Josua 10
10
Dɛ dem wea kam na zege cheppe to
1Adoni-Zɛdeka na ye Jerusalem teo Pɛ to déem nigi we Josua di Ayi teo kom. O ta nigi we Josua yɔɔre o chɔge teo kom maama de ko Pɛ, nenɛɛne o na maŋe o lwoori yiga o ke tei de Jeriko teo de ko Pɛ tei to. O ta nigi Gibeon tiina bam na ke ni-sɛɛm dedaane Isarele tiina bam pa se ba zoore de-ba tei to. 2Ko ma pa se foone tiini de zo wonto de o teo nɔɔna bam, kolo ŋwaane Gibeon déem ye te-fɔrɔ mo ko dwoi Ayi teo kom. Ko nɔn-bia bam de déem nam ya ye jar-keira mo chekke.
3Mo kokuri Pɛ Adoni-Zɛdeka toŋe se pwa banto jeeri ba woli‑o: Heboron teo pɛ Hoham, de Jaremuf teo pɛ Piram, ko woli de Lakisi teo pɛ Jafia, dedaane Egilon teo pɛ Debiri. 4O ma pa-ba kwora kanto we, “Ba-na á woli-ne se dé ke jara dedaane Gibeon tiina bam. Kokuri to, ba ke ni-sɛɛm mo dedaane Josua de o nɔɔna Isarele tiina bam.”
5Amori tiina pwa banu banto ma la ba jar-keira bam ba ke daane: Jerusalem pɛ, de Heboron pɛ, de Jaremuf pɛ, de Lakisi pɛ, ko woli de Egilon pɛ. Ba maama laam ma ba ba gilimi Gibeon tiina bam ba ke tetare ne se ba chɔge-ba.
6Gibeon tiina bam ma toŋe kwora lela se ka yi Josua, ye Isarele tiina bam ta wo Giligal ne. Ba maa we, “Debam ye nmo tontoŋena mo. Nam yé swei-na debam swia. Ke-na lela á ba á jwoŋi debam á yage. Kokuri Amori tiina bam maama na zoore zwonnu tem laŋa ne to mo gilimi daane se ba chɔge debam.”
7Josua ma zaŋe Giligal ne dedaane o jar-keira bam maama se o vo ba tei, ye balo na wara de jara keim chekke to de wo ba wone. 8Baŋa Wɛ ma ta dedaane Josua o we, “Yé ta‑n kɔre foone. A lage a pa se nmo mo di-ba. Nɔɔn-nɔɔno tera o na wó wane o dwoni de nmo.”
9Josua de o jar-keira bam déem kwei tete dem maama mo ba zege Giligal ne ba vo ba yi Gibeon tiina bam. Ko ma pa se ba pɔpɔ ba zaŋe Amori tiina bam baŋa ne. 10Baŋa Wɛ ma pa se Amori tiina bam boboŋa jei, ye Isarele tiina bam déem go ba dedɛ Gibeon ne. Amori tiina bam badwonna ma kwei zwonnu laŋa chwoŋa kam na wo Bɛte-Horon seeni to. Ba na duri se ba lu to, mo Isarele tiina bam pare-ba ba goe ba vo ba kwaare Azeka dedaane Makeda na wo tega-kuri seeni to. 11Amori tiina bam maa na zege Bɛte-Horon ne ba duri ba vei Azeka seeni konto to, mo Baŋa Wɛ tɔge ba kwaga o dole-ba dedaane do-kandwa taa, se ba vo ba yi Azeka. Do-kandwa yam déem ma go ba dedɛ se ko dwoni balo Isarele tiina bam na go to.#Nwoŋim 9:23
12Dɛ delo wone Baŋa Wɛ déem na pɛ Isarele tiina bam di Amori tiina bam to, mo Josua zege Isarele kɔgɔ kom yiga ne o lwoori Baŋa Wɛ o we:
“Wea, ta‑n zege konto cheppe
Gibeon teo baŋa ne!
