Hiburu 11

Wo-dedoa de Wɛ na pae nɔɔna ye tei to

1Nmo ná jege wo-dedoa de Wɛ, kokuri mo n yei lanyerane we, nmo wó seene n na wonnu telo n teena na tɔge to. Ko maa wó pa se n lɔre we, wonnu telo n na ba nae de n yia to seene te wora. 2Ko ná ye balo na maŋe ba da Wɛ chwoŋa faŋa faŋa to, ko ye ba na jege wo-dedoa tei to mo pɛ se ba yere zaŋe.

3Ko ye debam de na jege wo-dedoa tei to mo pae dé lɔre we, Wɛ mɛ o ni taane mo o ke logo baŋa de wɛyuu maama. Konto mo dé sɛ we Wɛ kwei wonnu telo na ba nae de yia to o ma ke telo na wora ye dé wae dé nae de yia to.

Abel#Pulim 4:4

4Faŋa faŋa to ko ye Abel na jege wo-dedoa tei to mo pɛ se o na kwei kolo o ma kaane Wɛ to dwoni Kain na kaane Wɛ tei to. O wo-dedoa kam mo pɛ se o yere zaŋe de o na ye chega tu Wɛ tei ne to, o pɛɛra yam na su Wɛ yi to ŋwaane. O daa tera, ye o wo-dedoa kam ŋwaane nam pae se o taane ta wora.

Enoki#Pulim 5:24

5Enoki de na jege wo-dedoa tei to mo pɛ se Wɛ le‑o logo baŋa ne ye toone wo jaane‑o. Wɛ na le‑o konto to, nɔɔn-nɔɔno daa wo nɛ o jei. Konto ta na wo ke to, o maŋe o jege yere de o na pwoli Wɛ wo tei to. 6Kokuri nɔɔno ná ba jege wo-dedoa de Wɛ, o bá wane o pa se Wɛ wo pwoli. Wolo maama na boŋe se o ke o tete Wɛ jeŋa ne to, ko fe mo se konto tu taa jege wo-dedoa o sɛ we, Wɛ seene o wora ye o zeini balo na lage se ba lɔre‑o to.

Noah#Pulim 6:9-22

7Noah de déem na jege wo-dedoa tei to mo pɛ se o sɛ Wɛ ni delo o na tage ded‑o to. Wɛ déem kaane‑o de kolo na lage ko ba ko ke ye nabiina yia ta wo nɛ-ko to. O na kɔre Wɛ to, o ma sɛ o kwaare nabwor-kamunu se o ma jwoŋi o sɔŋɔ tiina ŋwea. O keim dem konto ma bere we, nabiina balo na wo sɛ Wɛ ni to ba jege bora. Wonto tete nam nɛ chega Wɛ tei ne, ne Wɛ na yeini o ke o pa balo na sɛ‑o de ba wo-dedoa to tei.

Abaraham

8Abaraham déem na jege wo-dedoa tei to mo pɛ se o nwoŋi o tete teo kom ne o vo jeiga kalo Wɛ na pwooli we, o wó pa‑o se o dwi tiina taa tei taa to. Wɛ na bwoŋi‑o we o nwoŋi konto to, o ma seene o sɛ se o vo, ye o ta yeiri jei sem o na lage o vo to. 9O wo-dedoa kam ŋwaane mo pɛ se o vo o zoore jei sem konto ne, ne o ye veiru mo tei. O déem zoore vwei wone mo. Izaak de Jakob de maa tɔge ba zoore da konto dwoŋi, ye Wɛ ya pwooli kampwola o pa banto de. 10Ko bere we, Abaraham déem pɔe se o zo Wɛ tete teo kolo kuri na fɔge ko chwi lanyerane to mo. Ko ye Wɛ tete mo tei teo kom konto lɔɔm maama.

11Abaraham kaane Sara déem ye kadega mo ye o kɛ lora. De konto de, o na jege wo-dedoa tei to mo pɛ se o sɛ we, Wɛ bá kwane o ni dem o na tiŋi to ye o wane o lo bu.#Pulim 21:2 12Konto ŋwaane, ko zege nɔn-doa wolo na ye Abaraham ye o tiini o kwe to yera ne mo Wɛ pɛ o jege dwi kɔgɔ kɔgɔ. Nmo bá‑n wane n lɔre ba ni, ne chalechwe na daga wɛyuu ne de kasolo bia na wo naneo ni ne tei to.

