Gebale tiina laŋa kam á woli da, dedaane Lebanon tega kam maama na wo wɛ-puli seeni ye ka zege Baal-Gad na wo Heremon Peo kom tega-kuri seeni to, ka vo ka yi Lebo-Hamafa.

6Sidon tiina laŋa kam maama tɔge ka woli da mo. Banto zoore zwonnu jei sem na wo Lebanon peero tem dedaane Miserefofa-Mayim tetare ne to mo. Amo tete nam mo lage a zeili nɔɔna bam konto maama, se abam wane á zo da. Nmo nam yɔɔre n pɔɔre tega kam n pa Isarele tiina bam nenɛɛne a na pɛ nmo ni se n ke tei to. 7Kwei tega kam konto maama n pɔɔre n pa Isarele dwia nogo kolo na daare to, dedaane Manasɛ dwi dem chichworo, se ba taa tei.”

Jɔdan buga kam wɛ-puli seeni tega kam popɔre sem

8Ko ná ye Manasɛ dwi dem chichworo kodwoŋi kom, ko woli dedaane Ruben dwi dem, de Gad dwi dem, Baŋa Wɛ tontoŋeno Moses déem maŋe o pa banto ba tega kam popɔra Jɔdan buga kam wɛ-puli seeni mo.#Jeelim 32:33 9Ba laŋa kam yale konto mo ka yi Arowa na wo Aranon bwolo kom ni ne to, de teo kolo na wo bwolo kom tetare ne to, ko woli de te-kampare jei selo maama na zege Medeba ne se ko yi Dibon to. 10Ka ta yi teene delo maama na ye Amori tiina Pɛ Sihon nyem to. Wonto déem nam di paare Hesebon wone mo. Ka ta ma vo ka yi Amon teo siseini dem. 11Ba tega kam déem tɔge Gilead jei sem de Gesura tiina de Maaka tiina laŋa kam maama, dedaane Heremon Peo kom jei sem maama, ko woli de Basan maama, se ka vo ka yi Saleka mo. 12Basan teo Pɛ Oga laŋa kam maama de ye ba nyem mo. Wonto déem di o paare Asetarof dedaane Ederi ne mo. Wonto déem mo kweeli Refayi tiina bam jeŋa ne. Moses déem maa di-ba, ye o zeili-ba o daare tega kam konto. 13Isarele tiina bam déem maa wo zeili Gesura tiina bam de Maaka tiina bam. Nɔɔna bam konto de déem maa tɔge ba zoore de Isarele tiina bam se ko yi zem maama.

14Moses déem na pɔɔre tega kam o pa Isarele tiina bam to, Levi dwi dem yerane mo wo tɔge ba jwoŋi tega kam popɔra.#Nia Gulim 18:1 Baŋa Wɛ maŋe o pa Moses ni we, banto popɔra wó nwoŋi pɛɛra yalo Isarele tiina bam na jaane ba tui ba zwɛ Wɛ bimbini dem baŋa ne ba pa ba Tu Baŋa Wɛ wom to mo.

Ruben dwi dem tega kam

15Moses déem kwei tega kanto mo o pa Ruben dwi dem. O ma pa sɔ-yuu maama de ko nyem se ba taa tei.

16Banto laŋa kam yale konto mo ka yi Arowa na wo Aranon bwolo kom ni ne to, de teo kolo na na wo bwolo kom tetare ne to, ko woli de te-kampare jei selo maama na bwola de Medeba to. 17Hesebon de ye ba nyem mo, dedaane teene delo maama na wo te-kampare dem konto maama ne to: Dibon, de Bamofe-Baal, de Bɛte-Baal-Meon, 18de Jahaza, de Kedemofa, de Mefaafa, 19de Kiriafayim, de Sibima, dedaane Zeref-Sahare. Teo konto maa wo zwoŋo kolo na wo bwolo kom ni ne to baŋa ne mo. 20Ko ta woli de Bɛte-Peora, de tega kalo na wo Pisiga peo kom teiŋa ne to, de Bɛte-Jesimofa, 21dedaane teene delo maama na wo te-kampare jei sem ne to. Amori tiina Pɛ Sihon déem na di paare Hesebon wone ye o tei laŋa kalo maama to de maa ye Ruben dwi dem nyem. Moses déem ma di pɛ wom konto de Midian pwa bam maama mo: Evi, de Rekem, de Zura, de Hura, dedaane Reba. Banto déem mo tei tega kam ba pa Pɛ Sihon. 22Isarele tiina bam déem ma go Beora bu Balaam wolo na ye voro to ba woli de nɔɔna babam bam. 23Ruben dwi dem tega kam déem vei ka kweeli Jɔdan buga kam bubɛ baŋa ne mo. Ba déem kwei teene dem konto de de nawuura yam maama ba tei, diga maama de ka nyem.

Gad dwi dem tega kam

24Moses déem ta ma kwei tega kadwoŋi o pa Gad dwi dem. O ma pa sɔ-yuu maama de ko nyem se ba taa tei.

25Banto laŋa kam ma kwei Jazera de teene delo maama na wo Gilead laŋa kam ne, ko ta woli de Amon tiina tega kam chichworo, se ko taa vei Arowa na wo Raba wɛ-puli seeni to. 26Ba laŋa kam zege Hesebon ne, se ka vo ka yi Ramaf-Mizipa dedaane Betonim. Ka ta zege Mahanayim ne, se ka yi Debiri laŋa kam. 27Jɔdan bwolo kom seeni to, ba tega kam ma kwei Bɛte-Haram, de Bɛte-Nimira, de Sukofa, dedaane Zafon. Hesebon teo Pɛ Sihon laŋa kalo ya ta na daare to de maa ye ba nyem. Gad dwi dem tega kam déem vei ka kweeli Jɔdan buga kam bubɛ baŋa ne mo, ka ta tɔge buga kam wɛ-puli seeni ka yi Galili naneo kom ni. 28Ba déem kwei teene dem konto de de nawuura yam maama ba tei, sɔ-yuu maama de ko nyem.

Manasɛ dwi dem chichworo tega kam

29Moses déem ta ma kwei tega kadwoŋi o pa Manasɛ sɔ-yuu kom chichworo. O ma pa diga maama de ka nyem se ba taa tei. 30Banto laŋa kam ma kwei Mahanayim, se ko taa vei Basan laŋa kam maama ne, Pɛ Oga déem na di o paare dem mɛ to. Teene fuseredo delo Jayira ya na di ye de wo Basan ne to de ta woli da mo. 31Gilead laŋa kam chichworo de maa woli da, dedaane Pɛ Oga déem na di o paare dem teene delo ne to, Asetarof dedaane Ederi mo konto. Jei sem konto maama déem laam jigi Manasɛ bu Makira sɔ-yuu kom chichworo nyem mo.

32Mo ko na ke tei ye Moses déem wo Moaba bwollu tem laŋa kam ne o pɔɔre tega kalo na wo Jeriko teo de Jɔdan buga kam wɛ-puli seeni to. 33Se ko na daare Levi dwi tiina bam to, Moses déem wo pɔɔre tega kadwoŋi o pa banto ba nyem se ba taa tei. Kokuri to, Isarele Baŋa Wɛ wom mo maŋe o pwooli o pa-ba we, wonto wó taa ye ba jejaano paro.

Currently Selected:

Josua 13: KBG

Highlight

Copy

Compare