Nwoŋim 24

Ba fɔge ba sɛ Wɛ ni-gwonim dem

1 Baŋa Wɛ ma ta de Moses o we:

“Diini peo kom yuu se n ba amo tei. Nam ja Aron, de Nadab, de Abihu dedaane Isarele nakwa fuserepɛ n woli da.#Nwoŋim 28:1 Abam ta ná wo yiga yiga, se á tiiri á zuli-ne. 2Nmo yerane mo wó wane n fɔɔre n yi amo yiga. Ko daare Isarele nɔn-kɔgɔ kom maama ba jege se ba di peo kom yuu.”

3Moses déem ma tu o maŋe Baŋa Wɛ nia yam de o chullu tem maama o bere nɔɔna bam. Ba maama ma leiri de kwora dedoa ba we, “Baŋa Wɛ na we debam ke kolo maama to, dé wó ke.” 4Moses ma popone Baŋa Wɛ taane dem maama o tiŋi.

Tega na poore to, o ma lɔ kaanem bimbini peo kom teiŋa ne. O déem ta ma kwei kandwa fuga-yalei o chwi, se kandwɛ maama taa zege de pae Isarele dwia fuga-yalei yam. 5O ma toŋe Isarele tiina nɔn-donno tedwonna mo se ba kwei vara ba ma ke kaanem ba zwɛ ba pa Baŋa Wɛ. Ba ma daare ba kwei nabɛ-pɔle ba ma ke yazura kaanem ba pa Baŋa Wɛ. 6Moses déem ma pwori vara bam jana o ke zwe wone. O laam ma kwei jana balo na daare to o miisi o yage kaanem bimbini dem yera ne. 7O ma daare o kwei Wɛ Ni-gwonim tɔnɔ kom o ga o bere nɔɔna bam. Ba maama daa maa leiri ba we, “Baŋa Wɛ na we debam ke kolo maama to, dé wó ke. Dé wó sɛ o ni dem.”

8Moses laam ma kwei jana balo na wo zwe sem wone to, o miisi-ba o yage nɔɔna bam yera ne ye o we, “Jana banto mo bere we, ni-gwonim delo Baŋa Wɛ na ke de abam bera yanto baŋa ne to jege bu.”#Matiyu 26:28; Luka 22:20; Hiburu 9:20

9Moses ma ja Aron, de Nadab de Abihu dedaane Isarele nakwa fuserepɛ ye ba di peo kom yuu. 10Dáane mo ba déem nɛ Isarele tiina Wɛ wom. O nɛ sem kuri ne ko nye de pwola mo tiini ka peere ne Safira#24:10 Safira ye kandwɛ-nyeno kodwoŋi to, ka ta ye napwon-pwoŋo mo nenɛɛne wɛyuu kom. 11Isarele yiga tiina bam déem nɛ Baŋa Wɛ konto, ye o wo chɔge-ba. Ba ma di ye ba daare ba nyɔ dáane.

12 Baŋa Wɛ ma ta de Moses o we, “Diini n ba amo tei peo kom yuu ne. Nmo wó maŋe ywo-seeni mo se a kwei kandwa-pelɛ selo baŋa ne a na popone a bera yam de a nia yam se a nɔɔna bam taa tɔge to a pa‑m.”#Nwoŋim 32:15-19

13Moses ma zaŋe dedaane o zeinnu Josua se ba ti ba yiga ba nwoŋi.#Nwoŋim 17:9 Moses laam ma di peo kom yuu se o jeeri Baŋa Wɛ. 14O nam ya wuuri o ta de nakwa bam mo o we, “Abam maŋe-na ywo-seeni á ta‑á cheigi debam se dé jwoori dé ba. Aron de Hura wó maŋe á tei ne se wolo maama ná jege ni-kantɔgɔ de o dwoŋi, se ba kwɛ-ko ba pa abam.”

15Moses déem na diini Sinayi peo kom yuu to, kunkwoŋo ma kwoli-ko. 16-17Baŋa Wɛ nenɔŋ-fɔrɔ kolo na nyeene to ma tu ko jeini peo kom yuu ne. Isarele tiina bam na nii ba na Baŋa Wɛ nenɔŋ-fɔrɔ kom konto to, ko nye de mini mo na di bugi-bugi peo kom yuu ne. Kunkwoŋo kom ma kwoli peo kom da yaredo. Da yarepɛ dɛ dem ne, Baŋa Wɛ ma bwoŋi Moses se o ba o tei. 18Moses déem ma seene o di peo kom yuu o zo kunkwoŋo kom wone. O ma maŋe dáane da finna wea de tete maama.#Matiyu 4:2

Currently Selected:

Nwoŋim 24: KBG

Highlight

Copy

Compare