Yiga tiina 2

Baŋa Wɛ Maleka kam

1Maŋa dedoa mo Baŋa Wɛ maleka kam zege Giligal ne ka jeeri Bokim ne. Ka déem ma kwei Wɛ kwora kanto ka pa Isarele tiina bam:

“Amo mo jaane abam a nwoŋi Ejipti ne a ba ywo-seeni, pa se á zo tega kalo a na gwoni ni dedaane á nabaara bam se a pa-ba to, ye a we, ‘A bere a bá nwoŋi ni-sɛɛm delo a na ke de abam to kwaga ne. 2Ko nam dae se abam dedaane tega kam konto nɔɔna ke ni-sɛɛm daane. Abam jege se á ja ba jwona kaanem bimbina yam á chɔge á yage mo.’#Nwoŋim 34:12-13

Abam nam ve ni dem konto a na pɛ abam to. Bɛŋwaane mo ye á ke konto? 3Konto ŋwaane, amo daa bá zeili teene dem tiina a yage se a daare ba tega kam a pa abam se á ta‑á tei. Ba wó taa ye á dona mo ye ba daane abam dedɛ. Ba jwona yam de maa wó ja abam ne kalanchorro tei.”

4Isarele tiina bam na nigi maleka kam taane dem to, mo ba maama mage ni ye ba keera. 5Ba ma bwoŋi jei sem konto yere we Bokim.#2:5 Bokim kuri mo yeBalo na keeri to. Ba déem ma ke kaanem dáane ba pa Baŋa Wɛ.

Josua toone

6Josua déem ta na ŋwe to, o ma pa Isarele tiina bam chwoŋa se ba viiri. Nɔɔno maama ma vo se kotu jwoŋi o tega popɔra o taa tei. 7Josua ŋwea maŋa kam maama ne, Isarele tiina bam déem toŋe ba tɔge Baŋa Wɛ boboŋa mo. Ba nakwa badwonna de déem dɛ ba na Baŋa Wɛ na ke wo-kenkagela yalo o pa Isarele dwi tiina nam to. Josua na tega ye banto ta ŋwe maŋa kalo to ne, Isarele tiina bam ta tɔge Baŋa Wɛ de chega mo.

8 Baŋa Wɛ tontoŋeno Josua na ye Nun bu to déem nɛ bena bi dedaane fuga mo ye o laam te. 9Ba déem ma kwei‑o ba suli o tete tega kam ba na pɔɔre ba pa‑o to ne. Ka wo Timinaf-Heresa ne mo, Efrayim zwonnu laŋa kam ne. Ka déem maŋe dedaane Gaasa Peo kom baŋa seeni mo.

10Banto dwi dem maama ma te ba ti. Dwi dedwoŋi déem daa ma zaŋe Isarele wone. Banto yeiri Baŋa Wɛ wom ye ba wo lɔre kolo de kolo maama o na ke o pa Isarele dwi tiina bam to. 11Isarele tiina bam déem ma toŋe lwarem ba chɔge Baŋa Wɛ yiga, ye ba bobo se ba taa kaane Baal jwona yam. 12Ba déem nwoŋi Baŋa Wɛ wom na ye ba nabaara Wɛ ye o ja-ba o ja o nwoŋi Ejipti ne to kwaga ne mo, ye ba daare ba sɛ nɔn-dwoa balo na gilimi-ba to jwona se ba taa kaana. Ba kikia yam konto déem ma pa se Baŋa Wɛ bane zaŋe, 13ba na ve wonto ye ba daare ba tɔge Baal dedaane Asetare jwona yam to ŋwaane. 14Baŋa Wɛ déem tɔge o ban-zɔŋɔ kom ŋwaane mo o kwei Isarele tiina bam o yage venverena jeŋa ne, se ba bɛɛse-ba, ye o daare o ke-ba ba dona balo na gilimi-ba to jeŋa ne, pa se ba ware ba dona bam se ba jeeri de jara.#Nia Gulim 31:16-17 15Isarele tiina bam déem ná yeini ba nwoŋi se ba ke jara, Baŋa Wɛ wó che-ba mo, nenɛɛne o na maŋe o lwoori yiga o kaane-ba we, o wó ke tei to. Isarele tiina bam maa tiini ba wo cham wone.

16Ko kwaga ne Baŋa Wɛ déem ta yeini o le jwoŋina mo o pa-ba. Jwoŋina bam laam mo daa yeini ba jwoŋi-ba ba yage venverena bam jeŋa ne. 17Konto maama wó ke, ye Isarele tiina bam ta lage jwona mo se ba taa kaana. Ba ba nege ba jwoŋina balo na tei-ba to. Ba maa yage chwei selo ba kwoa déem na tɔge to. Ba maa yeini ba yage Wɛ chwoŋa lela ye ba daa ba sɛ Baŋa Wɛ nia yam. 18Isarele tiina bam dona ná yeini ba pa se ko zo ba yera, Baŋa Wɛ déem yeini o ŋwane o pa-ba mo ye o toŋe jwoŋinu ba ŋwaane. Wɛ ma yeini o woli kotu pa se o jwoŋi-ba ba dona jeŋa ne o yage. Jwoŋinu wom ná wo tege, ko yeini ko zura mo ko pa Isarele tiina bam. 19Ko daare, jwoŋinu wom ná yɔɔre o te, ba daa yeini ba ywori mo ba to ba chwo-dwoi sem wone. Ba daa yeini ba ke lwarem mo ba dwoni ba kwoa bam kikia yam. Ba maa yeini ba jwoori ba zo jwo-kaanem wone, ye ba pa se ba wo dana de lwarem keim.

20 Baŋa Wɛ bane laam ma tiini de zaŋe de Isarele tiina bam ye o we:

“Nɔɔna banto yɔɔre ba chɔge ni-sɛɛm delo amo dedaane ba nabaara na ke daane to mo. Ba ta ma ve se ba sɛ amo ni dem. 21Konto ŋwaane amo daa bá zeili teene delo Josua na tege o daare ye ba wo di-de to. 22Amo wó yage se teene dem konto taa wora mo se a taa ma a faŋe Isarele tiina bam a nia, ba wó sɛ ba tɔge Baŋa Wɛ nenɛɛne ba kwoa bam na tɔge tei to, naa ba bá tɔge.”

23Konto ŋwaane mo Josua déem wo di teene dem konto maama. Josua toone dem kwaga ne de, Isarele tiina bam ta wo wane-de ba di lela, pa se teene dem tiina bam ta daare tega kam baŋa ne.

Currently Selected:

Yiga tiina 2: KBG

Highlight

Copy

Compare