Yiga tiina 11
11
1Gilead tu Jefeta déem ye babea mo jara-keim laŋa ne. O nu maa ye ka-tola ye o kwo yere ye Gilead. 2Gilead kaane wom de déem loge bia ded‑o. Bia bam maa na ke nɔɔna to, mo ba zeili Jefeta ba yage gaao ne ye ba ta‑o ba we, “Dé kwo jejegero tem dae se nmo tɔge n jwoŋi te wone, nmo na ye ka-gaa bu to ŋwaane.” 3Jefeta ma duri o yage o chorro tem, ye o vo o zoore Toba teo ne. Paweero ma vo da ba sale o yera ne, pa se ba kare jei sem maama ba vere nɔɔna.
4Ko na ke fee to, Amon tiina bam ma kwaare jara dedaane Isarele tiina bam. 5Jara yam na zaŋe konto to, mo Gilead nakwa bam vei Toba se ba ja Jefeta ba jwoori. 6Ba ma ta‑o ba we, “Ba n to dé yiga ne, se dé vo dé ke jara dedaane Amon tiina bam.”
7Jefeta ma ta-ba o we, “Abam déem chuli-ne mo, ye á fe-ne á zeili se a nwoŋi a daare a kwo sɔŋɔ kom. Bɛŋwaane mo á cham maŋa ne á daa beeri amo jei?”
8Gilead nakwa bam ma leiri‑o ba we, “De konto maama de, dé pipiri dé beene nmo tei mo, se n tɔge dé yiga se dé ke jara dedaane Amon tiina bam. Konto kwaga ne, nmo laam wó ta‑n ye Gilead tiina bam maama yuu tu mo.”
9Jefeta ta ma bwei-ba o we, “Chega to, abam ná jaane-ne á jwoori se dé ke jara dedaane Amon tiina bam, ye Baŋa Wɛ ná kwei-ba o ke dé jeŋa ne pa se dé di-ba, á wó sɛ se a taa ye á yuu tu na?”
10Gilead nakwa bam ma leiri‑o ba we, “Baŋa Wɛ ye maana tu dé tetare ne we, debam sɛ se dé ke nmo na tage tei to.” 11Jefeta ma tɔge-ba o jwoori o vo Mizipa. Nakwa bam ma sɛ se o taa tei-ba, ye o daare o ye ba jara yiga tu. Jefeta na wo Mizipa ne to, o ma jwoori o ta o taane dem maama Baŋa Wɛ yiga ne.
12Jefeta déem ma toŋe kwora Amon tiina Pɛ wom tei ne o bwei o we, “Bɛ mo tigi debam laŋa ne pa se n ba se n ke jara dedaane debam?”
13Amon tiina Pɛ wom ma leiri Jefeta nɔɔna bam o we, “Maŋa kalo Isarele tiina bam déem na zege Ejipti ne ba beene to, ba vere a tega kalo na zege Aranon buga kam ne ka tole Jaboke buga kam, se ko taa vei Jɔdan buga kam maama to mo. Abam nam jege se á jwoori á pa-ne a tega mo de bochare-zuru.”
14Jefeta daa ma toŋe nɔɔna Amon tiina Pɛ wom tei ne dedaane kwora kanto:
15“Jefeta we, ko dae we Isarele tiina bam déem jwoŋi Moaba tiina dedaane Amon tiina tega mo. 16Kolo na wora to mo ye we, Isarele tiina bam na nwoŋi Ejipti ne to, ba kwei kagoa chwoŋa kam mo ba vo ba yi Nane-soŋo kom, ba zege dáane ba vo ba yi Kadese. 17Ba ma toŋe nɔɔna Edom Pɛ tei ne we, ‘Pa debam pwola se dé tɔge n tega kam baŋa ne dé kɛ.’ Edom Pɛ ma ve.#Jeelim 20:14-21 Ba ta ma lwoori chwoŋa Moaba tiina Pɛ tei ne, ye o de wo sɛ se ba kɛ. Konto ma pa se Isarele tiina bam maŋe Kadese ne.
18Ba déem ma kare kagoa kam ne ba via, ye ba bebare Edom tega kam dedaane Moaba tega kam. Ba vei konto mo taa ba tɔge Moaba tega kam wɛ-puli seeni. Ba ma vo ba chwi ba vwoa Aranon buga kam bubɛ dedwoŋi dem ne. Ba wo zo Moaba laŋa kam, kokuri to Aranon buga kam mo ye Moaba laŋa kam siseini.
19Isarele tiina bam déem ma toŋe kwora Amori tiina Pɛ Sihon tei ne. Wonto ya jege o paare o di Hesebon ne mo. Ba maa we, ‘Pa debam chwoŋa se dé tɔge n tega kam baŋa dé vo dé teo.’#Jeelim 21:21 20Sihon maa wo pɛ Isarele tiina bam chega se ba tɔge o tega kam baŋa ne ba kɛ. O ma ke o jar-keira bam o ke daane pa se ba jeeri Jahaza ne, ye ba laam ke jara dedaane Isarele tiina bam.
