Yiga tiina 3
3
Teene delo ta na daare se ba di to
1Isarele tiina badaara déem wo me de jara yalo na yeini ya ke Kanaan tega kam ne to. Mo kokuri Baŋa Wɛ pɛ se tega kam teene dedwonna daare, se o yeini o kwei-de o faŋe Isarele tiina bam o nia. 2Baŋa Wɛ déem lage se Isarele tiina bam maama mo me dedaane jara-keim, se ba kwaga kam na yeiri jara-keim to de taa yei ya laŋa. 3Balo na daare tega kam ne to maa ye: Filisi tiina de ba pwa banu bam, de Kanaan tiina bam maama, ko ta woli de Sidon tiina bam dedaane Hivi tiina balo na zoore Lebanon peero tem seeni, ko na zege Baal-Heremon Peo kom ne se ko yi Lebo-Hamafa seeni to. 4Teene dem konto ta daare se Baŋa Wɛ tɔge de baŋa ne o faŋe Isarele tiina bam o nii, ba wó tɔge o nia yam nenɛɛne Moses na maŋe o bere ba nabaara bam se ba taa ke tei to, naa ba bá tɔge.
5Konto to, Isarele tiina bam déem lɛɛre ba zoore dedaane Kanaan tiina bam, de Hiti tiina bam, de Amori tiina bam, de Pɛrizi tiina bam, de Hivi tiina bam dedaane Jebusi tiina bam mo. 6Ba na gwaane daane konto to, Isarele tiina bam déem ma sɛ se ba de teene dem konto tiina di da-bukwa. Ko déem dɛ chwoŋa kam konto mo ye ba bobo se ba taa kaane teene dem jwona yam.#Nwoŋim 34:13-17
Ofineli yera taane
7Isarele tiina bam déem tiini ba toŋe lwarem ba chɔge Baŋa Wɛ yiga. Ba swei ba Baŋa Wɛ wom swia, ye ba daare ba zuli Baal dedaane Asera jwona yam. 8Baŋa Wɛ bane déem ma tiini de zaŋe dedaane-ba. O ma pa pwola pa se Mesopotamia teo Pɛ Kusan Risatayim di-ba. Isarele tiina bam déem ma toŋe ba pa‑o bena nana. 9Ba ma kaase ba jare Baŋa Wɛ, pa se o le jwoŋinu o pa-ba. Ko nam ye Kenazi bu Ofineli mo. Kenazi de déem maa ye Kaleb nyaane. O ma seene o jwoŋi Isarele tiina bam o yage.#Josua 15:17 10Baŋa Wɛ jworo ma chu Ofineli baŋa ne de dam, pa se o ji Isarele tiina bam yiga tu. O déem ma jeeri Pɛ Kusan Risatayim de jara, ye Baŋa Wɛ kwei pɛ wom o ke o jeŋa ne, pa se o di‑o. 11Isarele tiina bam déem ma sii de jara se ko yi bena finna, ye Ofineli laam te.
Ehuda yera taane
12Isarele tiina bam déem daa ma tiini ba toŋe lwarem ba chɔge Baŋa Wɛ yiga. O ma pa pwola pa se Moaba teo Pɛ Egolon di-ba. 13Egolon ma sɔ ni dedaane Amon tiina bam de Amaleki tiina bam, ye ba vo ba kwaare jara de Isarele tiina bam. O déem ma vere Jeriko teo kom o tei. 14Isarele tiina bam ma toŋe ba pa Pɛ Egolon bena fuga-nana.
