Yiga tiina 19
19
Levi dwi tu de o ka-bia taane
1Kanto maŋa kam ne, pɛ déem ta tera Isarele logo kom wone. Levi dwi tu wodwoŋi maa wora. O maa zoore Efrayim zwonnu laŋa kam ne, mɛ na ye yiga yiga de sam to. Levi tu wom ma vo Judah teo Bɛtelehem o di kaane o ja vo sɔŋɔ se o taa ye o ka-bia. 2O ka-bia kam maa ba jege chega ded‑o, ye o jwoori o kwo sɔŋɔ na wo Bɛtelehem ne to o zoore da chane sena. 3Kan-baro wom ma ja boboŋa se o vo o ŋɔɔne de o kaane wom se o ja‑o o jwoori o tei. O ma ja o tontoŋeno dedaane o bonɛ selei o woli da o vo. Kaane wom ma pa o zo o kwo tei ye o kwo de jeeri‑o de wopwolo. 4Kaan-kwo wom ma fe‑o pa se o maŋe da o peini da yatɔ. Ba maama ma di ye ba nyɔa daane.
5Da yana dɛ dem ne, Levi tu wom ma zaŋe zezeŋa ne se o viiri. Kaan-kwo wom ma ta‑o o we, “Saare n ni, se n na dam n viiri.” 6Baara bam konto balei ma maŋe da ba di ye ba nyɔ daane. Kaane wom kwo ma ta Levi tu wom o we, “Ta maŋe ywo-seeni n peini, se n di ywoni.” 7Levi tu wom ta ma kwaane se o viiri. Kaan-kwo wom daa ta ma fe‑o pa se o maŋe da o peini.
8Da yanu dɛ dem ne, baaro wom ma zaŋe zezeŋa ne o bwoli chwoŋa se o kɛ. Kaan-kwo wom daa ma ta o we, “Cheigi se n saare n ni, se wea maŋa ne nmo laam wó wane n viiri.” Banto balei daa ma di daane. 9Nɔɔno wom dedaane o ka-bia kam de o tontoŋeno wom daa ma zaŋe se ba viiri. O tembaaro wom daa ma jwoori o ta o we, “Ko gɛ fee mo se tega yi. Daa‑n ta peini ywo se n di ywoni, se wɛ dem to mo konto. Te-pora maŋa ne abam wó wane á gwoni tega á zaŋe á kɛ.” 10Baaro wom daa maa wo sɛ se o peini tete dem konto ne. O ma ja o ka-bia kam dedaane bonɛ selei sem, ye o kwei chwoŋa o laam vo o yi Jebusi tiina teo kom na ye Jerusalem to.
11Ba na twɛ Jebusi to, dedaane tega kam wora ka yi mo. Levi tu wom tontoŋeno ma ta o we, “Pa se dé ywori Jebusi tiina bam tei ne dé peini se tega ná poore, se dé laam viiri.” 12Levi tu wom ma leiri‑o o we, “Debam bá vo dé zo veira teo mɛ na dae Isarele dwi tiina na zoore to. Dé wó fɔɔre dé kɛ dé yi teo kodwoŋi mo.” 13O ta ma ta o tontoŋeno wom o we, “Kwaane se dé vo dé yi Gibea naa Rama teo se dé peini da.”
14Ba ma gaale Jebusi ba kɛ. Ba ma vo ba yi Gibea, de wɛ zo mo. Jei sem konto wo Benjamin laŋa kam ne mo. 15Ba ma ywori dáane se ba peini. Ba ma vo ba jei teo kom lara jei sem ne. Nɔɔn-nɔɔno maa wo tu ba tei se o ja-ba o ja o vo o sɔŋɔ se ba peini.
