Yiga tiina 18
18
Dan tiina vei ba wo Layisi ne
1Wonnu tento maama déem na jege te ke to, Isarele tiina bam ya ta ba jege pɛ. Ka maŋa ne, Dan dwi tiina bam ma kare ba beeri tega se ba taa zoore ka wone. Kokuri, tega kalo Isarele tiina bam na pɔɔre ba pa daane to, Dan tiina bam ya ta wo nɛ ba tete laŋa ka wone. 2Dan tiina bam ma le ba dwi dem wo babɛ senu ba na nwoŋi sɔ-yuu maama wone to. Ba ma zege Zora dedaane Esatola ne ba toŋe-ba ba we, “Véi-na á kaare tega kam, se á daare á ŋɔ á nii ka maama na ye tei to.” Ba déem ma kaare taa ba vo ba yi Efrayim zwonnu laŋa kam. Ba ma vo Mika sɔŋɔ ba zo ba peini dáane.
3Ba na wo Mika sɔŋɔ ne to, mo ba maane Levi dwi tu wolo na zoore da to kwor-taŋa ba lɔre. Ba ma yi o tei ba bwei‑o ba we, “Wɔ mo jaane‑m o ba ywo-seeni? Nmo wo ywo n ke bɛ mo?” 4O de ma leiri-ba o we, “Amo dedaane Mika mo maŋe daane, o nam ke-ne lanyerane, ye o ta ŋwe-ne pa se a lɛɛre a ye o kaanem tu.”
5Ba ma ta‑o ba we, “Nam lwoori Wɛ n pa debam se dé lɔre dé chwoŋa kam wó ja ywoni ka ba ka pa debam, naa ka bá ja ka ba.” 6Kaanem tu wom ma leiri-ba o we, “Yé pa-na se á bochara taa maga, se Baŋa Wɛ yiga wora á chwoŋa kam wone.”
7Babɛ senu sem ma nwoŋi dáane ba to chwoŋa ne ba maa kɛa. Ba ma vo ba yi Layisi. Teo kom nɔɔna bam zoore yalem mo daane, ye foone ba jege-ba nenɛɛne Sidon tiina bam tei to. Woŋo maama tiini ko yi-ba, ye ba jejegero gaale. Ba ya zoore da de ywoni mo de wo-zuru. Ba teo kom maa ye yiga yiga dedaane Sidon tiina bam. Ba maa ba toŋa dedaane nɔɔna badwonna.
8Babɛ senu sem ma jwoori Zora dedaane Esatola ne. Ba dwi tiina bam ma bwei ba kwaga. 9Ba de ma leiri-ba ba we, “Pa-na se dé vo dé jeeri Layisi tiina bam de jara. Kokuri to, debam na vei dé na tega kam to, ka lamma lanyerane. Yé ta‑á jei-na ywo-seeni á chɔga. Zo-na á jwoŋi ba tega kam á ta‑á tei. 10Abam ná yi ba teo kom, á wó na we jei sem daga dedɛ. Nɔɔna bam maa zoore da yalem, ye woŋo maama tiini ko yi-ba. Baŋa Wɛ de ma kwei tega kam o ke á jeŋa ne se á ta‑á tei.”
11Dan dwi tiina bam nɔɔna bia yaredo ma zege Zora dedaane Esatola ne ba nwoŋi de ba jara-keim zela se ba vo ba jeeri-ba. 12Ba ma vo ba twɛ Kiriaf-Jeerim na wo Judah laŋa kam ne to ba chwi ba vwoa da. Jei sem wo Kiriaf-Jeerim wɛ-puli seeni mo. De zem maama ba ta bwoi jei sem yere we, ‘Mahanɛ-Dan’. #18:12 Mahanɛ-Dan kuri mo ye Mɛ Dan tiina na chwi ba vwoa to. 13Ba ma zege dáane ba vo Efrayim zwonnu laŋa kam ne ba vo ba yi Mika sɔŋɔ kom.
14Babɛ senu sem ya na vei ba ŋɔ ba nii Layisi to ma ta de ba dwonna bam ba we, “Abam yei we sam dento dedoa wone jwoni wora ba na gɔgere de lu-nyenno na? Kaanem gare-wogo, de jwona yadwonna de maa wora. Jeeli-na á nii á na wó ke tei dedaane tento maama to.” 15Ba ma ywori ba zo Mika sɔŋɔ, ba vo Levi dwi tu nɔn-doŋo kom tei, ye ba bwei o kwaga. 16Dan tiina jar-keira bia yaredo yam déem ma che manchwo-peena yam ni ba zega. 17Babɛ senu sem ma zo sɔŋɔ kom wone ba kwei jwoni delo na gɔgere to, dedaane kaanem gare-wogo kom, ko woli dedaane jwona yadwonna yam maama. Kaanem tu wom ma maŋe manchwo-peena yam ne dedaane jar-keira bia yaredo yam.
