Yiga tiina 9

Abimeleka yera taane

1Gideon#9:1 Gideon: Hiburu = Jerubi-Baal bu Abimeleka déem ma vo Sɛkɛm. O nabanna maama déem wo dáane mo. O ma ta de o nu wom chorro tem maama o we, 2“Véi-na á ta Sɛkɛm tiina nakwa bam maama we, ‘Kɔ mo gara? Gideon bia fuserepɛ bam maama ná nii á baŋa ne mo gara, naa nɔɔno dedoa ná nii abam baŋa ne mo gara?’ Yé swei-na we, amo de abam ye jana dedaane yera dedoa mo.”

3O nabanna bam déem ma vo ba jeeri Sɛkɛm nakwa bam dedaane taane dem konto. Ba maama ma boŋe ba ja se ba tɔge o kwaga, kokuri to Abimeleka ye ba choro mo. 4Ba ma le lu-nyenno sabu-dala fuserepɛ Baal-Berifa diga kam ne ba pa‑o. Abimeleka ma kwei sabu kom o ma ŋwe nɔn-yɔɔro tedwonna se ba taa tɔge o kwaga. 5O déem ma vo Ofera teo kom o zo o kwo sɔŋɔ. O ma ja o chorro tem fuserepɛ na ye Gideon bia to o daŋe pelɔrɔ baŋa ne, ye o go ba maama. Gideon jeŋa-bu Jotam ma duri o seigi pa se wonto yerane lu o jeŋa ne. 6Sɛkɛm tiina bam maama dedaane Bɛte-Millo tiina bam laam ma jeeri daane tei-zɔŋɔ kom na wo Sɛkɛm ne to kuri ne ba tiŋi Abimeleka paare.

7Jotam déem ma ni kolo maama na ke to. O ma vo o zege Gerizim peo kom yuu ne, ye o tiini o laare o we:

“Sɛkɛm tiina bam, cheigi-na a taane dento, se Wɛ de wane o cheigi abam taane. 8A sensɔla kampwo! Teeni déem mo beeri wolo na wó di paare de baŋa ne to. De ma ta Olivi tio kom de we, ‘Ta‑n di paare dé baŋa ne.’ 9Olivi tio kom ma leiri-de ko we, ‘Amo nuga kam yeini ka pa se wa dedaane nabiina maama mo na zula lanyerane. A bá yage a nuga kam totoŋa se a ja a nɛ a ba a taa zuula teeni dedwonna dem baŋa ne.’

10Teeni dem daa ma vo kaporo tei ne de we, ‘Ba n ta‑n nii dé baŋa ne.’ 11Kaporo kom de ma leiri-de ko we, ‘Amo bia bam na jege sonno dedaane ywoni tei to, a bá yage-ba se a ja a nɛ a ba a taa zuula teeni dedwonna dem baŋa ne.’

12Teeni dem daa ma vo Vini tio kom tei de ta we, ‘Ba n ta‑n di paare dé baŋa ne.’ 13Vini tio kom ma ta ko we, ‘Amo bia bam na ke sana balo to yeini ba jaane wopwolo mo ba tui wa dedaane nabiina tetare ne. A bá yage konto totoŋa se a daare a ja a nɛ a ba a taa zuula teeni dedwonna dem baŋa ne.’

14Teeni dem maama laam ma ga ga de ta sabare-mangwola de we, ‘Ba n ta‑n di paare dé baŋa ne.’ 15Sabare-mangwola kam déem ma ta teeni dem ka we, ‘Á boboŋa ná seene ya ja se á kuri-ne se a ji á pɛ, nam ba-na á dale amo woro kom ne. Ko nam ná dae konto, amo wó pa se mini nwoŋi sabare-mangwola kam ne ka zwɛ Lebanon Sedare teeni dem maama!’

16Tɔ. Abam na kuri Abimeleka se o ji á pɛ to, á tɔge boboŋ-laaro de chega chwoŋa mo na? Abam ta ke tento se á ma á zuli Gideon dedaane o sɔŋɔ tiina mo na? Abam na ke tei tento to maŋe de o totoŋa yam na ye tei to na? 17Ko ná ye amo kwo Gideon, wonto tiini o fere o tete á ŋwaane dedɛ. O déem toŋe o dole o ŋwea mo o yage, se o jwoŋi abam o yage Midian tiina bam jeŋa ne. 18Abam nam ke bɛ mo á pa amo kwo sɔŋɔ kom zem dɛ dento ne? Á zaŋe á go o bia fuserepɛ mo pelɔrɔ baŋa ne, ye á laam kuri o kaba-kana kam bu Abimeleka se o taa ye Sɛkɛm maama Pɛ, o na ye á choro to ŋwaane. 19Ko nam ná ye boboŋ-laaro de chega baŋa ne mo á tɔge á ke tento á pa Gideon dedaane o sɔŋɔ tiina bam zem dɛ dem dento ne, Wɛ wó pa se á ni ywoni Abimeleka ŋwaane. O de nam wó na wopwolo abam ŋwaane. 20Ko nam daa ná dae konto, se mini nwoŋi Abimeleka yera ne de zwɛ Sɛkɛm tiina nakwa bam dedaane Bɛte-Millo tiina bam kula! Mini ta maa wó nwoŋi Sɛkɛm dedaane Bɛte-Millo tiina bam de yera ne de zwɛ Abimeleka kula!”

