Josua 11

Josua ke jara dedaane baŋa seeni pwa bam

1Hazora teo pɛ Jabin déem ma ni Isarele tiina bam na di wɔnɔ laŋa kam maama baŋa ne tei to. O ma toŋe kwora o pa Pɛ Jobaba. Wonto déem ye Madon teo pɛ mo. O kwora kam ta ma yi Simiron teo pɛ, dedaane Akasaf teo pɛ wom de. 2O déem ta ma guli dedaane pwa balo maama na wo baŋa seeni peero tem laŋa ne to, de pwa balo na wo Galili kuri seeni se ko maŋe dedaane Jɔdan buga kam to, ko woli de balo na wo wɛ-zoore seeni bwollu tem ne se ko taa vei Dora na wo naneo kom ni ne to. 3Pɛ Jabin ta ma pa kwora yi Kanaan tiina bam. Banto zoore Jɔdan buga kam wɛ-puli seeni de ka wɛ-zoore seeni maama ne mo. O ta ma toŋe kwora Amori tiina bam, de Hiti tiina bam, de Pɛrizi tiina bam, dedaane Jebusi tiina bam tei ne. Banto nam zoore zwonnu laŋa ne mo. O kwora kam ta ma yi Hivi tiina bam de. Banto déem zoore Mizipa laŋa ne mo, Heremon Peo kom teiŋa ne. 4Pwa bam konto maama ma zaŋe ba la ba jar-keira bam ba ke daane vulululu, nenɛɛne naneo ni kasolo na daga tei to. Ba sisein-nɔɔna de sisei-torokooro maa gaale. 5Pwa bam de ba jar-keira bam laam ma la daane Merom bu-nɔgɔ kom ni ne, se ba ke jara dedaane Isarele tiina bam.

6 Baŋa Wɛ ma ta de Josua o we, “Yé kɔre foone de-ba. Jwa kanto maŋa ne, ba maama wó ji twa mo á yibia ne. Abam maa wó pa se ba sisein-nɔɔna bam gwarege, se á daare á zwɛ ba sisei-torokooro tem maama.”

7Josua dedaane Isarele kɔgɔ kom maama ma pɔpɔ ba zaŋe pwa bam de ba nɔɔna bam baŋa ne. Ba ma ke jara de-ba Merom bu-nɔgɔ kom jei sem ne. 8Baŋa Wɛ ma pa se Isarele tiina bam di-ba. Ba ma pare-ba ba pa se ba duri ba yɔɔre ba yi Miserefofa-Mayim, dedaane Sidon te-fɔrɔ kom. Badwonna ma kwei wɛ-puli seeni chwoŋa kam ba vo Mizipa bwolo kom ne. Ba ke jara yam mo taa. Ba ma go ba dona bam maama ye wolowolo wo daare. 9Josua déem ma ke kolo maama Baŋa Wɛ na pɛ‑o ni se o ke to. O déem pɛ se ba sisein-nɔɔna bam maama ji wo-gwane mo, ye o daare o zwɛ ba sisei-torokooro tem maama.

10Josua laam ma jwoori o pipiri o vo o ke jara de Hazora teo kom. O ma wane teo kom nɔɔna de ba pɛ wom maama, ye o go-ba. Kanto maŋa ne, Hazora déem mo ye teene dem konto maama te-fɔrɔ. 11Isarele tiina bam ma yɔɔre ba chɔge teo kom konto nɔɔna bam maama. Ba wo pɛ pwola se nɔɔn-nɔɔno taa ŋwe. Ba déem ta ma zwɛ teo kom.

12Josua ta ma di pwa badwonna bam dedaane ba teene dem maama. O ma yɔɔre o go-ba, nenɛɛne Baŋa Wɛ tontoŋeno Moses déem na pɛ ni se ba ke tei to. 13Ko nam ná ye teene delo maama na lɔge di-dwonnu baŋa ne vili vili to, Josua de o nɔɔna bam déem wo zwɛ-de. Hazora yerane mo ba zwɛ. 14Isarele tiina bam na di teene delo maama to, ba déem kwei de jejaano tem maama, ko woli de ba vara mo ba jega. Ba ma daare ba go nɔn-bia bam maama, ye nɔɔn-nɔɔno wo daare. 15Baŋa Wɛ déem na pɛ o tontoŋeno Moses ni delo to, mo o taga o bere Josua. O de maa toŋe tei maama Baŋa Wɛ na bere Moses we ba ke to.#Nwoŋim 34:11-12

Wɔnɔ dim taane

16Josua déem ma di wɔnɔ laŋa kam maama wuu baŋa ne, ko zege zwonnu laŋa kam ne, se ko taa tu tega-kuri kagoa kam seeni. Ko daa ta vei Gosen seeni, de wɛ-zoore seeni bwollu tem, de Jɔdan bwolo kom, ko woli dedaane peero laŋa kam maama. 17Isarele tiina tega kam laam ma zege Halaka Peo kom ne, mɛ na bwola de Seyira to, se ka vo baŋa seeni ka yi Baal-Gad na wo Lebanon bwolo kom ne ye ko wo Heremon Peo kom teiŋa ne to mo. Josua déem ma wane pwa balo na tei laŋa kam konto maama to mo, ye o daare o go-ba. 18O dedaane pwa bam konto déem ma ke jara yam ba daane, ye o laam di-ba. 19Hivi tiina balo na zoore Gibeon teo kom ne to yerane déem mo ke ni-sɛɛm de Isarele tiina bam. Teene delo maama na daare to, Isarele tiina bam di-ba jara keim baŋa ne mo. 20Ko déem nam ye Baŋa Wɛ mo pɛ se ba bochara ke dam, se ba ke jara de Isarele tiina bam. O dɛ ko baŋa ne se o pa ba yɔɔre ba na chɔgem, ye yibwona tera ko wone. Konto maama nam ke ko maŋe de Baŋa Wɛ na pɛ Moses ni tei to mo.

21Kanto maŋa kam ne mo Josua déem chɔge nɔn-sawaara balo na ye Anaki tiina to. Ba déem zoore Isarele de Judah zwonnu laŋa kam ne mo. Ba teene dem maa ye Heboron de Debiri de Anaba. Josua déem yɔɔre o chɔge ba maama mo dedaane ba teene dem. 22Anaki tiina bam déem daa maa wo daare Isarele tega kam baŋa ne, se ba badwonna déem za ta daare ba zoore Gaza ne, de Gafa ne, dedaane Asedodi wone. 23Ko dɛ chwoŋa kam konto mo ye Josua jwoŋi tega kam maama, nenɛɛne Baŋa Wɛ déem na maŋe o pa Moses ni tei to. Josua de ma pɔɔre pɔɔre tega kam o pa Isarele tiina bam, se ko tɔge dwi dedaane dwi se ba taa tei.

Nɔɔna bam laam ma sii de jara-keim.

Currently Selected:

Josua 11: KBG

Highlight

Copy

Compare