21Isarele tiina Baŋa Wɛ wom ma pa se Sihon dedaane o nɔɔna bam maama zo Isarele jeŋa pa se ba di-ba. Ko laam ma pa se Isarele dwi tiina jwoŋi Amori tiina na zoore tega kam konto ne to ba tei. 22Ba ma jwoŋi Amori tiina tega kam maama, ko na zege Aranon buga kam ne se ko tole ko yi Jaboke buga kam to. Ko daa ta zege kagoa kam ne se ko yi Jɔdan buga kam to.
23Chega ŋwaane to, Isarele tiina Baŋa Wɛ wom mo zeili Amori tiina bam ye o kwei ba tega o pa debam Isarele tiina bam. Chwoŋa kɔ mo á jega se á ma á jwoŋi-ka? 24Abam wɛ dem yere na ye Chemosi to na pɛ abam kolo se á ta‑á tei to, pa-na se á yi su-ko, se debam de wó taa jege kolo maama debam Tu Baŋa Wɛ na kwei o pa debam to mo. 25Nmo boŋe we n gare Zipore bu Balaki na ye Moaba tiina Pɛ to mo na? O wo sɛ se o dwoni dedaane Isarele tiina bam, naa se o jeeri-ba de jara. Ko dae chega na? 26Isarele tiina bam na zoore Hesebon de Arowa de de nawuura yam ne, ko woli de teene delo na wo Aranon buga kam bubɛ ne to zem jege bena bia yatɔ mo. Bɛ mo ye abam wo kwaane se á jwoori á jwoŋi teene dem konto? 27Amo wo ke kolokolo a chɔge n yiga. Nmo nam na kwaane n beeri jara dedaane amo to, n wo ke lanyerane. Baŋa Wɛ nam ye wolo na bore chega bora to mo.#Lei 7:11 Wonto zem mo wó di bora Isarele tiina bam dedaane Amon tiina bam tetare ne.”
28Amon tiina Pɛ wom déem maa wo cheigi kwora kalo Jefeta na toŋe o pa‑o to.
29 Baŋa Wɛ jworo déem ma chu Jefeta baŋa ne de dam. O ma zaŋe o tɔge Gilead de Manasɛ laŋa kam maama o kɛ o yi Gilead teo Mizipa. O ma zege dáane o vo Amon tiina bam na gilimi mɛ to. 30Jefeta ma gwoni ni dedaane Baŋa Wɛ we, “Nmo ná kwei Amon tiina bam n ke amo jeŋa ne pa se a di-ba, 31a ná maa jwoori sɔŋɔ de yazura ye woŋo kolo maama na wó da yiga ko nwoŋi amo sɔŋɔ ne se ko jeeri-ne to wó taa ye nmo Baŋa Wɛ nyem mo se a ma a ke zwɛɛm kaanem a pa‑m.”
32Jefeta ma bɛ buga kam o vo se o jeeri Amon tiina bam de jara. Baŋa Wɛ ma kwei-ba o ke Jefeta jeŋa ne pa se o di-ba. 33O déem tiini o wane-ba mo se ko zege Arowa ne se ko tole ko yi Minifa laŋa kam maama. Teene finlei mo o dia o ta vo o yi Abel-Keramim ne. Ko dɛ chwoŋa kam konto mo ye Isarele tiina bam di Amon tiina bam.
34Jefeta déem ma jwoori Mizipa. Maŋa kalo o na yɔɔre o maa yi sɔŋɔ to, mo o bukɔ nwoŋi se o jeeri‑o. O jege senyɛ mo o wɔe ye o sae o jeeri o kwo wom. Bukɔ wom konto yerane mo Jefeta loga, bakeira naa busankana daa wo woli da. 35O maa na nɛ‑o to, mo o wo chɔge dedɛ. O ma kaare o gwaaro ye o laare o we, “A bukɔ, n go-ne! N tiini n ja cham n ba n pa-ne! Amo wuuri a gwoni ni dedaane Baŋa Wɛ ye a daa bá jwoori a ni dem kwaga ne.”
36Bukɔ wom de ma leiri o we, “A kwo, nmo na gwoni ni dedaane Baŋa Wɛ tei to, nam ma-ne n ke kolo n na tage de Wɛ we n wó ke to. Kokuri to Baŋa Wɛ pɛ se n ŋwe jene n dona Amon tiina bam baŋa ne.” 37O laam ma lwoori o kwo o we, “Amo nam lwoori‑m se n ke woŋo dedoa n pa-ne. Pa-ne pwola se a kwei chane selei a vo peero tem seeni, se a tɔge dedaane a yuudwonna a taa beera, se a keeri a na yeiri baaro ye a lage a te to ŋwaane.”
38Jefeta ma sɛ ye o we, “Tɔ. Nam véi!” O ma pa se o lage jei o vo o ke chane selei, wonto dedaane o yuudwonna maama. Ba ma maŋe peero tem laŋa ne ba keeri o na yeiri baaro ye o lage o te to ŋwaane. 39Chane selei sem déem na ti to, o ma jwoori o kwo wom tei. Jefeta ma kwei‑o o ke o na gwoni ni dedaane Baŋa Wɛ se o ke tei to ye bukɔ wom ta wo lɔre baaro.
Ko ma zege konto baŋa ne pa se Isarele tiina na chulu we, 40bene maama wone ba bukwa wó ma da yana mo ba nwoŋi ba keeri se ba guli Gilead tu Jefeta bukɔ wom gula.
Currently Selected:
Yiga tiina 11: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