21Jotam déem na tage konto o ti to, o ma duri o kɛ. O ma vo o yi Beeri teo ye o zoore dáane, o na kɔre foone de o choro Abimeleka to ŋwaane.

Abimeleka paare dim

22Abimeleka déem ma di paare Isarele ne bena yatɔ. 23Wɛ ma pa se ni-ba-ywoŋa zo Abimeleka dedaane Sɛkɛm tiina nakwa bam tetare ne. Ba déem ma lɔ o kwaga ne. 24Konto maama ke se ba maama mo na ba waarem, de ba na ke keim-lɔŋɔ ba go Gideon bia fuserepɛ bam to. Sɛkɛm tiina bam ya woli Abimeleka se o go-ba mo. 25Sɛkɛm tiina bam na lage se ba chɔge Abimeleka to, ba yeini ba pa se nɔɔna mo vo ba vwɛ peero tem seeni. Wolo maama laam maa ná yeini o tɔge dáane se o kɛ, venverena ma nwoŋi ba vere-ba. Abimeleka déem ma ni kolo maama na jege ko ke to.

26Ebedi bu Gaale déem ma tɔge dedaane o chorro tem o vo o wo Sɛkɛm ne. Sɛkɛm tiina nakwa bam maa jege o chega. 27Dɛ dedwe ba maama ma vo ba kare se ba gwori Vini tio-bia. Ba laam ma kwei-ba ba ma ke sana ba jege ba nyɔa, ye ba daare ba di ywoni. Ba déem ta zo ba jwoni dem diga mo ba ke kuri se ba zuli-de. Ba na wora ba di to, mo ba jege Abimeleka ba ke ba mɔna. 28Ebedi bu Gaale déem ma ta kɔgɔ kom o we, “Wɔ mo ye Abimeleka, se debam Sɛkɛm tiina taa toŋe dé pa‑o? Wonto dae Gideon bu mo na? O kwaga saŋeno dae Zebula mo na? Bɛ mo ye debam Sɛkɛm bia wó taa kɔre Abimeleka? Dé nam jege se dé toŋe dé pa dé kwo Hamora mo. 29Nɔn-kɔgɔ konto maama ya ná zege amo kwaga ne, a ya wó zeili Abimeleka. Amo ya wó ta‑o we, ‘N ná ye baaro, ke n jar-keira bam n ke daane se dé jeeri!’ ”

30Teo kom yuu tu Zebula déem na nigi Gaale taane dem konto to, mo o bane tiini de zaŋe. 31O ma seigi o toŋe nɔɔna Abimeleka tei ne#9:31 naa O ma toŋe nɔɔna Abimeleka tei Aruma ne se ba ta we, “Ebedi bu Gaale dedaane o chorro mo tu ba zoore ywo-seeni. Ba nam soge teo kom maama mo pa se ba lɔ nmo kwaga ne. 32Konto to, nmo dedaane n nɔɔna bam maama kwaane-na á ba tete ne á seigi teo kom pwola kam ne. 33Tega maa ná jege ka poora, se á zaŋe á pɔpɔ á zo teo kom wone. Gaale dedaane o kɔgɔ kom laam maa ná nwoŋi se ba jeeri abam, á wó wane á ke-ba á na lage tei to.”

34Abimeleka dedaane o jar-keira bam maama déem ma nwoŋi ba vo ba vwɛ Sɛkɛm pwola kam ne. Ba nam ya pɔɔre ba tete kuni bena mo. 35Tega na poore ye ba zaŋe mɛ ba ya na vwɛ to, dedaane Gaale nwoŋi o zege teo kom manchwo-peena ni ne mo. 36Gaale déem ma na-ba ye o ta Zebula o we, “Nii nɔɔna na zege peero tem seeni ba siseiri ba maa tu ywo-seeni!” Zebula de ma leiri‑o o we, “Peero tem lunlunnu mo nye de nabiina nmo yibia ne.”

