Josua 1
1
Josua jigi Isarele tiina bam yiga tu
1Wɛ tontoŋeno Moses toone dem kwaga ne, Baŋa Wɛ ma ŋɔɔne dedaane Nun bu Josua. Wonto déem mo yeini o woli Moses. Baŋa Wɛ maa we:
2“Amo tontoŋeno Moses tega. Nmo laam nam zaŋe n to amo nɔɔna Isarele tiina bam yiga ne se á bɛ Jɔdan buga kam á zo tega kalo amo na wó pa abam to. 3Amo lage a ke kolo a déem na tage dedaane Moses to mo. Abam ná gwɛ á yi jei selo maama, amo wó kwei tega kam a pa abam. 4Abam laŋa kam siseini wó zege kagoa kalo na wo kuri seeni to, ka tole konto ka yi Lebanon peero tem na wo baŋa seeni to. Ka wɛ-puli seeni siseini dem maa wó zege Yuferata bu-zaŋa kam ne ka tɔge Hiti tiina tega kam maama seeni, se ka laam taa vei Mediterania naneo kom na wo wɛ-zoore seeni to.#Nia Gulim 11:24-25 5Amo wó taa wo nmo tei ne maŋa maama, nenɛɛne a déem na wo Moses tei ne tei to. Amo bá fɔge a yage‑m.#Hiburu 13:5 Nɔɔn-nɔɔno de nam bá wane o dwoni de nmo.
6Ke dam n ke n tete kuri ne, se n daare n ta‑n jege baare. Kokuri, nmo mo lage n tɔge nɔɔna bam yiga se á zo á jwoŋi tega kalo a na gwoni ni se a pa á nabaara bam to. 7Yɔɔre n ke dam n tete kuri ne, se n daare n tiini n ta‑n jege baare. Nam ta sɛ Wɛ nia yalo amo tontoŋeno Moses na bere‑m to. Yé virigi n kwaga n ya-ya, se yanto mo wó pa‑m yiga-veiŋa. 8Maŋa maama, se n ta‑n zamese Wɛ nia tɔnɔ kom, se n daare n zo ya wo n boŋe ya boboŋa. Nmo ma‑n ná sɛ o nia yam na bere tei maama to, nmo wó seene n na yiga-veiŋa chekke. 9Amo nam maŋe a ta dede‑m we n ke dam n ke n tete kuri ne se n ta ta‑n jege baare. Yé ta‑n fona, nam yé pa se n vɔna pare. Kokuri, amo mo ye nmo Tu Baŋa Wɛ wom. Jei selo maama nmo na wó vo to, amo wó taa wora de nmo.”#1 Tigisim 22:13
10Josua laam ma pa Isarele tiina dedɛɛra bam ni o we, 11“Véi-na nɔɔna bam tiga jei sem ne, se á ta de-ba we, ‘Ti-na á wodiiru yiga se da yatɔ maŋa ne mo á lage á bɛ Jɔdan buga kam se á zo tega kalo abam Tu Baŋa Wɛ wom na gwoni ni se o pa abam to.’ ”
12Josua ta ma ta de Ruben dwi dem, de Gad dwi dem dedaane Manasɛ dwi chichworo kom o we: 13“Guli-na Wɛ tontoŋeno Moses déem na tage tei dedaane abam to. O déem we, ‘Abam Tu Baŋa Wɛ lage o pa abam tega kanto mo se á jeini da.’ 14-15Nam pa-na se á kaana, de á bia, dedaane á vara bam maŋe ywo-seeni. Abam nɔɔna balo maama na yei jara keim to maa wó vɔ ba jara zela diŋ-diŋ, ye ba tɔge de á dwonna Isarele tiina bam se á bɛ Jɔdan buga kam á vo á woli banto se ba wane ba jwoŋi tega kalo na wo buga kam bubɛ delo na jeeri wɛ-zoore seeni ye abam Tu Baŋa Wɛ wom kwei o pa-ba to. Wɛ maa ná pɛ Isarele tiina bam maama ba jeiŋa jei, se abam de laam jwoori á tega kam na wo Jɔdan bubɛ delo na jeeri wɛ-puli seeni ye Wɛ tontoŋeno Moses kwei o pa abam to wone.”#Jeelim 32:20-22
16Ba de ma leiri‑o ba we, “Dé wó sɛ nmo ni dem maama n na pɛ debam to, ye n ná toŋe debam jei selo maama, dé wó vo. 17Debam wó taa sɛ nmo ni maŋa maama mo nenɛɛne dé déem na sɛ Moses ni tei to.#Jeelim 27:20 Dé nam teene we nmo Tu Baŋa Wɛ wom wó taa wo n tei ne nenɛɛne o déem na wora de Moses tei to. 18Wolo maama nam ná gwooni‑m ye o ve se o sɛ nmo taane, se ba go‑o. Konto ŋwaane, yɔɔre n ke dam n tete kuri ne, se n daare n ta‑n jege baare de n totoŋa yam.”
Currently Selected:
Josua 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
