Yiga tiina 13

Samson lora taane

1Isarele tiina bam déem daa ma toŋe lwarem ba chɔge Baŋa Wɛ yiga. Baŋa Wɛ ma pa chwoŋa pa se Filisi tiina bam di-ba, ye ba pa ko zo ba yera bena finna.

2Nɔɔno wodwoŋi déem mo wora, o yere mo Manoa. O maa ye Dan dwi tu ye o zoore Zora teo ne. O ya jege kaane o na ye kadega to mo. 3Baŋa Wɛ maleka kam ma vo kaane wom tei ka ta‑o ka we, “Ko seene ko ye chega we n wo loge bu. Ko nam bá daane n lage n kwei puga mo n lo bakeira. 4Nam lɔre we n ba jege se n nyɔ sa-dɛɛra, naa se n di wodi-yɔɔro telo na chuli to. 5Nmo wó ja puga n lo n bu wom konto. O lora kam kwaga ne ko ba jege se fana gwoni o yu-ywei sem. Kokuri to o biini maŋa ne se ko taa via, bu wom ye se n pɔɔre‑o mo n ke Wɛ jeŋa ne se o taa ye Naziri tu. Wonto mo lage o bobo se o jwoŋi Isarele tiina bam o yage Filisi tiina bam jeŋa ne.”#Jeelim 6:2-8; Luka 1:15

6Kaane wom ma vo o ta o baro o we, “Wɛ nɔɔno dedoa mo tu amo tei. O nyenyego kom ya tiini ko jege foone, nenɛɛne Baŋa Wɛ maleka nyenyego na ye tei to. Amo wo bwei‑o se a lɔre o na nwoŋi mɛ to, o de nam wo tage o yere o bere-ne. 7Nɔɔno wom ma ta o bere-ne we, a lage a ja puga a lo bakeira mo. Konto ŋwaane a ba jege se a nyɔ sa-dɛɛra naa a di wodi-yɔɔro telo na chuli to. Kokuri to bu wom wó taa ye Naziri tu na ye o yera mo Wɛ ŋwaane, ko zege o biini ne se ko taa nii o toone maŋa.”

8Manoa déem ma lwoori Baŋa Wɛ o we, “Amo Teiru, ja! Pa se Wɛ tontoŋeno wolo n na toŋe debam tei ne to jwoori o ba, se o bere debam dé na wó ke tei dé nii bu wonto baŋa ne lanyerane to.”

9Wɛ ma sɛ Manoa wɛ-lworo kom. O kaane wom jei pwola ne mo ye Wɛ maleka kam jwoori ka ba o tei ye Manoa ya tera. 10Kaane wom ma duri lela o vo o ta o baro wom o we, “Nɔɔno wolo ya na tu a tei ne to daa jwoori o ba!”

11Manoa ma zaŋe o da o kaane wom kwaga. Ba na yi nɔɔno wom tei to, mo Manoa bwei‑o o we, “Nmo mo ye nɔɔno wolo ya na ŋɔɔne dedaane amo kaane to na?” O de ma leiri we, “Ɛɛ!”

12Manoa laam ma bwei‑o o we, “Nmo taane dem nam ná jigi chega, bu wom konto ŋwea dedaane o totoŋa wó taa ye tɛ mo?” 13Maleka kam ma leiri ka we, “Ko jege se n kaane wom kwei kolo maama a na tage a bere‑o to mo o ke o bochare ne. 14Wonto tete ba jege se o di woŋo kolo maama na nwoŋi Vini tio yera ne to. O ta ba jege se o nyɔ sa-dɛɛra, naa o di wo-yɔɔro telo na chuli to. O yɔɔre o ye se o ke o tɔge kolo maama a na bere‑o to mo.”

15-16Manoa déem wo lɔre we nɔɔno wom ye Baŋa Wɛ maleka kam mo. O ma ta maleka kam o we, “Zuri n yera konto se dé beeri boŋo dé ma dé ke na dé pa‑m.” Baŋa Wɛ maleka kam ma leiri‑o ka we, “Abam ná maŋe á wo pɛ-ne chwoŋa se a viiri, a ta bá di á wodiu kom. Á nam ná jege boŋo, se á ja-ko á zwɛ á ke kaanem á pa Baŋa Wɛ.”

17Manoa daa ma ta Baŋa Wɛ maleka kam o we, “Nmo yere nam mo ye bɛ? Se n taane dem ná jigi chega se debam de wane dé ke‑m zula.” 18Baŋa Wɛ maleka kam ma leiri‑o ka we, “Bɛŋwaane mo ye n bwei a yere dem bwia? De tiini de ye yere-kenkagele mo.”#Pulim 32:29

19Manoa ma ja boŋo o woli de wodiu pɛɛre. O laam ma kwei-te o tiŋi peo baŋa ne o kaane o pa Baŋa Wɛ. Baŋa Wɛ ma ke wo-kenkagele ye Manoa dedaane o kaane wom zege ba nia. 20Min-vogo kom na zege peo bimbini dem ne de jaane de diini wɛ to, mo Baŋa Wɛ maleka kam tɔge de mini dem ka di. Manoa de o kaane wom na nɛ konto to, mo ba vwi ba yibia tega ne. 21Baŋa Wɛ maleka kam daa maa wo jwoori Manoa dedaane o kaane wom tei ne. Ko ma pa se Manoa lɔre we nɔɔno wolo na tu ba tei to ye Baŋa Wɛ maleka mo.

22Manoa ma ta o kaane wom o we, “Ko zege ko nii mo we debam lage dé te mo, kokuri dé nɛ Wɛ yibia!” 23O kaane wom ma leiri‑o o we, “Baŋa Wɛ boboŋa ya ná ye se o go debam, o ya bá jwoŋi zwɛɛm pɛɛre dedaane wodiu pɛɛre dé tei ne. O nam ya ta bá bere debam wo-kenkagela yanto, naa o ŋɔɔne wonnu tento dedaane debam.”

24Kaane wom déem ma lo bakeira. Ba ma pa o yere we, ‘Samson’. Bu wom ma ke nɔɔno ye Baŋa Wɛ swolim wo o yuu ne. 25Samson déem zoore teo kodwoŋi ne, ko na wo Zora dedaane Esatola tetare ne ye ko yere ye Mahanɛ-Dan to. O na wora to mo Baŋa Wɛ jworo yeini ko chu o baŋa ne ko zeini‑o de dam.

Currently Selected:

Yiga tiina 13: KBG

Highlight

Copy

Compare