Yiga tiina 4
4
Debora yera taane
1Ehuda toone kwaga ne, mo Isarele tiina bam daa tiini ba toŋe lwarem ba chɔge Baŋa Wɛ yiga. 2Ba wɛleere dem konto ŋwaane mo Baŋa Wɛ pɛ chwoŋa se Kanaan teo Pɛ Jabin di-ba. Wonto déem wo Hazora teo ne mo ye o di o paare dem. Sisera mo wo o jar-keira bam yiga ne, ye o déem zoore Harosɛf-Hagoyim ne. 3Jabin déem jege sisei-torokooro bia nogo mo se o ma ke jara. Torokooro tem maa ye telo ba na mɛ luuru ba ke-te. O maa tiini o jege puseŋa o ke Isarele tiina bam yera ne bena finlei. Ba ma keeri ba jare Baŋa Wɛ se o jwoŋi-ba o yage.
4Wɛ sampwora kadwoŋi déem wora o yere mo Debora. O maa ye Lapidofa kaane. Wonto mo nii Isarele tiina bam baŋa ne da yam konto ne. 5O déem yeini o jei konkwara kadwoŋi kuri ne mo. Isarele tiina bam maama maa yeini ba tui o tei se o nii ba taane baŋa ne o pa-ba. Jei sem déem wo Efrayim zwonnu tem laŋa ne mo, ko maŋe de Rama de Bɛtel tetare ne. 6Dɛ dedwe mo o déem toŋe o bwoŋi Abinowam bu Baraki. Wonto nwoŋi Kedesa ne mo, Nafitali dwi dem wone. O ma ta‑o o we, “Isarele tiina Baŋa Wɛ wom pɛ nmo ni dento mo:
‘Véi n kuri nɔɔna morro fuga se ba nwoŋi Nafitali dedaane Zebulun dwia yam wone. Nmo laam ma‑n wó da ba yiga se á vo á jeeri Tabora Peo kom ne. 7Amo wó soge Jabin jar-keira bam yiga tu Sisera se o nwoŋi o vo o yi Kison buga kam o jeeri abam de jara. O wó taa jege o jara-keim torokooro tem dedaane o jar-keira bam maama. Amo nam wó ke-ba n jeŋa ne pa se n di-ba.’ ”#Lei 83:9
8Baraki ma leiri Debora o we, “Nmo ná sɛ se n da debam kwaga se dé vo, amo wó vo. Ko nam ná dae konto, amo de bá vo.”
9O ma leiri Baraki o we, “Amo wó tɔge‑m se dé vo. Nmo nam na jaane boboŋe delo to, n bá‑n na yere de ŋwaane, kokuri Baŋa Wɛ lage o kwei Sisera o ke kaane jeŋa ne mo se o go‑o.”
Debora déem ma zaŋe o tɔge Baraki ye ba vo Kedesa. 10Baraki ma bwoŋi jar-keira se ba nwoŋi Nafitali dedaane Zebulun dwia yam wone ba ba ba woli‑o. Bembɛ morro fuga ma nwoŋi ba da o kwaga. Debora de ma da o vo.
11Keni tu dedoa déem wora o yere mo Hebera. Wonto déem pwɛ o tete mo Keni tiina badwonna bam wone. Banto ye Hobabi dwi dem mo. Hobabi maa ye Moses dɔ.#4:11 dɔ naa tembaaro Hebera ya vei o chwi o vwei se ko maŋe dedaane tei-zɔŋɔ kom na wo Zaananim ne to. Ko déem bwola de Kedesa mo.
12Sisera déem ma ni we Abinowam bu Baraki vei Tabora Peo kom ne. 13O ma pa se o torokooro bia nogo dedaane o jar-keira bam maama zege Harosɛf-Hagoyim ne ba vo ba jeeri Kison buga kam ni ne. Torokooro tem maa ye telo ba na mɛ luuru ba ke-te to.
14Debora déem laam ma ta Baraki o we, “Zaŋe se dé kɛ! Baŋa Wɛ zem kwei Sisera mo o ke n jeŋa ne. Nam véi n jeeri‑o de jara, se Baŋa Wɛ mo lage o da n yiga.”
Baraki déem ma seene o ja o nɔɔna morro fuga pa se ba zege Tabora Peo kom yuu ne ba tu tega. 15Baraki na nwoŋi se o jeeri-ba to, mo Baŋa Wɛ pɛ se vuvuga to Sisera de o jar-keira bam tetare ne, dedaane ba torokooro tem maama. Sisera déem ma zege o toroko kom wone o faŋe o chu tega ne, ye o laam duri se o lu. 16Baraki ma pare ba jar-keira bam dedaane ba torokooro tem taa se ko vo ko yi Harosɛf-Hagoyim. O de o nɔɔna bam ma go Sisera jar-keira bam maama. Dedoa tete déem wo daare.
17Sisera déem ma duri de o napera o vo se o zo Keni tu Hebera kaane Jayeli vwei wone. O vei da kolo ŋwaane, Jabin de Hebera diga kam ni ywona daane mo.
18Jayeli déem ma nwoŋi se o jeeri Sisera, ye o ta‑o o we, “Amo tu, duri n ba n zo amo vwei dem ne. Yé ta‑n kɔre foone.” O déem ma duri o zo da, ye kaane wom de seigi‑o, o daare o kwei gwaaro o ma o kwoli‑o. 19Sisera ma ta de Jayeli o we, “Ja! Pa-ne na fee se a nyɔ, kokuri, na-nyɔm mo lage de go-ne.” O déem ma kwei loa de ka wo nayela o pa‑o se o nyɔ, ye o jwoori o kwoli‑o. 20Sisera ta ma ta‑o o we, “Ta‑n zege vwei dem ni ne n nia, se nɔɔno wolo ná tu o bwei we, nɔɔno wo ywo-seeni na, se n ta we, ‘Aawo’ ”
21Sisera déem na tiini o bugi to ŋwaane, o yɔɔre o dɔ mo o beiri. Jayeli déem ma kwei o vwei dem paare dedwe dedaane bagwori, o laam vwɛ o yi o yera o go‑o o tiŋi da. O déem page paare dem mo o da nɔɔno wom zwa-kwaale ne o ja tega ne.
22Baraki déem ma pare Sisera o yi vwei dem. Jayeli na nɛ‑o to, o ma jeeri‑o, ye o ta o we, “Ba n nii nɔɔno wolo n na kare n beeri to.” Baraki ma zo de Sisera tigi da, ye paare dem tɔge o zwa-kwaale ne de ja tega.
23Dɛ dem konto ne, Baŋa Wɛ ma pa se Kanaan teo Pɛ Jabin daa ba jege dam Isarele tiina bam baŋa ne. 24Isarele tiina bam déem ma tiini ba na dam, ye ba jege Jabin ba fe taa, se ko yi maŋa kalo ba na chɔge‑o ba ti to.
Currently Selected:
Yiga tiina 4: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)