Chana, nmo de maŋe Ayijalon
bwolo kom ne konto n zege!”
13Wea kam ma maŋe da, ka zege cheppe. Chana kam de daa maa wo fofɔ ka vo yiga, se ko taa nii Isarele tiina bam na di ba dona bam ba ti to. Keim dento maama nam popone mo de tigi Jasare tɔnɔ kom wone. Wea kam déem ma maŋe wɛyuu kom tetare ne ka zege cheppe. Ka maa wo vei ka to, se ko maŋe de dɛ-puni. 14Dé ta wo fɔge dé na dɛ nenɛɛne dɛ dem konto, pa se Baŋa Wɛ cheigi nabiinu kwora konto dwoŋi. Baŋa Wɛ ma woli de Isarele tiina bam ye ba ke jara yam.
15Josua dedaane Isarele tiina bam maama daa ma jwoori Giligal ne, mɛ ba ya na maŋe ba zoore to.
Ba go Amori tiina pwa banu
16Jara yam ta na wora ya ke konto to, Amori pwa banu bam ma duri ba vo ba seigi peo kodwoŋi bɔɔne wone. Jei sem wo Makeda laŋa ne mo. 17Nɔɔno ma na-ba ye o chɔ o bere Josua ba na wo mɛ to. 18Josua de ma pa ni we, “Lage-na kandwa kamuna á ma á pe peo bɔɔne delo ba na seigi da to ni, se á ta daare á beeri nɔɔna se ba yere bɔɔne dem. 19Ko daare abam wolowolo yé maŋe kwaga ne! Pare-na á dona bam, se á che ba yiga se ba yé zo ba teene dem wone. Kolo ŋwaane, abam Baŋa Wɛ wom pɛ abam dam se á di-ba mo.”
20Josua dedaane o jar-keira bam ma wane Amori tiina jar-keira bam maama ba ti. Ba fenfee yerane mo duri ba lu ba vo ba zo ba teene delo na lɔge de pe to wone. 21Konto kwaga ne, Isarele jar-keira bam maama ma jwoori Makeda dedaane yazura. Dáane mo Josua ya wora o cheigi-ba. Nɔɔn-nɔɔno daa maa ware se o ta Isarele tiina bam yera wo-lɔŋɔ.
22Josua ma ta o we, “Dɔne-na kandwa yam peo bɔɔne dem ni ne, se á ja pwa banu bam á ba amo tei.” 23Nɔɔna bam ma ja Jerusalem pɛ, de Heboron pɛ, de Jaremuf pɛ, de Lakisi pɛ, ko woli dedaane Egilon pɛ ba ba o tei. 24Josua laam ma bwoŋi Isarele jar-keira bam maama ye o ta dedaane bembɛ selo na tɔge ded‑o ba vo ba ke jara yam to o we, “Fɔɔre-na á yi ywo, se á kwei á nɛ á daŋe pwa banto dedoa dedoa ba ne.” Ba de ma seene ba ke konto.
25O daa ta ma ta de-ba o we, “Yé kɔre-na foone. Nam yé pa-na se á vɔna pare. Ke-na dam á tete kuri ne se á daare á ja baare. Abam dona balo maama á na wó ke jara de-ba to, Baŋa Wɛ lage o ke-ba konto dwoŋi mo.” 26Josua laam ma go pwa banu bam, ye o kwei ba yera yam o lei teeni denu yera ne. Pwa bam ma maŋe teeni dem yera ne se ko yi dedaan-ni maŋa.
27Wɛ-zoore maŋa ne, Josua ma pa ni se ba bwoli twa bam teeni dem yera ne, ye ba laam dole-ba ba de peo bɔɔne delo wone ba ya na seigi to. Ba ma jwoori ba kwei kandwa kamuna ba ma ba pe de ni. Dáane mo ya ta wora se ko yi zem maama.