16Ba na wora to mo nɔn-kwea kadwoŋi déem nwoŋi o kara o tɔge da o maa jwoori sɔŋɔ. Wonto déem zoore Gibea ne ye o ya nwoŋi Efrayim zwonnu laŋa kam ne mo. O dae Benjamin dwi tu nenɛɛne teo kom tiina na ye tei to. 17Nɔn-kwea kam ma maane we, chwo-veilu mo jei teo kom lara jei sem ne. O ma bwei‑o o we, “Nmo nwoŋi yei ne mo n ba n jei ywo-seeni, ye n nam ma‑n vei yei mo?”
18Levi tu wom ma leiri‑o o we, “Debam zege Judah teo Bɛtelehem ne mo dé maa jwoori sɔŋɔ. A sɔŋɔ kom wo Efrayim zwonnu laŋa kam na ye yiga yiga de sam to mo. Nɔɔn-nɔɔno nam wo tu o ja debam o vo o sɔŋɔ se dé peini dé poore tega. 19Debam nam jege dé vara bam wodiu. Wodiu de sana maa wora se amo de a kaane wom dedaane a tontoŋeno wom di. Dé jege kolo maama dé na lage to.”
20Nɔn-kwea kam ma leiri o we, “Wɛ wó pa abam yazura. Á ba amo tei, se a nii á baŋa ne. Yé maŋe-na pwola kanto ne á peini.” 21O ma ja-ba o vo sɔŋɔ, ye o pa ba bonɛ sem wodiu. O veira bam ma zare ba nɛ, ye ba jeini se ba di wodiu.
22Ba na wora ba di ywoni konto to, mo teo kom nɔn-wo-korro tedwonna tua ba kaare sɔŋɔ kom ba pu ye ba dɔne ko bworo kom. Ba ma ta nɔn-kwea kam ba we, “Pa se veiru wom na tu o wo n tei ne to nwoŋi o ba ywo-seeni, se debam lage se dé lage‑o mo!”
23Nɔn-kwea kam ma nwoŋi o vo ba tei, ye o ta-ba o we, “A badwonna bam, yé ke-na lwarem dem konto, se ko wo maŋe! Yé swei-na we nɔɔno wom ye amo veiru mo. 24Nii-na amo bukɔ mo tento! O ta yeiri baara. Veiru wom de maa vei de o ka-bia mo. A wó ja banto a ba a pa abam se á ke-ba á na lage tei to. Se ko ná ye nɔɔno wonto, yé ke-na totoŋ-lɔŋɔ kom konto o yuu ne, se ko tiini ko jege chaveera mo.” 25Teo kom nɔɔna bam maa wo sɛ. Levi tu wom ma fe o yigi o ka-bia kam o pa o nwoŋi o vo ba tei. Ba ma zi‑o ba lage tete dem konto maama taa se ko taa nii te-pora. Tega na poore to mo ba yage‑o.
26Tega na jege ka poore to, mo kaane wom kwaane o vo o to o tigi nɔn-kwea kam diga ni ne, mɛ o baro wom déem na tigi da to. Wɛ puli mo ye o ta maŋe da o tiga. 27Tega kam na poore pa se Levi tu wom pore diga kam ni se o nwoŋi to, mo o nɛ we o ka-bia kam tigi diga kam ni ne, ye o kwaane se o ja ka ni dem. 28Nɔɔno wom ma ta o ka-bia kam o we, “Zaŋe se dé viiri.” Kaane wom maa wo leiri. O ma kwei‑o o daŋe o bonaga baŋa ne, ye o kwei chwoŋa o maa viira.
29O na yi sɔŋɔ to, mo o zo diga o lage seo o ma o gwoni o ka-bia yera yam kuni fuga-belei. O ma pɔɔre pɔɔre kaane wom yera yam o toŋe o pa Isarele dwia fuga-yalei yam maama. 30Wolo maama déem na nɛ keim dem konto to maa we, “Keim dento dwoŋi ta wo fɔge de ke se dé na. Ko na zege maŋa kalo Isarele tiina bam na nwoŋi Ejipti ne to, se ko yi zem maama, dé ta wo nigi tento! Bwɛ-na se dé nii dé wó ke tetɛ mo!”
Currently Selected:
Yiga tiina 19: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
