Nia Gulim 34

Moses toone dem

1Moses déem ma zege Moaba pwaro tem ne o vo o yi Nebo peo kom. O ma di Pisiga peo kom yuu na jeeri Jeriko teo kom to. Dáane mo Baŋa Wɛ bere‑o tega kam maama, ko zege Gilead laŋa kam ne se ko vo ko yi Dan laŋa kam. 2Wɛ daa ta bere‑o Nafitali laŋa kam maama, de Efrayim de Manasɛ jei sem, de Judah laŋa kam se ko taa vei wɛ-zoore seeni ko vo ko yi Mediterania naneo kom, 3ko ta woli de tega-kuri kagoa kam, de bwolo tega kalo na tole ka zege Jeriko ne se ko vo ko yi Zoara to. Ba déem jege Jeriko ba bwoi we ‘Konkware teo kom’.

4 Baŋa Wɛ ma ta de Moses o we, “Tega kanto mo amo dugi duuri ka ŋwaane a pwooli de Abaraham, de Izaak, de Jakob se a kwei-ka a pa ba kwaga kam. A laam nam pɛ se n na-ka de n yia mo, ko daare n bá‑n na chwoŋa se n bɛ n vo n zo ka wone.”#Pulim 12:7; Nia Gulim 3:27

5 Baŋa Wɛ tontoŋeno Moses ma te dáane, Moaba laŋa kam ne. Ko déem ke nenɛɛne Baŋa Wɛ na wuuri o ta tei to. 6Ba ma suli‑o Moaba bwolo kodwoŋi ne, ko na jeeri Bɛte-Peora to. Nɔɔn-nɔɔno nam yeiri mɛ chekke ba na ke‑o to de zem maama. 7Moses na tege to, o déem jaane bena bi de finlei mo. O déem ya ta jege dam, ye o yia de dana lanyerane.

8Isarele tiina bam déem ma maŋe Moaba laŋa kam ne ba kwei da fintɔ ba ma keeri Moses lua kam se ba laam ke ba ti.

9Ko nam ná ye Nun bu Josua, Wɛ déem pɛ‑o swa lanyerane, Moses na kuri wonto se o leiri o yuu ne to ŋwaane. Mo kokuri Isarele tiina bam déem sɛ Josua ni ye ba toŋe ba tɔge nia yalo Baŋa Wɛ ya na pɛ Moses to.#Jeelim 27:18

10 Baŋa Wɛ déem ŋɔɔne de Moses jaja mo.#Nwoŋim 33:11; Jeelim 12:8 Wɛ ni-jwoŋinu wodwoŋi daa ta wo zaŋe Isarele tiina bam wone o na nye de Moses 11ye o toŋe wo-kamunnu de wo-kenkagela se ya ta nye de yalo Baŋa Wɛ na toŋe Moses se o toŋe Ejipti Pa-faro wom, de o nakwa, de o teo kom maama yiga ne to dwoŋi. 12Nɔɔn-nɔɔno daa tera o na jege dam konto dwoŋi se o wane o ke wo-kamunnu na jege foone se te maŋe de Moses na toŋe tei Isarele tiina bam maama yibia ne to.

Currently Selected:

Nia Gulim 34: KBG

Highlight

Copy

Compare