Yiga tiina 20

Isarele tiina kwaare jara de Benjamin tiina

1Isarele dwi tiina bam maama déem nwoŋi ba ke daane mo se ba kwaare jara. Ba ma vo Mizipa ba jeeri Baŋa Wɛ yiga ne.#1 Samuwel 7:5 Ko na zege Dan laŋa kam seeni se ko yi Beeriseba, ko woli de Gilead laŋa kam to mo ba maama nwoŋi.#20:1 Nii map nyenyero telo na wo tɔnɔ kom kwaga kam seeni to. 2Isarele nakwa bam ma zege ba dwia yam maama ne ba da ba jeeri de Wɛ nɔɔna bam. Ba kɔgɔ kom maa ye jar-keira morro bia yana (400,000) ye ba zei se-zɔɔro. 3Benjamin dwi dem ma ni we Isarele dwia yadwonna yam maama mo jeeri Mizipa wone. Isarele tiina bam maama ma bwei ba we, “Ko dɛ chwoŋa kɔ mo ye keim-lɔŋɔ konto toŋe?” 4Levi dwi tu wolo kaane ba na go to ma tole o we:

“Amo dedaane a ka-bia kam mo beeri de vo de yi Benjamin teo Gibea, ye dé boŋe se dé maŋe da dé peini se tega poore. 5Tete ne mo teo kom nɔɔna bam dɛ amo ŋwaane ba ba ba kaare sɔŋɔ kolo wone dé na tigi da to ba pu. Ba boboŋe dem mo ya ye se ba go amo. Ba laam ma zi a ka-bia kam ba lage pa se o te. 6A na maane we nɔɔna banto tiini ba toŋe chave-totoŋe Isarele teo kom ne to ŋwaane mo a gwoni a ka-bia kam yera yam, ye a laam pɔɔre-ya yera yera a toŋe a pa Isarele dwi maama. 7Konto to, abam maama na ye Isarele dwi tiina to, laam ja-na taane dem se dé lɔre kolo dé na wó ke to.”

8Isarele tiina bam maama ma ta dedaane kwora dedoa ba we, “Debam bá jwoori dé sam. Debam wone dedoa tete bá jwoori sɔŋɔ. 9Dé na wó ke tei to mo tento: Dé wó ta jɔrɔ mo se dé lɔre balo na wó da yiga ba vo se ba jeeri Gibea tiina bam de jara to. 10Isarele dwi dem maama wone mo, dé wó kuri nɔɔna fuga se ba nwoŋi nɔɔna bi maama wone, se nɔɔna bi de nwoŋi nɔɔna moro maama wone, ye nɔɔna moro nwoŋi nɔɔna morro fuga maama wone. Banto totoŋe wó taa ye se ba beeri wodiu mo ba pa jar-keira bam. Konto wó pa se jar-keira bam ná yi Gibea, ba wó wane ba yiri ba jene de nɔn-balwaaro tem lwarem kikia yam ba na ke Isarele teo kom ne to.”

11Nɔɔna bam maama déem ma ke ni dedoa se ba jeeri Gibea tiina bam se ba waare-ba. 12Isarele dwi tiina bam maama ma toŋe kwora ba pa Benjamin dwi tiina na wo mɛ maama to we, “Bɛŋwaane mo ye lɛɛro tento ke abam tetare ne? 13Ko dae se dé sɛ lwarem totoŋe dento dwoŋi Isarele ne. Konto to, pa-na se Gibea teo nɔn-wo-korro tem na ke totoŋe dem konto to nwoŋi pwooni se dé go-ba.”

Benjamin tiina bam maa wo sɛ ba cheigi ba dwonna Isarele tiina bam kwora kam. 14Ba ma zege ba teene dem maama wone ba nwoŋi. Ba ta ma vo ba jeeri Gibea ne se ba kwaare jara dedaane Isarele tiina badaara bam maama. 15Dɛ dem konto ne Benjamin tiina bam ma la jar-keira morro finlei-teredo ba ke daane. Nɔɔno maama ma zei o se-zɔɔ. Banto ma vo ba woli de nɔɔna bia yarepɛ balo na maŋe ba wo Gibea ne ye ba yei jara-keim laŋa to. 16Banto maama wone nɔɔna bia yarepɛ déem ye nɔn-gwei mo. Ba maama ná dole napana ba jeeri yu-yua de, ba bá ga-ka. 17Se ko ná ye Isarele dwi tiina balo maama na daare to, ba déem lage jar-keira morro bia yana mo ba ke daane. Ba maama maa yei jara keim chekke.

