Yiga tiina 21
21
Ba beeri kaana ba pa Benjamin tiina
1Isarele tiina bam déem ya jeeri Mizipa ne ba du duuri we, “Debam wolowolo bá pa Benjamin dwi tu di debam bukɔ kɔtaa!”
2Ba jara yam na ti to, Isarele tiina bam ma la daane ba gilimi Bɛtel ne. Ba ma tiini ba kaase ye ba keera se ko taa vei dedaan-ni ne, ba wo na pɛ to ŋwaane. 3Ba ma lwoori Wɛ ba we, “Debam Tu Isarele tiina Baŋa Wɛ wom, bɛŋwaane mo wonnu tento to debam baŋa, pa se sɔ-yuu kodoo lage ko jei Isarele dwi tiina bam tetare ne?”
4Tega na poore tetete to, nɔɔna bam ma zaŋe ba lɔ kaanem bimbini ye ba kwei zwɛɛm pɛɛra de yazura pɛɛra ba kaane ba pa Baŋa Wɛ. 5Isarele tiina bam maama ma bwei daane we, “Debam na tu dé jeeri Baŋa Wɛ yiga ne konto to, Isarele sɔ-yuu kɔ mo wo dɛ ba jeeri?” Ba bwei konto kolo ŋwaane ba ya dugi duuri mo we, wolo maama ná wo tɔge o jeeri Mizipa ne, se ba go kotu.
6Isarele tiina bam maama wo ma pɛ, ba chorro Benjamin dwi tiina bam ŋwaane. Ba ta maa we, “Zem dɛ dento, Benjamin sɔ-yuu kom wora ko jei mo Isarele ne. 7Debam nam ya na dɛ yiga dé du duuri we dé bá pa ba di dé wolowolo bukɔ to, dé laam wó na kaana yei ne mo, se dé pa Benjamin tiina baara balo fenfee na daare to?”
8Ba daa ta ma bwei daane ba we, “Isarele sɔ-yuu kɔ mo wo dɛ ko ba Mizipa se dé maama jeeri Baŋa Wɛ yiga ne?” Ba ma maane we nɔɔn-nɔɔno wo nwoŋi Jabese Gilead ne o ba o woli ba kɔgɔ kom wone. 9Kokuri to, ba ya jeeli nɔɔna bam ni mo, ye ba wo nɛ Jabese Gilead nɔɔna bam wolowolo da.
10Isarele tiina kɔgɔ kom ma kuri ba jar-keira morro fuga-balei (12,000) balo na tiini ba ye babɛ to se ba vo Jabese Gilead. Ba ma pa-ba ni dento we, “Abam ná yi da, se á kwei á se-zɔɔro tem á go nɔɔno wolo maama na wo dáane to, kaana ywoo, bia ywoo, yé daare-na nɔɔn-nɔɔno.” 11Ba ta maa we, “Go-na baaro dwi maama de kaane dwi maama se á daare kaana balo ta na yeiri baara to yerane.” 12Babɛ sem na yi Jabese Gilead to, mo ba maane we bukɔ-pwoli bia yana (400) wora ba ya ta na wo lɔre baara. Ba ma ja-ba ba vo Siloo teo, mɛ Wɛ kɔgɔ kom na jeeri to. Jei sem konto wo Kanaan tega baŋa ne mo.
13Isarele kɔgɔ kom maama ma ke ni dedwe ye ba toŋe kwora ba pa Benjamin tiina balo na seigi Rimon peo kom ne to we jara yam ti, konto to pwola laam wora se ba sɛ se ba ke daane. 14Benjamin tiina bam ma jeeri Isarele tiina bam, ye ba de pa-ba bukɔ-pwoli selo ba na wo go ye ba ja ba nwoŋi Jabese Gilead ne ba ba to. Bukwa bam déem maa wo yi Benjamin tiina baara bam.
15Isarele tiina bam wo ma tiini ko chɔge Benjamin tiina bam ŋwaane, kokuri to Baŋa Wɛ sɛ se gwoŋo mo peini Isarele dwia yam tetare ne. 16Ba kɔgɔ kom nakwa bam ma ta ba we, “Benjamin kaana bam maama tege ba ti. Dé laam nam wó na kaana yei ne mo se dé pa balo na daare Benjamin dwi dem wone to? 17Benjamin dwi tiina balo na daare to jege se ba puli mo. Isarele sɔ-yuu dedoa tete ba jege se ko jei. 18Debam nam dɛ yiga dé du duuri dento mo we, ‘Sensɔle-balɔrɔ wó taa wo wolo maama na wó pa Benjamin tiina bam o bukɔ to yuu ne.’ Konto ŋwaane, dé bá wane dé pa-ba dé bukwa se ba ji ba kaana.”
19Ba ma boŋe ba ja we, “Baŋa Wɛ kuri dem dé na yeini dé di bene maama Siloo ne to bá daane de yi.” Siloo wo Bɛtel teo kom baŋa seeni mo. Ko ta maa wo chwoŋa kalo na nwoŋi Bɛtel ne ka vei Sɛkɛm to wɛ-puli seeni. Lebona kuri seeni mo konto.
20Ba ma pa Benjamin tiina bam ni dento we, “Véi-na á seigi Vini teeni kare sem wone, 21se á ta‑á yera chwoŋa kam. Siloo tiina bukwa bam ná nwoŋi teo kom se ba tɔge ba sa kwɛɛra yam, se á zaŋe á na seigi mɛ to á nwoŋi á yi á ja-ba, baaro maama de o kaane, se á ja-ba á vo Benjamin laŋa kam á ta‑á jega. 22Bukwa bam kwoa naa ba nabwa ná wo sɛ se á ta‑á di-ba, debam laam wó lwoori-ba we, ‘Popo, yage-na chwoŋa se nɔɔna bam taa jege á bukwa bam ba di. Kokuri jara yam na ke to, debam wo wane dé lage kaana dé pa-ba. Abam de nam wo yiri á ni dem, kolo ŋwaane abam tete wo kwei á bukwa á pa-ba.’ ”
23Benjamin tiina bam déem ma seene ba ke konto. Ba vei Siloo seeni mo, ye ba kuri bukɔ-pwoli selo na sae to wone ba ja ba viiri, baaro maama de o kaane. Ba ma jwoori ba zoorem jei. Ba ma lɔ ba teene dem ba zoore de wone.
24Konto kwaga ne mo Isarele tiina bam maama laam jwoori ba sam. Sɔ-yuu maama de diga maama jwoori ba jeiŋa jei mo.
25Maŋa kam konto, pɛ déem ta tera Isarele ne. Nɔɔno maama maa ke o boboŋa na lage tei to.
Currently Selected:
Yiga tiina 21: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
