Yiga tiina 12
12
Jefeta de Efrayim tiina bam taane
1Efrayim dwi tiina bam déem ma ke ba tete daane jara-keim ŋwaane. Ba ma bɛ Jɔdan buga kam ba vo Zafon. Ba ma yi Jefeta tei, ye ba ta‑o ba we, “Nmo na vei se n ke jara dedaane Amon tiina bam to, bɛ mo ye n wo bwoŋi debam se dé tɔge dé ke jara yam? Dé lage dé zwɛ n sɔŋɔ kom de n tete maama mo.”
2Jefeta ma leiri-ba o we, “Amo de a diga kam ya mo jege ta-kamunu dedaane Amon tiina bam. Amo ma toŋe a ta abam, ye á wo sɛ se á ba á jwoŋi-ne á yage ba jeŋa ne. 3A na maane we abam wo ti á yiga se á woli-ne to, mo a dole a ŋwea a yage ye a lɛɛne siseini dem a vo a jeeri Amon tiina bam. Baŋa Wɛ ma pa se a di-ba. Chwoŋa kɔ mo abam zem jega se á ba á jeeri amo de jara?”
4Jefeta déem ma ja Gilead jar-keira bam maama o ke daane se ba kwaare Efrayim tiina bam de jara. Efrayim tiina bam ma ta Gilead tiina bam taane ba we, “Abam Gilead tiina bam ye nɔn-yɔɔro mo ye á nwoŋi Efrayim dedaane Manasɛ dwia yam wone á ba ywo-seeni.” Konto ŋwaane, Gilead tiina bam ma kwaane ba di Efrayim tiina bam.
5Gilead tiina bam ma vo ba cheiŋi jei selo Efrayim tiina bam na yeini ba tɔge da ba bɛ Jɔdan buga kam to. Efrayim tu laam ná boŋe se o bɛ buga kam o jwoori sɔŋɔ, ye o ná lwoori chwoŋa ba tei ne se o kɛ, Gilead tiina bam wó bwei‑o mo we, “Nmo ye Efrayim tu mo na?” O ná we, ‘Aawo!’, 6ba wó bwei kotu mo we, ‘Ta we, Chibolɛf!’ Kotu ma yeini o we, ‘Sibolɛf’, kokuri o ware yere dem konto o bwoŋi lanyerane. Gilead tiina bam ma yeini ba ja‑o ba go Jɔdan bubɛ dem konto ne. Da yam konto ne, Efrayim tiina bam morro finna-telei (42,000) mo tega.
7Gilead tu Jefeta déem nii Isarele tiina bam baŋa ne bena yaredo mo ye o laam te. Ba ma kwei‑o ba suli o tete teo Gilead wone.
Ibazan de Elon de Abedon taane
8Jefeta na tege to, Bɛtelehem tu dedoa o yere na ye Ibazan to, mo nii Isarele tiina bam baŋa ne. 9O maa jege bakeiri fintɔ de bukwa fintɔ. O déem kwei o bukwa fintɔ bam o pa baara balo na dae o tete sɔ-yuu kom nɔɔna to mo. O daa ta ma jwoŋi bukwa fintɔ sɔ-yuni tedwonna tei ne o pa o bu-baara bam se ba ma ba ke kaana. Wonto nii Isarele tiina bam baŋa ne bena yarepɛ mo, 10ye o laam te. Ba ma kwei‑o ba suli Bɛtelehem ne.
11Ibazan de toone kwaga ne, Elon na ye Zebulun tu to mo nii Isarele tiina bam baŋa ne bena fuga, 12ye o laam te. Ba ma kwei‑o ba suli Zebulun tiina teo Ayijalon ne.
13Elon toone kwaga ne, Hileli bu Abedon de daa mo nii Isarele tiina bam baŋa ne. Hileli nwoŋi Pirafon teo mo. 14Abedon bia maa ye finna, ye o naaro ye fintɔ. Ba déem jege bonɛ fuserepɛ mo ba diina. Hileli bu Abedon déem nii Isarele tiina bam baŋa ne bena nana mo, 15ye o laam te. Ba ma kwei‑o ba suli Pirafon ne. Jeiga kam konto wo Efrayim laŋa kam ne, Amaleki tiina bam na zoore zwonnu tem ne mɛ to mo.
Currently Selected:
Yiga tiina 12: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
