Hiburu 12

Wɛ na jege o bia o koresa tei to

1Debam laam lɔre faŋa faŋa Wɛ nɔɔna bam na ye kɔgɔ kɔgɔ ye ba gilimi debam ba nii tei to. Ba chega kam maa bere debam Wɛ na woli-ba tei, ba na jege wo-dedoa ded‑o to ŋwaane. Konto ŋwaane, pa-na se dé yage wo-yɔɔro telo maama na daane debam pa se dé ware dé tɔge Wɛ lanyerane to. Pa-na dé le wo-lwanno telo na ye wɛleera ye te jege dé yera to dé yage, se dé daare dé vɔ pu-dɛa dé kwaane dé duri dé tɔge chwoŋa kalo Wɛ na tiŋi o pa debam to. 2Pa-na se dé yɔɔre dé taa nii Yezu seeni. Wonto nam mo bere debam dé na wó taa jege wo-dedoa de Wɛ tei to, ye o pa se dé taa jege wo-dedoa taa, se dé ja dé vo dé kweeli. O déem vɔge pu-dɛa mo ye o yaare o te dagara kam yuu ne. O wo pɛ se chaveera ja‑o ko ŋwaane, kolo ŋwaane o nɛ we Wɛ tiŋi ywoni mo se o pa‑o. O laam ma daare o vo o jeini Baŋa Wɛ paare yituŋu kom jazem seeni.

3Boŋe-na á nii Yezu na tiini o vɔ pu-dɛa de nɔn-chechɔgero na jege‑o ba yaale tei to. Á yé pa se jawɔrɔ zo abam se á yage Wɛ chwoŋa tɔgem. 4Abam na yeini á kwaane se á chɔge wo-balwaaro dam tei to daa ta wo yi se á na toone nɔɔna tei ne. 5Wɛ tɔnɔ kom nam jege taane delo na wó wane ko pa abam yera poore lanyerane, á na ye Wɛ bia to ŋwaane. Nam guli-na ko na bere abam tei ko we:

“Amo bu, Baŋa Wɛ ná jege‑m o koresa,

se n sɛ koresem.

O maa ná bwɛ nmo,

se n yé pa n nagwola te.

6Kokuri Baŋa Wɛ yeini o korese

o na swoi balo to mo.

Wɛ ná jwoŋi wolo maama se o taa ye o bu,

o yeini o pa se konto tu yera chɛ mo.”#Nia Gulim 8:5; Memaŋa 3:11-12; Gurim 3:19

7Abam ná nɛ yaara, se á pa ko taa ye á Kwo Wɛ mo korese abam o de chwoŋa ne. Á na ye Wɛ bia to mo pae o ke abam konto dwoŋi. Bu tera ye o kwo bá vaŋe o zwɛ se o pa o korese. 8Wɛ nam ná wo korese abam ne o na ke o bia bam maama tei to, ko bere we abam dae o bia chekke, á ye tampira mo. 9Dé logo baŋa kwoa bam na yeini ba vaŋe dé zwa tei to mo pae se dé nege-ba. Ko nam ná ye dé Kwo wolo na tei dé jworru to, ko maŋe se dé taa sɛ o ni se dé laam na ŋwea o tei ne. 10Dé logo baŋa kwoa bam yeini ba vaŋe dé zwa bena fenfee yerane mo se ko maŋe de ba boboŋa na lage tei to. Dé Kwo Wɛ nam ke konto se ko woli debam mo, se dé wane dé tɔge dé taa ye wose, ne wonto na ye tei to. 11Ko ná ye á koresem maŋa kam ne, ko yeini ko pa á wo chɔge mo ye á ba jege wopwolo. Ko kwaga ne, zwɛ vaŋem dem wó zeini balo de na pɛ ba korese to pa se ba na nyɔɔre, de ba ŋwea na jege chega de bochare-zuru tei to.#Job 5:17

12Konto ŋwaane, á vɔna ná bugi, naa á nagwola ná tega, kwaane-na se á ta‑á tɔge Wɛ chwoŋa de pu-dɛa.#Job 4:3-4; Izaya 35:3 13Fɔge-na á kwɛ chwoŋa kalo á na wó tɔge to se balo de na tɔge-ka ye ba ye gwane to yé to ba ŋoleme ba nɛ sem, se ko nam pa ba na yɔɔrem.