Josua di teene dedwonna tega-kuri seeni
28Josua déem ma wane Makeda teo de ko pɛ wom maama. O déem yɔɔre o chɔge ba maama mo ye nɔɔn-nɔɔno wo daare teo kom wone. Josua déem toŋe dedaane Makeda pɛ wom nenɛɛne o na maŋe o da yiga o toŋe tei de Jeriko pɛ wom mo.
29Josua dedaane Isarele jar-keira bam maama zege dáane mo ba vo Libina. Ba déem ma ke jara dedaane teo kom konto tiina. 30Baŋa Wɛ déem ta ma pa se ba di Libina tiina bam. Nɔɔn-nɔɔno wo lugi da. Josua ma toŋe dedaane Libina teo pɛ wom de o nɔɔna bam ne o na ke tei Jeriko ne to.
31Josua dedaane o kɔgɔ kom ma zege Libina ne ba kɛ ba yi Lakisi. Ba ma gilimi teo kom ba pu, ye ba ke jara de ko. 32Jara yam keim da yalei dɛ dem ne mo Baŋa Wɛ pɛ ba di teo kom konto. Isarele tiina bam ma go teo kom nɔɔna maama, ne ba déem na ke tei Libina ne to. 33Kanto maŋa kam ne, Gezere teo Pɛ Horam de ma ba se o da o woli Lakisi tiina bam. Josua ma ti wonto de o jar-keira bam maama, nɔɔn-nɔɔno wo daare.
34Josua laam ma ja o nɔɔna bam maama o vo Egilon. Ba ma gilimi teo kom ba pu, ye ba ke jara de-ba. 35Ba déem kwei dɛ dedwe yerane mo ba ma wane teo kom. Ba ma yɔɔre ba chɔge ko nɔɔna bam maama, ne ba déem na ke Lakisi tei to.
36Josua de o nɔɔna bam ma zege Egilon ne ba vo se ba ke jara dedaane Heboron tiina. 37Ba déem ma wane teo kom konto dedaane ko nawuura yam maama. Ba déem go ko pɛ wom de ko nɔn-bia bam maama. Ba maa wo daare nɔɔn-nɔɔno teo kom wone. Ba déem toŋe de-ba nenɛɛne ba na ke tei maama Egilon baŋa ne to mo.
38Isarele tiina bam daa ma pipiri ba vo ba ke jara dedaane Debiri teo. 39Ba déem ma wane teo kom de ko pɛ maama. Ba di teo kom nɔɔna maama, dedaane ko nawuura yam mo, ye ba go ko nɔɔna maama. Josua déem na toŋe tei Heboron dedaane Libina yera ne to, mo o ta ke konto Debiri teo pɛ de o nɔɔna bam yera ne.
40Josua déem ma di laŋa kam konto maama. O déem wane pwa bam de ba nɔɔna bam maama: balo na zoore zwonnu laŋa kam ne, dedaane wɛ-zoore seeni bwollu tem ne, de tega-kuri seeni kagoa kam wone, ko woli de wɛ-puli seeni peero laŋa kam ne. Josua nɔɔna bam ma yɔɔre ba chɔge ba maama, ye nɔɔn-nɔɔno wo daare. Isarele Baŋa Wɛ wom nam ya maŋe o pa-ba ni se ba ke konto mo. 41Josua wane nɔɔna bam mo se ko zege Kadese-Baranea na wo kuri seeni to ko taa vei Gaza. O ta ma di-ba se ko zege Gosen laŋa kam ne, se ko yi Gibeon na wo baŋa seeni to. 42Josua déem na di pwa banto de ba teene dem maama bedwe baŋa ne to, ko ye Isarele tiina Baŋa Wɛ wom na jaŋe o pa-ba to ŋwaane mo.
43Konto maama kwaga ne to, Josua dedaane Isarele jar-keira bam maama jwoori ba vo ba zoore Giligal ne mo.
Currently Selected:
Josua 10: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