13Nɔɔna bam konto maama nam tega, ye ba ta jege ba wo-dedoa. Ba nam wo nɛ wonnu telo Wɛ na pwooli se o pa-ba to. Ba déem maane we, wonnu tem dɛ wó dáane ye te laam ba, ye ba wo pwoli ko ŋwaane. Ba nam seene ba sɛ mo ja we, ba ye veira balo na ba jege kugu jei logo baŋa ne to mo. 14Balo na yeini ba tɛ konto dwoŋi to bere we, ba daa ta jege teena se ba na teo kolo na wó taa ye ba kugu jei to mo. 15Ba daa ba jege teo kolo ba na nwoŋi ko wone to boboŋa ba yuu ne. Ba ya ná jege boboŋa konto dwoŋi, ba ya wó wane ba na chwoŋa se ba jwoori. 16Ko nam na ye tei to, ba boboŋa tiini ya zo teo kolo na tiini ko lana ko gaale to. Konto mo ye Wɛ tete telaao kom. Konto ŋwaane, chaveera ba jege Wɛ de ba na bwoi‑o we ba Wɛ to. O nam maŋe o jege teo kolo o na wó pa-ba to.

Abaraham de o dwi tiina

17-18Ko ta woli da, maŋa kalo Wɛ na faŋe Abaraham se o nii to, Abaraham wo-dedoa kam ŋwaane mo pɛ se o ya lage o ma o bu Izaak o kaane Wɛ. Wɛ nam maŋe o pwooli ded‑o we, “Ko zege Izaak yera ne mo n dwi tiina wó puli.” De konto de, Abaraham déem ta boŋe se o ma o bu-doa kam o kaane Wɛ, ne Wɛ na bere‑o tei to. 19O boboŋa nam maŋe ya ja we, Wɛ wó wane o bi Izaak toone wone. Ko laam na seene ko ke tei to nye de o jwoŋi‑o toone wone mo.#Pulim 22:1-13

20Izaak tete de na jege wo-dedoa tei to mo pɛ o sɔɔle Wɛ swolim o yage o bia Jakob de Esawu yuu ne se ko vo wonnu telo na lage te ke to seeni.#Pulim 27:28-29, 39-40

21Jakob de na daare fee se o te to, o wo-dedoa kam mo pɛ se o sɔɔle Wɛ swolim o yage o bu Josɛf bia bam maama yuu ne.#Pulim 48:15-16 O déem ma chwi o nacheiga o tiiri ka baŋa ne ye o zuli Wɛ.

22Josɛf de maŋa na twɛ se o te to, o na jege wo-dedoa tei to mo pɛ se o ta de Isarele tiina bam we, ba wó nwoŋi Ejipti teo ne. O ma pa-ba ni we, ba ná nwoŋi, ba jege se ba guri o kwi sem mo Ejipti ne ba ja vo ba tete teo.#Pulim 50:25

Moses

23Ko woli da, Moses tiina déem na jege wo-dedoa tei to mo pɛ se ba kwei‑o ba seigi chane setɔ ba na loge‑o maŋa kalo to. Ba ma lɔre we, bu wom ye bu-laao, ye ba wo kɔre foone se ba ve Pa-faro wom ni dem.#Nwoŋim 2:2-3

24Moses déem na ke nɔɔno to, ko ye o wo-dedoa ŋwaane mo pɛ o wo sɛ se ba taa bwoi‑o we, Pa-faro wom bukɔ bu.#Nwoŋim 2:11 25O déem maa boŋe we, o ná tɔge de Wɛ nɔɔna bam o na yaara, ko wó taa gare o ná yage Wɛ chwoŋa ye o daare o di ywoni delo na bá dáane to. 26O nam boŋe o ja se nɔɔna taa yaale‑o Wɛ Dam Tu Krista ŋwaane, ye ko gare o ná nɛ jejegero dedɛ Ejipti ne, kokuri o boboŋa yeini ya tɔge nyɔɔre delo o na wó jwoŋi Wɛ tei ne to mo.

