Hiburu 10
10
Yezu kaanem dem jege kuri taa wuu
1Ko ná ye Wɛ nia yalo o na ke Moses jeŋa ne to, ya lage ya bere wo-laaro tem de na wó jwoŋi Wɛ tei ne to na ye tei to mo. Ya nam ye lunluŋu yerane mo, ye ya dae bedwe de Wɛ telaao wonnu tem tete. Ya pae se nɔɔna jwoori ba kaane Wɛ bene maama wone se ko taa vei wuu. Konto ŋwaane, ya bá wane ya pa se balo na tɔge ya ŋwaane ba zuli Wɛ to bochara taa jege chega chekke. 2Wɛ nia yam ya ná wae ya pae balo na zuli‑o to wɛleera saare ya tia, ba ya daa bá lɔre we ba wɛleera ta wo ba yuu ne, ye ba ya bá boŋe se ba jwoori ba daa kaane Wɛ konto dwoŋi. 3Ba nam na jege se ba daa kaane Wɛ bene maama wone to pae se ba jwoori ba guli we ba wɛleera yam ta wo ba yuu ne mo. 4Kokuri nabiina wɛleera bá wane ya saare de na-bale de bone jana kɔtaa.
5Ko ye konto ŋwaane mo Yezu déem na lage o ba logo baŋa maŋa kalo to, o tage de o Kwo Wɛ o we:
“Nmo yiga tera de nabiina na yeini ba kwei vara de wodiiru
ba ma ke kaanem ba pa‑m tei to.
Nmo nam ke nabiinu yera mo n pa-ne.
6Ko ná ye vara zwɛɛm kaanem de wɛleera saarem kaanem,
ba kikia yam konto maama wo su nmo yi.
7Amo maa we,
‘Amo Kwo Wɛ, nii-ne da!
Amo tu se a toŋe nmo boboŋa na lage tei to,
ne ko na maŋe ko popone amo taane
nmo faŋa faŋa tɔnɔ kom ne tei to.’ ”#Lei 40:6-8
8Yezu maŋe o da yiga o ta de o Kwo Wɛ o we, “Nmo yiga tera de nɔɔna na yeini ba kwei wonnu ba ma kaane‑m tei to maama, nenɛɛne ko ná ye vara zwɛɛm kaanem naa wɛleera saarem kaanem. Kaanem dwi dem konto wo su nmo yi.” De konto de, nɔɔna na kaane Wɛ konto to maama tɔge o ni-dwoora yam na bere tei to mo. 9O laam ma daare o ta o we, “Amo Kwo Wɛ, nii-ne da! Amo tu se a ke nmo boboŋa na lage tei to.” Konto bere we Wɛ saare o da-yiga vara kaanem ni dem o yage, ye o daare o tiŋi chwo-doŋa se nɔɔna tɔge-ka. 10Chwo-doŋa kam nam tɔge Yezu Krista na ke o Kwo Wɛ boboŋa yam maama ye o kwei o tete yera o ma kaane‑o to mo. O ke konto bedwe yerane, ye ko jege kuri taa wuu, se ko pa dé taa ye wose mo Wɛ yiga ne.
11Logo baŋa kaanem tiina maama yeini ba jege se ba taa vei Wɛ yiga maŋa maama ba goe vara ba maa kaane‑o. Ba maa yeini ba ke konto dwoŋi dɛ maama ka, ye ba kikia yam konto ware ya saare wɛleera kɔtaa.#Nwoŋim 29:36 12Ko nam ná ye Yezu, wonto kwei o tete o ma kaane Wɛ bedwe yerane mo, ye ko jege kuri taa wuu se ko jwoŋi nɔɔna ba wɛleera wone. O na ke konto o ti to, o laam ma vo o jeini Baŋa Wɛ jazem seeni, 13ye o ta wora o cheigi maŋa kalo Wɛ na wó wane o dona maama o ke o dam kuri ne to. 14Kolo ŋwaane o kaane Wɛ kuni bedwe se ko pa nɔɔna balo o na wora o kwɛ ba bochara to taa ye wose se ko taa vei wuu.
15Ko woli da, Wɛ Sin-laao kom de zege wonnu tem konto chega kam kwaga ne o bere debam. Baŋa Wɛ déem dɛ ko baŋa o we:
16“Maŋa kam ná yia, ni delo amo na wó gwoni de a nɔɔna bam to mo tento:
Amo wó kwei a nia yam a tiŋi ba bochara ne mo,
ye a daare a popone-ya a yage ba boboŋa ne.”
17Wɛ ma daare o ta o we,
“Amo daa bá guli ba wɛleera de ba tusim kikia yam gula kɔtaa.”#Jeremia 31:33-34
18Wɛ na dɛ chwoŋa kam konto o yage dé keim-balwaaro tem o ma chɛ debam to, ko daa ba jege kuri se nabiina go vara ba ma kaane‑o ba wɛleera saarem ŋwaane.