15Konto kwaga ne, Isarele tiina bam déem ma kaase ba jare Baŋa Wɛ, pa se o le jwoŋinu o pa-ba. Ko déem nam ye Gera bu Ehuda mo. Gera ye Benjamin dwi tu mo. Ehuda maa ye nɔn-gwia. Isarele tiina bam déem ma toŋe‑o se o ja pɛɛra o vo o pa Moaba teo Pɛ Egolon. 16Ehuda déem ma pa ba ke se-zɔɔ na jege nia yalei ba pa‑o. Ko dedɔrem maŋe dedaane jatwogo maŋem mo. O ma kuni-ko o yage o jazem chwei seeni, ye o daare o ma o gwaaro tem o kwoli-ko. 17Pɛ Egolon nam ya tiini o ye nɔn-zɔŋɔ mo. Ehuda ma yi o tei ye o kwei pɛɛra yam o pa‑o. 18O na pɛ pɛ wom o pɛɛra yam o ti to, mo o toŋe nɔɔna balo na dɛ ded‑o ba zeŋe-ya to se ba jwoori sɔŋɔ. 19Ehuda na yi mɛ ba na sare kandwa Giligal ne to, mo o tete zege dáane o jwoori Egolon tei ne ye o we, “Pɛ, amo jege taane mo se a seigi a ta a bere‑m.”
Pɛ wom déem ma pa o tontoŋena bam maama ni we, ba yage-ba ba yerane. Nɔɔno maama ma nwoŋi pwooni.
20Pɛ wom déem nam ya jei o yerane mo di-balaŋa na wo o sɔŋɔ kom nayuu ne to, ko na zura to ŋwaane. Ehuda ma yi o yera ye o ta o we, “Wɛ mo pɛ-ne kwora se a ta a bere‑m.” Pɛ wom ma zaŋe o zege wɛɛne. 21Ehuda ma kwei o jagwia kam o le se-zɔɔ kom na wo o jazem chwei ne to. O laam ma moore ko maama Egolon puga ne. 22Se-zɔɔ kom maama déem maŋe o puga kam ne mo de ko jeŋa kam maama ye ko bere ko ta ko nwoŋi o kwaga ne. Pɛ wom yera lara ma kwoli-ko. Ehuda ma yage-ko da. 23O ma pe nayuu diga kam ni o yage‑o da, ye o daare o nwoŋi o maa kɛa.
24O déem na kɛ o daare to, Pɛ wom tontoŋena ma di nayuu kom ye ba na we diga kam nia pe mo. Ba déem ma boŋe we o ga wora o zege nɛ mo ka wone. 25Ba na cheigi taa ko ba ko kɛ maŋa ye o ta wo pore diga kam to, mo ba beeri bwor-bu ba ma pore. Ba ma na we ba tu wom tege mo o tigi tega ne.
26Ba déem na cheigi taa se Pɛ wom pore to, dedaane Ehuda maŋe o duri o lu o gaale ba na sare kandwa yam mɛ to, o kɛ o yi Seyira teo kom. 27O na yi Efrayim zwonnu laŋa kam ne to mo o wugi nabɔnɔ se Isarele tiina bam maama nwoŋi se ba vo ba ke jara. O ma tɔge ba yiga o ja-ba o siseiri o tu zwonnu tem ne. 28O ma pa-ba ni we, “Ta‑á tɔge-na amo. Kokuri, Baŋa Wɛ mo kwei á dona Moaba tiina bam o ke á jeŋa ne, se á di-ba.” Nɔɔna bam maama ma tɔge Ehuda kwaga. Ba ma vo ba yi jei selo Moaba tiina na yeini ba tɔge-da ba bɛ Jɔdan buga kam to. Ba ma cheiŋi chwoŋa kam se nɔɔn-nɔɔno yé tɔge-da o kɛ. 29Dɛ dem konto ne, ba go Moaba tiina balo na tiini ba yei jara laŋa chekke to, ko maŋe de nɔɔna morro fuga mo, ye ba wolowolo wo lugi. 30Isarele tiina bam ma di Moaba tiina bam pa se ba toŋe ba pa-ba. Ba déem ma sii de jara se ko yi bena funɔnɔ.
Samgare yera taane
31Jwoŋinu wolo déem na saŋe o jwoŋi Isarele tiina bam o yage to mo ye Samgare. O déem ye Anafa bu mo. O ma kwei zaangwoli o ma go Filisi tiina bia yaredo.
Currently Selected:
Yiga tiina 3: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