27Moses wo-dedoa kam ŋwaane mo pɛ se o nwoŋi Ejipti ne, ye o wo kɔre Pa-faro wom ban-zɔŋɔ kom. O maa jege baare, ye o wo sɛ se o jwoori o kwaga, kokuri o yei we, Wɛ wolo na ba nae de yia to wo o yiga ne. 28O na jege wo-dedoa tei to mo pɛ se o sɛ Wɛ ni, ye o pa Isarele tiina bam maama ke Atɔgebabaŋa wodiu ba sam ne ba di. O ma pa ba kwei jana ba ma mi ba sam nia ne, se toone maleka kalo na tu se ka go bakeiri-kwe sem maama to daa yé ke ba tete bia bam kolokolo.#Nwoŋim 12:21-30

Isarele tiina bam

29Isarele tiina bam na jege wo-dedoa tei to mo pɛ se ba wane ba bɛ Nane-soŋo kom. Wɛ ma pa se na bam pɔɔre belei ba daare te-kora ye Isarele tiina bam tɔge da ba bɛ. Ejipti tiina bam na kwaane se ba tɔge ba kwaga ba bɛ to, na bam ma jwoori ba ke daane pa se ba maama nyɔ na bam ba te.#Nwoŋim 14:21-22

30Wɛ nɔɔna bam na jege wo-dedoa tei to mo pɛ ba vo ba kaage Jeriko teo kom da yarepɛ, ye ko kabiri sem laam to tega ne.#Josua 6:12-21 31Ko daa ta ná ye Rahaba wolo na ye ka-tola ye o zoore Jeriko ne to, o na jege wo-dedoa tei to mo pɛ se o jeeri Wɛ nɔɔna balo na kare ba yere teo kom to lanyerane. Konto ŋwaane mo ba wo go‑o ba woli de balo na ve Wɛ to.#Josua 2:8-14; 6:23

Faŋa faŋa Wɛ nɔɔna bam

32Amo ya jege taane dedɛ se a ta a woli da, ye laŋa daa tera se a ŋɔɔne nɔɔna badaara taane a woli da. Amo ya wó ta Gideon,#Yiga tiina 6:11 de Baraka, de Samson, de Jefeta, de David, de Samuwel, de faŋa faŋa Wɛ sampwori sem maama taane mo. 33Banto bam maama jege wo-dedoa de Wɛ, ye ba mage jara ba wane teene kamunnu dedɛ. Ba ma kwori ba pa se nɔɔna taa tɔge chega chwoŋa. Ba ma daare ba na wolim delo Wɛ na pwooli se o pa-ba to. Nywonnu déem ma lage te chɔge-ba, ye ba wane ba che te chwoŋa.#Danyeli 6:22 34Ba ta ma wane min-lwanno telo na lage te chɔge-ba to ye te wo di-ba. Ba ma wane ba lu nɔɔna jeŋa ne pa se ba wo go-ba. Ba ya maa bwomma ye ba jwoori ba na dam. Ba ma tiini ba na baare se ba mage jara, ye ba wane ba zeili dwi-gɛ tiina balo na ye ba dona to pa se ba jwoori ba viiri. 35Kaana de jwoori ba jwoŋi ba nɔɔna balo ya na tega ye ba jwoori ba bi to.

Nɔɔna badwonna maa wo sɛ se ba jwoŋi ba tete balo na jege ba yera ba maga se ba go-ba to tei ne. Ba ma sɛ se ba te se ba wane ba jwoori ba bi ba na ŋwea Wɛ tei ne. 36Nɔɔna badaara yuu yaale de nɔɔna na mɔne-ba, ye ba daare ba fere-ba tei to. Ba ma vɔ nɔɔna badwonna, ye ba daare ba ke-ba peena diga ne. 37Ba ma kwei kandwa ba ma dole ba badwonna ba go. Ba ma gwoni badwonna yera yam kuni belei. Ba ma kwei se-zɔɔro ba ma go ba badwonna. Wɛ nɔɔna badwonna maa kare ba beera, ye ba zo pei de bone tankwallo yerane. Yiniga de cham ma ja-ba, ye nɔɔna de bɛɛse-ba. 38Nɔɔna balo na jege kugu jei logo baŋa ne to nam wo yi se ba de nɔɔna bam konto taa wora daane. Wɛ nɔɔna bam déem beeri kagoa yuu ne, de zwonnu jei ne. Ba maa zoore peero gugworru wone, de bɔɔna wone, ba na ba jege kugu jei to ŋwaane.

39Nɔɔna bam konto maama yere zaŋe de ba na jege wo-dedoa de Wɛ tei to. De konto de, ba nam wo nɛ kolo Wɛ ya na pwooli se o pa o nɔɔna to ba ti. 40Kokuri Wɛ boboŋa déem jaane se o ke kolo na tiini ko lana to debam ŋwaane. Konto ŋwaane, faŋa faŋa Wɛ nɔɔna bam déem wo nɛ chwoŋa se ba yi Wɛ wo-laaro tem ba ti ye debam ta wo woli ba wone.

Currently Selected:

Hiburu 11: KBG

Highlight

Copy

Compare