18Isarele tiina bam ma vo Bɛtel ba jeeri wara-jei sem ne. Ba ma bwei Wɛ ba we, “Debam dwi dɔ mo wó tɔge yiga ba jeeri Benjamin tiina bam?” Baŋa Wɛ ma leiri o we, “Pa-na se Judah dwi tiina bam da yiga ba vo ba jeeri-ba.”

19Tega na poore to, Isarele tiina bam ma gɔ ba vwoa yam ba vo Gibea ba chwi pa se ya bwola dedaane teo kom. 20Ba ta ma nwoŋi ba vwoa yam ne ba vo ba zege teo kom yiga ne se ba jeeri Benjamin tiina bam dedaane jara. 21Dɛ dem konto ne Benjamin tiina bam de ma nwoŋi teo kom ne ba jeeri Isarele tiina jar-keira bam. Ba ma go Isarele tiina bam nɔɔna morro finlei-telei (22,000). 22-23Isarele dwia yadwonna yam ma ke baare da kuri ne. Ba ta ma vo wara-jei sem ne ye ba keeri taa ba jare Baŋa Wɛ, se ko yi dedaan-ni maŋa. Ba maa we, “Dé daa ta véi dé jeeri dé chorro Benjamin tiina bam dedaane jara na?” Baŋa Wɛ ma leiri o we, “Véi-na á jeeri-ba de jara.” Ba ma jwoori ba vo ba fɔge ba zege nenɛɛne boboa dɛ dem ne ba na maŋe ba ke tei to.

24Da yalei dɛ dem ne, ba daa ma vo se ba jeeri Benjamin tiina bam dedaane jara. 25Dɛ dem konto ne, Benjamin tiina bam na nwoŋi Gibea teo kom ba kwaare jara de-ba. Ba daa ma go nɔɔna morro fuga-nana na yei jara keim chekke to.

26Isarele tiina bam maama ma jwoori ba vo Bɛtel ba keeri ba jare Baŋa Wɛ. Ba ya vɔge ni mo se ko yi dedaan-ni maŋa, ye ba daare ba kwei zwɛɛm pɛɛra dedaane yazura pɛɛra ba kaane ba pa Baŋa Wɛ. 27-28Kanto maŋa ne, dedaane Wɛ ni-gwonim dakaa kam wo Bɛtel ne mo. Finehase na ye Eleaza bu, ye o kwo-nakwe ye Aron to mo toŋe dakaa kam totoŋa o ma zuli Wɛ. Isarele tiina bam ma bwei Baŋa Wɛ ba we, “Dé véi se dé jeeri dé chorro Benjamin tiina bam de jara, naa dé yage ba yera?” Baŋa Wɛ ma leiri-ba o we, “Véi-na, se amo jwa wó pa se á di-ba.”

29Isarele tiina bam ma jwoori Gibea teo, ye ba pa se nɔɔna badwonna vwɛ ba kaare teo kom maama. 30Da yatɔ dɛ dem ne, ba daa ta ma vo ba jeeri Benjamin tiina bam de jara. Ba vei ba zege mɛ ba na maŋe ba zege kuni belei maama wone to mo. 31Benjamin tiina bam maama ma nwoŋi ba daare ba teo kom se ba jeeri-ba. Ba ta ma pa se ko zo Isarele tiina bam yera nenɛɛne boboa kam ne ba na ke tei to. Teo kom pwola kam ne mo ba go Isarele tiina bam nɔɔna fintɔ balo na duri ba tɔge chwei selo na vei Bɛtel dedaane Gibea to. 32Benjamin tiina bam maa tɛ daane we, “Debam daa di tega ba yera ne mo nenɛɛne boboa kam ko na ke tei to.” Se ko ná ye Isarele tiina bam, banto maa we, “Pa-na se dé tutwoni nenɛɛne dé wora dé duri mo se dé lu, se dé wane dé vaŋe-ba dé ja dé nwoŋi teo kom ne dé yi chwo-fare sem seeni.”