Dé wó taa jege baare de Wɛ chwoŋa tɔgem
19A nu-bia bam, dé laam nɛ baare se dé zo Wɛ di-yun-gala kam na ye o swono jeiga to, Yezu Krista toone jana bam ŋwaane. 20Wonto nam pore chwo-doŋa o pa debam, ye kanto mo pae ŋwea. Ka maa tɔge gare-jale dem laŋa ka zoore Wɛ tei chekke. Kokuri mo ka tɔge Yezu yera yam ŋwaane, de o na kwei-ya o ma kaane Wɛ tei to mo. 21Konto to, debam jege wolo na seene o ye Wɛ kaanem tu chekke ye o nii Wɛ tete sɔŋɔ tiina baŋa ne to. 22Konto ŋwaane, pa-na se dé fofɔ de yi Wɛ tei de boboŋ-ŋona, de baare delo na bere we dé jege wo-dedoa de Wɛ to. Wɛ fɔge dé bochara pa se dé daa ba boŋa we, dé wɛleera ta wo dé yuu ne, ye dé yera na zarem de na-ŋona. Konto ŋwaane mo dé jege baare se dé zo Wɛ tei. 23Pa-na se dé bere we, dé jege teena Wɛ tei ne ye bobwea tera.#Lei 26:1 O nam tiŋi o ni o pa debam, ye o bá fɔge o kwane-de. 24Pa-na se dé taa yei da-ni ne, se dé taa zeini daane, ye dé jege da-swono, ye dé ke keim-laaro. 25Á yé pa se dé yage ka-taa-gilimi-daane Wɛ zula ŋwaane, ne badaara na ke tei to. Nam kwaane-na se á woli daane se ko pa á yera poore. Á na lɔre we dé Teiru wom dɛ dem lage de yi to, se á tiini á ta‑á ke konto.
26Nɔɔno ná lɔre Wɛ chega kam ye o ke-ka o boboŋa ne, ye o ta ná yeini o paale o ke o tusa, kaanem daa bá taa wora de na wó pa kotu wɛleera yam saare. 27Ko laam daare se foone mo taa jege‑o de Wɛ na lage o ke‑o tei to. Wɛ ná di o taane, o laam wó na chɔgem ye o zo min-fɔrɔ kolo na wó chɔge balo maama na done Wɛ to. 28Ko ná ye Wɛ nia yalo o na ke Moses jeŋa ne to, nɔɔno wolo ná yaale-ya, ye nɔɔna balei naa batɔ ná lɔge o kwaga ne, ba wó go konto tu ye ŋwaŋa bá taa wora. 29Ko daare nɔɔno ná yaale Wɛ tete Bu wom, konto tu chɔgem dem bá tiini de gaale na? Konto tu pae se Yezu jana balo Wɛ na dɛ ba ŋwaane o gwoni o ni dem to ye wo-yɔɔ mo. Ko nam ye jana bam konto mo Wɛ mɛ o le tusim kotu bochare ne. Ko woli da, konto tu ta twe Wɛ Sin-laao kom na jege Wɛ zaane ko pae nɔɔna tei to mo. Konto to, o bá tiini o na waarem na? 30Kokuri debam maŋe dé yei wolo wom na tage o we:
“Amo mo wó jwoori a ŋwe ba keim-balwaaro jene,
se ba na kolo na maŋe de-ba to.”#Nia Gulim 32:35-36
Ko ta popone we:
“Baŋa Wɛ wó di o nɔɔna bam bora.”
31Nɔɔno ná ke o tusi, ye Ŋwea Tu Baŋa Wɛ jeŋa ná zo‑o, ko wó tiini ko taa ye lɛɛro ko pa‑o.
32Nam guli-na á yia déem na tu ya poore de Wɛ chega kam ye kolo ke abam to. Á déem yaare dedɛ, ye cham dem wo wane abam, á na vɔge pu-dɛa to ŋwaane. 33Maŋa kadwoŋi ne ba yeini ba twe abam nɔɔna yiga ne, ye ba bɛɛse abam. Maŋa kadwoŋi ne de, á yeini á sɛ se á tɔge á woli balo de na nɛ yaara konto dwoŋi to. 34Kokuri á tɔge á na yaara de balo na wo peena diga ne to. Nɔɔna maa yeini ba vere abam wonnu ye á sɛ de wopwolo, kolo ŋwaane á yei we, á maŋe á jege kolo na tiini ko lana ye ko wó taa ye abam nyem taa wuu to.
35Á nam yé yage á na jege baare tei to. Kokuri de lage de pa á na nyɔɔre dedɛ Wɛ tei ne. 36Á jege se á zege lanyerane de pu-dɛa, se á wane á ke Wɛ boboŋa na lage tei to, se á daare á jwoŋi wo-laaro telo o na pwooli se o pa abam to. 37Wɛ kwora mo ye:
“Ko laam daare fee
se wolo na lage o ba to laam ba.
O nam bá dáane.
38Wolo nam na jege chega amo tei ne to
wó na ŋwea o wo-dedoa kam ŋwaane.
Konto tu nam ná kɔre foone ye o jwoori o kwaga,
o kikia bá su amo yi.”#Habakuki 2:3-4
39Debam nam tɔge dé dae balo na jwoori ba kwaga pa se ba na chɔgem to. Dé tɔge dé wo balo na ke ba wo-dedoa de Wɛ pa se ba jwoŋi ba ŋwea to wone mo.
Currently Selected:
Hiburu 10: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