Dé yé ve Wɛ zaane dem

14Kwaane-na se á ta‑á zoore dedaane nɔɔno maama de ywoni, se á kwori á ta‑á jege wo-pwoŋo Wɛ yiga ne, kolo ŋwaane, nɔɔno ná ba jege wo-pwoŋo, o bá wane o na dé Teiru Wɛ. 15Fɔge-na á che á tete se nɔɔn-nɔɔno yé ga Wɛ zaane dem. Yé yage-na chwoŋa se nɔɔno wolo wo na ba lana to zaŋe á wone ye o daane abam pa se abam dedɛ na chɔgem Wɛ yiga ne.#Nia Gulim 29:18 16Á yé pa se á wolowolo taa ye ka-lageno, naa Wɛ-lwɛɛno ne Esawu déem na ye tei to. Wonto yiga tera de o na ye o kwo bu-kwea to. O kana maa wɔe, ye o kwei o nakwe nyɔɔre dem o ma leini o nyaane wom zoŋ-dia wodiu o di.#Pulim 25:33 17Abam maŋe á yei kolo na ke‑o kwaga seeni to. O ma jwoori o lage se o kwo sɔɔle Wɛ swolim o pa‑o, se ko maŋe de o na ye o bu-kwea to ŋwaane. O ma kwaane o lwoori chwoŋa o kwo tei ne taa, ye o ka yi-na. O maa wo nɛ chwoŋa, kolo ŋwaane o daa ware o jwoori o fɔge o keim dem.

18Abam nam tu á twɛ Wɛ, ye ko dae nenɛɛne ko déem na ke tei de Isarele tiina bam to. Banto déem tu peo kolo ba yi na nɛ ye ba wae ba dwei de jea to. Maŋa kalo Wɛ na kwei o nia yam o ke Moses jeŋa ne o pa-ba to, min-fɔrɔ, de lim, de doa mumunim wora, 19ko woli de nabɔnɔ wum, de kwora na ŋɔɔne. Balo na nigi Wɛ kwora kam konto to ma lwoori‑o se o daa yé jwoori o ta taane o woli da, 20kolo ŋwaane o na maŋe o kaane-ba tei to tiini ko dana ko pa-ba, de o na tage de-ba o we, “Kolo maama ná nɔne peo kom baŋa ne, ko ná ye varem mo de, se á dole-ko á go.” 21Wɛ na bere o dam dem ja konto to ma pa se Moses tete ta o we, “Foone tiini de zo-ne ye a yera sae.”#Nwoŋim 19:12-16

22Ko nam dae konto abam tei ne. Abam nam tu á yi peo kolo yere na ye Zion to mo. Ko maa ye Ŋwea Tu Baŋa Wɛ teo Jerusalem kolo na wo telaao ne to. Á na tu da to, Wɛ malese morro kɔgɔ kɔgɔ ma tigisi daane ye se wora se di ywoni. 23Abam tu á woli Wɛ kɔgɔ kom wone. Ko maa ye o bu-kwe sem kɔgɔ kom, ba yera na popone ya tiŋi Wɛ telaao tɔnɔ kom ne to. Ko ye Wɛ wolo na wó di nabiina maama taane to tei mo á tu á yi da. Balo na jege chega o yiga ne ye o laam pa se ba bochara kwɛ ya ti fase to jworru maa wo o tei ne. 24Á nam ta tu Yezu tei, wolo Wɛ na dɛ o ŋwaane o gwoni o ni-doore dem to. Ko ye Yezu jana bam ŋwaane mo pɛ á fɔge de Wɛ, ye ba dae nenɛɛne Abel jana bam na bere Wɛ ban-zɔŋɔ kom tei to.#Pulim 4:10

25Ta‑á yei-na se á yé zaŋe á ve wolo wom na ŋɔɔne to taane. Isarele tiina bam déem ve wolo na bere-ba Wɛ kwora logo baŋa ne to, ye ba wo wane ba lu Wɛ jeŋa ne. Debam nam ná ve wolo na wo telaao ne ye o ŋɔɔne de debam to, dé wó wane dé lu na? 26Faŋa faŋa to Wɛ kwora kam déem pɛ se tega baŋa maama ziziŋi. O laam nam pwooli we:

“Amo daa ta wó jwoori a pa tega kam ziziŋi bedwe,

ye ko dae kanto yerane,

ko laam wó woli de wɛyuu kom maama mo.”#Hagayi 2:6

27Wɛ na tage o we, o ta wó jwoori o ke konto dwoŋi bedwe to bere we, wonnu telo o na naane to mo o laam lage o ziziŋi o le te zega jei ne, pa se te daa yé taa wora. Wonnu telo na bá wane te ziziŋi to yerane laam wó daare.

28Wɛ nam pɛ se dé tɔge dé di paare delo na bá wane de ziziŋi to mo. Konto ŋwaane dé wó ke‑o lei. Dé maa wó pa‑o zula yalo na tɔge o boboŋa to, ye dé taa kɔre‑o lanyerane, 29kolo ŋwaane debam Tu Wɛ nye de min-fɔrɔ kolo na di wo-yɔɔro maama to mo.#Nia Gulim 4:24

Currently Selected:

Hiburu 12: KBG

Highlight

Copy

Compare