18Nɔɔna banu bam na zo Mika sɔŋɔ kom wone ba kwei jwoni delo na gɔgere to, dedaane kaanem gɔrɔ kom dedaane o jwona yadwonna yam to, kaanem tu wom ma bwei-ba o we, “Bɛ mo konto abam wora á ke?” 19Ba ma leiri‑o ba we, “Daa‑n yé jwoori n puri n ni. Ta‑n tɔge debam, se n ji dé kwo dedaane debam kaanem tu. Nmo ná tu n ji kaanem tu n pa Isarele dwi dem sɔ-yuu kodwoŋi ba gare n ná ye nɔɔno dedoa dedaane o sɔŋɔ tiina yerane kaanem tu na?” 20Kaanem tu wom ma sɛ ba taane dem. O ma kwei kaanem gɔrɔ kom dedaane jwona yam maama, ye o laam pɛ ba kwaga o pu se ba kɛ. 21Ba maama ma to chwoŋa ne ba maa kɛa, ye ba bia bam, de ba vara, dedaane ba zela wo yiga ne.
22Dan nɔɔna bam na kɛ ba yi yiga fee to, mo Mika bwoŋi o dedaane balo na zoore daane to o ke daane. Ba ma pare Dan tiina bam ba ja. 23Ba ma chwoosi ba bwoŋi Dan tiina bam, ye ba de leiri ba bwei Mika ba we, “Bɛ mo ke ye nmo pɛ nɔn-kɔgɔ konto n ke n kwaga ne?”
24Mika maa we, “Abam kwei amo jwona yalo a na ke to, dedaane a kaanem tu wom mo á ja á viiri. Bɛ mo ye á daa ta jege ni se á bwei-ne we, ‘Bɛ mo kea?’ Bɛ mo abam daa daare á pa-ne?”
25Dan tiina bam ma leiri Mika taane dem ba we, “Yé ta‑n ŋwaana! Nmo ná lage n tete, daa‑n yé jwoori n puri n ni. Ko ná dae konto, ban-lom tiina na wo dé tetare ne to wó yi‑m, se n dedaane n sɔŋɔ tiina bam maama ga á ŋwea.” 26Dan tiina bam ma kwei chwoŋa ba maa kɛa. Mika ma na we ba tiini ba damma ba dwoi‑o. O de ma jwoori sɔŋɔ.
27Dan tiina bam déem ma kwei Mika na ke wonnu telo to, dedaane o kaanem tu wom ye ba laam vo ba yi Layisi. Teo kom nɔɔna ya zoore daane yalem mo, ye kolokolo ba daane-ba. Dan tiina bam ma go ba maama ye ba daare ba zwɛ ba teo kom maama. 28Jwoŋinu maa tera se o woli-ba, kokuri jei sem konto dɔra mo dedaane Sidon teo kom. Ba maa ba toŋe dedaane nɔɔna badwonna. Teo kom konto wo bwolo ne mo, ye ko bwola de Bɛte-Rehoba.
Dan tiina bam déem ma jwoori ba lɔ teo kom konto ba zege, ye ba lɛɛre ba zoore ko wone. 29Ba ma leiri teo kom yere ba bwoi we ‘Dan’. Ba kwei ba nabaaro Isarele bu Dan yere dem mo ba ma bwoŋi teo kom. Boboa ne to, teo kom yere nam ya ye Layisi mo. 30Dan tiina bam ma kwei Mika jwoni dem ba zege da, ye ba jege-de ba kaana. Geresom bu Jonatan mo jigi ba kaanem tu. O ye Moses naa mo. Jonatan dwi tiina maa ye ba kaanem tiina se ko yi maŋa kalo Isarele tiina dona bam na zeili-ba ye ba daare ba tei tega kam to. 31Dan tiina bam déem yeini ba kaane Mika jwoni dem, maŋa kalo maama Wɛ wara-vwei dem na wo Siloo teo ne to mo.
Currently Selected:
Yiga tiina 18: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
