Hiburu 13
13
1Ta‑á jege-na da-swono se á yé yage, á na ye nu-bia daane to ŋwaane. 2Ta‑á yei-na se á ta‑á jeeri veira á sam ne lanyerane. Nɔɔna badwonna déem na ke konto dwoŋi to, ko ye Wɛ malese mo ba jeeri ye ba yeiri ba na ye balo to.#Pulim 18:2 3Ta‑á jege-na balo na wo peena diga ne to boboŋa, nenɛɛne abam de tɔge á wo peena diga ne mo tei, ye á zeini-ba. Ko ta ná ye balo nɔɔna na bɛɛse-ba to, se á ta‑á jege ba boboŋa nenɛɛne abam de tɔge á yaare mo tei.
4Baaro de kaane maama jege se ba taa zoore daane mo de swono de zula. Baro wom de kaane wom maama jege se ba taa tɔge chega mo da-tei ne. Wɛ nam wó waare balo na ke kabwoŋa, de balo maama na tɔge ka-laga wo-zɔɔna kikia to.
5Á yé pa se á ŋwea taa tɔge sabu-laga. Kolo maama á na jege to, se á pa ko maŋe abam ye á ba gwooni-ko. Kokuri Wɛ maŋe o ta o we, “Amo bá fɔge a yage abam kɔtaa.”#Nia Gulim 31:6; Josua 1:5
6Konto ŋwaane debam wó taa jege baare se dé ta we:
“Baŋa Wɛ mo ye amo zeinnu.
A daa bá taa kɔre foone.
Nabiina lage ba ke amo bɛ mo?”#Lei 118:6-7
7Ta‑á guli-na nɔɔna balo na ye á yiga tiina ye ba déem ŋɔɔne Wɛ kwora kam ba bere abam to gula. Maane-na á nii ba ŋwea na ye tei se ko vo ko yi ba toone to, se á daare á lwoni ba na jege wo-dedoa de Yezu Krista tei to. 8Maŋa maama Yezu Krista ye nenɛɛne o na maŋe o ye tei to mo, diim de zem maama, se ko taa vei wuu. 9Yé pa-na se nɔɔna taa mae berem-gɛ ba gane abam de wonnu dwi dwi se ko pa á ywori Wɛ tei ne. Nmo ná lage se n bochare ke dam de Wɛ, ko ye Wɛ zaane dem mo wó pa konto, ye ko bá taa ye wodiiru tedwonna dim ŋwaane. Balo na tɔge wodiiru dim chwoŋa to nam wo nɛ nyɔɔre ko baŋa ne.
10Yezu Krista na kwei o tete o ma kaane Wɛ debam ŋwaane tei to dae kaanem delo dwoŋi nɔɔna na wó di de nɔna yam to. Balo na toŋe Wɛ vwei dem wone ba pa‑o to ba jege chwoŋa se ba twori kaanem dento wone ba di. 11Ko na ke tei to, Wɛ kaanem nakwe tu wom yeini o go vara mo o kwei ba jana bam o ja zo Wɛ di-yun-gala kam se o ma saare nɔɔna bam wɛleera. Ko daare vara bam yera yam tete mo, ba laam wó kwei-ya ba ja nwoŋi dáa ba zwɛ maama.#Nwoŋim 29:14 12Yezu toone dem de tɔge konto dwoŋi mo. O ma yaare o te teo kom dáa ne, se o wane o ma o tete jana bam o saare Wɛ nɔɔna bam wɛleera se ba taa ye wose Wɛ yiga ne.
13Konto ŋwaane, pa-na se dé nwoŋi dé vo o tei teo kom dáa ne, se dé tɔge dé na o chaveera yam dwoŋi. 14Kokuri logo baŋa ywo-seeni debam ba jege teo kolo na wó taa ye dé kugu jei taa to, ye dé nam jege teena se dé na teo kolo na lage ko ba to mo.
15Pa-na se dé tɔge Yezu ŋwaane dé taa zuli Wɛ maŋa maama. Konto mo ye keim delo dé na wó kwei dé ma ke kaanem dé pa‑o to. Dé ni taane na zeiŋi Wɛ yere tei to mo ye dé pɛɛra yalo dé na wó ke o jeŋa ne to. 16Á yé swei se á ta‑á ke keim-laaro, se á daare á ta‑á woli daane. Dé ná yeini dé kwei kikia yanto dwoŋi dé ma kaane Wɛ, konto mo pa‑o wopwolo.
17Ta‑á nege-na á yiga tiina, se á daare á ta‑á sɛ ba ni. Banto kwaane ba nii abam ŋwea baŋa ne mo, ye ba yei we ba laam wó ba ba zege Wɛ yiga se o bwei-ba ba totoŋa yam ŋwaane. Nam ta‑á nege-ba se ba wane ba toŋe de wopwolo. Ko ná dae konto, ko wó pa ba wo chɔge, ye ko daa bá taa jege wolim ko pa abam.
18Ta‑á lwoori-na Wɛ á pa debam. Dé yeini dé kwaane se dé da chega chwoŋa mo maŋa maama, ye chaveera tera dé tei ne. 19Amo nam lage a kwoori abam se á ta‑á lwoori Wɛ á pa-ne, se ko pa a na chwoŋa a jwoori abam tei leile.
20Bochare-zuru Tu Baŋa Wɛ wó zeini abam. Wonto mo bi de Teiru Yezu toone wone de o na dɛ o jana bam ŋwaane o gwoni ni delo na wó taa wora taa wuu to. O laam ma pa o ye nayero chekke ye o wae o nii debam balo na nye de o pei sem to lanyerane. 21Wɛ wó zeini abam de wo-laaro telo maama na maŋe se á wane á ta‑á tɔge o boboŋa to, ye o tɔge Yezu Krista ŋwaane o fɔge abam, ne ko na wó pwoli o wo tei to.
Yezu maŋe de zula se ko taa vei wuu. Ameena.
22A nu-bia bam, a lwoori abam se á zuri á yera á cheigi amo na popone kolo a ma kwoori abam to. Amo na popone taane delo to nam ba dɔra.
23A lage se abam ta‑á yei we, ba yage dé nu-bu Timoti se o nwoŋi peena diga ne. O ná tu amo tei lela, a laam wó pa dé tɔge daane dé ba dé na abam.
24Jɔɔne-na á yiga tiina bam, de Wɛ nɔɔna bam maama á pa debam. Dé nu-bia balo na nwoŋi Yitalia to de jɔɔne abam.
25Wɛ zaane dem taa wo abam maama tei ne.
Currently Selected:
Hiburu 13: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