37Gaale daa ma ta o we, “Ba seene ba ye nɔɔna mo, ye ba zege tega kam tetare seeni ba beena! Ba kɔgɔ dedoa de ma nwoŋi vora bam tei-zɔŋɔ kom seeni ba beena.” 38Zebula ma leiri o we, “Nmo ni-wɛɛle dem vei yeim mo? Nmo ya taga n su n ni mo we, Abimeleka ye wɔ mo se debam taa toŋe dé pa‑o? Nɔɔna banto mo n ya‑n gwooni to, laam nam nwoŋi n jeeri-ba de jara se dé nii!”

39Gaale ma da Sɛkɛm tiina bam yiga pa se ba nwoŋi ba kwaare Abimeleka dedaane jara. 40Abimeleka déem ma pare Gaale de o nɔɔna bam pa se ba duri. Nɔɔna dedɛ déem mo nɛ zonne se ko vo ko kwaare ba teo kom manchwo-peena yam ni ne. 41Abimeleka déem ma maŋe Aruma ne o zoora. Zebula de ma zeili Gaale dedaane o chorro tem pa se ba nwoŋi ba daare Sɛkɛm teo kom.

42Tega na poore to, Sɛkɛm tiina bam nwoŋi ba vo pwola kam ne mo. Abimeleka ma lɔre ko ni ne. 43O de déem ma ke o jar-keira bam daane, ye o pɔɔre-ba kuni betɔ. O ta ma vo o pa ba vwɛ pwola kam ne ye o cheigi Sɛkɛm tiina bam. Ba na nwoŋi teo kom ni ne ye o na-ba to, mo o zaŋe o jeeri-ba de jara. 44Abimeleka dedaane o kɔgɔ kom popɔra dedoa mo vei ba che teo kom manchwo-peene dem ba zega. Popɔre selei na daare o jar-keira bam wone to de laam ma duri ba vo pwola kam ne ba jeeri Sɛkɛm tiina bam, ye ba go-ba. 45Jara yam ke dɛ dem konto maama ne mo. Abimeleka ma kwaane o di teo kom. O ma vaare-ko o de tega ne, ye o daare o go ko nɔn-bia bam maama. O laam ma kwei yɛ o zezage teo kom tega kam baŋa jei maama ne.

46Teo kom nakwa balo na wo Sɛkɛm di-dedɔrɔ kom wone to déem ma ni ko na ke tei to. Ba ma duri ba zo El-Berifa di-yuu kom wone se ba seigi. 47Abimeleka ma lɔre ba na seigi mɛ to. 48O ma tɔge dedaane o nɔɔna bam maama o vo Zalemon peo kom yuu ne. O ma kwei dwooru o gwoni dɛ o daŋe o bakale baŋa ne, ye o ta o nɔɔna bam maama o we, “Kolo maama á na nɛ amo na ke to, se á de ke konto.” 49Ba maama ma gwoni tio nɛ ba zeŋe ba tɔge Abimeleka kwaga. Ba ma ja-te ba vo di-yuu kom teiŋa ne ba tigisi te maama ba yeiri ko yera ne. Ba laam ma zwɛ diga kam, pa se nɔɔna balo maama na wo Sɛkɛm di-dedɔrɔ kom wone to te nyɔ! Ba yi nɔɔna moro, baara dedaane kaana maama.

50Abimeleka déem ma vo o kaare Tebeza maama o pu, se o wane teo kom konto o di. 51Teo kom nam ya jege di-dedɔrɔ kolo na dana to. Nɔɔna bam maama, baara dedaane kaana, ko woli de teo kom nakwa bam maama ma duri ba vo ba zo diga kam. Ba ma fɔge ba pe ka ni dem ye ba daare ba di nayuu kom baŋa. 52Abimeleka ma vo o yi di-dedɔrɔ kom se o chɔge-ko. O na yi ko ni dem seeni se o zwɛ-ko to, 53kaane wodwoŋi ma zege nayuu kom ne o dole namin-kamunu o de o yuu ne o lɔ o yu-kwoli-champoa kam.

54Abimeleka ma bwoŋi nɔn-doŋo wolo na zei o jara-keim zela yam to o ta‑o o we, “Le n se-zɔɔ kom n ma n go-ne, se a ba lage se ba taa tɛ amo taane we, Kaane mo go-ne.” Nɔɔno wom de ma seene o zɔ‑o o go. 55Isarele tiina bam na nɛ we ba Pɛ Abimeleka tege to, ba maama ma jwoori ba vo ba sam.

56Wɛ déem nam tɔge chwoŋa kanto mo o ŋwe jene Abimeleka yera ne dedaane lwarem delo o na ke o kwo wom to. Kokuri to, o go o chorro fuserepɛ mo. 57Wɛ ta ma pa se Sɛkɛm tiina bam na ba totoŋ-lwanno tem ŋweero. Ko déem ke ko tɔge sɔɔlem delo maama Gideon bu Jotam na tage o pa-ba to mo.

Currently Selected:

Yiga tiina 9: KBG

Highlight

Copy

Compare