Yiga tiina 14

Samson kadiri taane

1Dɛ dedwe mo Samson vei Timina. O ma na Filisi tiina bukɔ dedoa. 2O déem ma jwoori o ta de o kwo dedaane o nu o we, “Amo nɛ bukɔ mo Timina ne, o na ye Filisi tiina bam bukɔ. Véi-na á swo‑o á pa-ne se a di a ma ke a kaane.”

3O kwo dedaane o nu ma leiri‑o ba we, “Bukwa mo ti nmo tete dwi tiina wone na? Debam dwi dem wone nɔɔn-nɔɔno mo tera o na su nmo yi pa se n ma n vei Filisi tiina banto na ye dwi-gɛ to tetare ne se n beeri n kaane na?” Samson ta ma fe o kwo ye o we, “Kaane wom konto mo amo boboŋa tɔga. Véi n swoi‑o n pa-ne.”

4O kwo dedaane o nu maa yeiri we Baŋa Wɛ tɔge chwoŋa kanto mo se o na pwola o ma o chiŋi jara de Filisi tiina bam. Ka maŋa ne, Filisi tiina bam déem di dam Isarele tiina baŋa ne mo.

5Samson dedaane o kwo de o nu ma vo Timina. Ba maa wo chwoŋa ne ba twɛ Vini teeni kare sem na wo teo kom pwola ne to. Nywoŋ-pɔla ma pɔpɔ ka nwoŋi ka jeeri Samson ye ka laara. 6Baŋa Wɛ jworo ma chu o baŋa ne dedaane dam, ye o kwei o je-bwori yerane o ma o kaare nywoŋo kom nenɛɛne ko ye bobona mo to. O nam wo tage kolo o na ke to o bere o kwo dedaane o nu. 7O ma vo teo wo pa se o de kaane wom lare daane. Samson wo ma da kaane wom dedɛ.

8Ko na ke da fenfee to, Samson ma jwoori o vo se o laam swo o kaane wom. O na yi mɛ o ya na go nywoŋo kom to, o ma ywori se o nii ko ye tetɛ mo. O ma maane we twe mo zo nywoŋ-teko kom wone, ye se ke tooro. 9O ma lɔɔne tooro tem, ye o di-te o maa kɛa. O na yi o kwo de o nu tei to, mo o pɛ-ba tooro tem ye ba de di. O maa wo tage o bere-ba we te nwoŋi nywoŋ-teko yera ne mo.

10Samson kwo ma vo Timina se ba ke kadiri dem. Samson ma ke kuri, ne nɔn-donno déem na yeini ba ke kadiri ŋwaane tei to. 11Filisi tiina bam na nɛ‑o to, mo ba pɛ‑o ba nɔn-donno fintɔ se ba taa wo o tei ne.

12Samson ma ta nɔn-donno tem o we, “Cheigi-na dendea kanto a na lage a ta to. Amo wó pa abam da yarepɛ se á ma á lɔre-ka, se kuri dem laam ti. Á ná lɔre ka kuri, amo wó pa abam gare-fefale fintɔ, dedaane gare-laaro fintɔ. 13Abam nam ná wo lɔre dendea kam kuri, abam mo wó pa-ne gare-fefale fintɔ dedaane gare-laaro fintɔ tem.” Ba ma leiri o taane dem ba we, “Dé sɛ. Ta n dendea kam se dé cheigi.”

14O ma ta-ba o we:

“Wodiu mo nwoŋi diru yera ne pa se a di,

Wo-sonno de ma nwoŋi dedɛɛro wom yera ne.”

Da yatɔ maama mo nɔɔna bam jaŋe dedaane dendea kam, ye ba wo lɔre ka kuri.

15Da yana dɛ dem ne mo ba tage Samson kaane wom ba we, “Soge n baro wom se o ta dendea kam kuri o bere debam. Ko ná dae konto, dé lage dé zwɛ nmo dedaane n kwo sɔŋɔ tiina maama mo dé go. Abam na bwoŋi debam se dé ba ywo-seeni to, ko ye se á vere debam mo na?”

16Samson kaane wom ma ka yi-na o yiga ne ye o we, “A maane we n ba lage amo lanyerane. N de dendea mo n pa a kwo sɔŋɔ tiina bam ye n laam wo tage ka kuri n bere-ne.” O de ma leiri kaane wom o we, “Ta‑n yei we amo maŋe a wo tage taane dento a bere a kwo dedaane a nu. Bɛ mo wó taa tei se a ta de kuri a bere‑m?”

17Da yarepɛ maama wone mo kaane wom yɔɔre o nyenyɔne Samson yiga ne. Kuri dem da yarepɛ yam maama wone kaane wom kane yi-na konto mo ye o nyenyɔne Samson yiga ne. O na bilisi‑o konto ye da yarepɛ dɛ dem yi to, Samson ma ta dendea kam kuri o bere‑o. O de ma vo o maŋe-de o bere nɔn-donno tem.

18Wea na lage ka zo da yarepɛ dɛ dem ne to, mo teo kom nɔɔna bam tage Samson ba we:

“Bɛ daa mo sona ko dwoi tooro?

Bɛ nam daa mo dana ko dwoi nywoŋo?”

Samson ma leiri-ba o we:

“Abam ya ná wo jaane amo na-chwɛ dem á ma á va,

abam ya bá lɔre a dendea kam kuri.”

19 Baŋa Wɛ jworo ma chu Samson baŋa ne dedaane dam. O ma zaŋe o vo Asekelon o go teo kom konto nɔɔna fintɔ. O daa ta vere ba jejegero mo ye o daare o kwei ba gare-nyenno tem o pa balo na lɔre o dendea kam kuri to. O ma jwoori o vo o kwo sɔŋɔ ye o bane ta wo zuri.

20Ba déem ma kwei Samson kaane wom ba pa nɔn-doŋo kom na jigi o badwoŋi kadiri maŋa kam ne to.

Currently Selected:

Yiga tiina 14: KBG

Highlight

Copy

Compare