33Isarele tiina bam ma tutwoni ba vo ba jwoori ba tigisi Baal-Tamara ne ba zega. Isarele tiina balo ya na vwɛ ba kaare Gibea teo kom se ko maŋe dedaane ko wɛ-zoore seeni to ma pi ba nwoŋi. 34Isarele jar-keira bam wone, ba ya kuri nɔɔna morro fuga balo na tiini ba yei jara-keim chekke to mo. Banto ma vo ba yi Gibea ba jeeri Benjamin tiina bam de baare. Jara yam ma ba ya chɛ dedɛ. Benjamin tiina bam maa wo lɔre we ba momwɛ tiim maŋa bwola. 35Dɛ dem konto ne, Baŋa Wɛ pɛ se Isarele dwia yadwonna yam mo di Benjamin dwi tiina bam. Ba déem go Benjamin jar-keira morro finlei-tenu de bi (25,100) mo. 36Benjamin tiina bam ma maane we Isarele tiina bam di-ba.

Isarele tiina bam di Benjamin tiina bam

Isarele tiina bam nam ya tutwoni mo Benjamin tiina bam yiga ne ba jwoori kwaga, kokuri to, ba teena yam daŋe balo ba na pɛ se ba vwɛ ba kaare Gibea teo kom to baŋa ne mo. 37Nɔɔna balo ya na vwɛ to yɔɔre ba vɔɔre ba zaŋe mo ba duri ba zo Gibea teo kom ne, ye ba laam jage teo kom jei maama ne ba go wolo maama na zoore ko wone to. 38Isarele jar-keira balo na daare to nam ya ke ni-sɛɛm de balo na vwɛ to mo de memaŋe dento, we ba ná zo da se ba zwɛ-ko se nyoa zaŋe wɛɛne guli-guli. 39Konto maa ná kea, Isarele tiina bam wó pipiri se ba jeeri Benjamin tiina bam de jara yam. Kanto maŋa kam ne, dedaane Benjamin tiina bam ya go Isarele tiina bam nɔɔna fintɔ mo. Ba maa tɛ daane ba we, “Ɛhɛɛ! Dé daa wora dé di Isarele tiina bam nenɛɛne boboa kam ne ko na ke tei to.”

40Nyoa déem ma bobo se ka nwoŋi teo kom ne ka zaŋa guli guli ka maa diini wɛ. Benjamin tiina bam ma pipiri ba na we nyoa mo zaŋe ba teo kom maama wone. 41Isarele tiina bam ma pipiri ba de jeeri-ba de jara yam. Benjamin tiina bam boboŋa ma jei, kokuri ba lɔre we chɔgem mo yi-ba. 42Ba ma kwaane se ba duri ba lu Isarele tiina bam, ye ba kwei kagoa chwoŋa kam ba dura. Isarele tiina bam maa wo pɛ-ba chwoŋa se ba lu. Ba badwonna ma nwoŋi ba teene dem ne ba ke Benjamin tiina bam ba tetare ne, ye ba laam go-ba. 43Ba na ke-ba tetare ne konto to, Isarele jar-keira bam ta pare Benjamin tiina bam konto mo ba kɛ ba vo Gibea wɛ-puli seeni, ye ba yɔɔre ba goe-ba chwoŋa kam yuu ne. 44Benjamin tiina jar-keira balo na yei jara laŋa chekke to morro fuga-nana mo tega. 45Benjamin jar-keira badwonna ma duri ba yɔɔre kagoa kam seeni se ba kwaane ba vo ba yi Rimon peo kom. Isarele tiina bam na pare-ba to, ba ma go nɔɔna morro tenu chwoŋa kam yuu ne. Ba ta ma pare-ba taa ba vo ba yi Gidom teo, ye ba go Benjamin jar-keira morro telei ba woli da.

46Ko kweelim ne to Benjamin jar-keira bam morro finlei-tenu na ye jara bembɛ to maama mo tega dɛ dem konto ne. 47Ba nɔɔna bia yaredo ma wane ba duri ba yi Rimon peo kom ye ba lu. Banto maŋe jei sem konto ne mo chane sena. 48Isarele tiina bam laam maa na jwoori jara yam wone to, ba ma vo ba zo Benjamin tiina teene dem maama wone, ye ba go nɔɔna balo maama na zoore de wone to. Ba ta go teene dem vara de kolo maama ba na nɛ to mo, ye ba daare ba zwɛ-de.

Currently Selected:

Yiga tiina 20: KBG

Highlight

Copy

Compare