Nwoŋim 25

Wɛ wara-vwei dem taane

1 Baŋa Wɛ ma ta de Moses o we:

2“Ta n bere Isarele tiina bam se ba ja pɛɛra ba ba ba pa-ne. Nmo nam mo wó jwoŋi-ya se ko tɔge de nɔɔno maama boboŋa na jaane se o pa tei to.#Nwoŋim 36:5 3Nam jwoŋi pɛɛra yanto dwi ba tei ne:

Sabu-seŋa, de lu-nyenno, de channa, 4de gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to, de gare-fefale, dedaane boŋo koro, 5de pi-bea twanno telo ba na seini to, de twan-nyenno, de golesaa dɛ, 6de min-zwonnu nuga, de talwoŋ-ywoŋa kalo ba na wó ma ba ke Wɛ swolim nuga kam to, de kalo ba na wó zwɛ wara-vwei dem totoŋa ŋwaane to, 7de Onika kandwa, de kandwa-nyenno ya dwi ya dwi, se ba ke-ya kaanem nakwe tu wom gare-wogo kom ne, ba daare ba ke yadwonna o gare-pale dem yera ne.#Nwoŋim 28:6-21

8Amo lage se a nɔɔna bam chwi wara-diga mo ba pa-ne, se a taa zoore ba tetare ne. 9Wara-vwei dem á na wó chwi to, dedaane de wo wonnu maama jege se te maŋe de amo na wó bere‑m tei to mo.

Wɛ ni-gwonim dakaa kam

10Pa se nɔɔna bam kwei golesaa dɛ ba ma ke dakaa. Ka wó taa ye jatwogo de noa ni maŋem kuni belei de chichworo mo dedɔrem baŋa ne. Kayɔlɔ baŋa maa wó taa ye jatwogo de noa ni maŋem dedoa de chichworo. Ka baŋa seeni de maa wó taa ye jatwogo de noa ni maŋem dedoa de chichworo. 11Pa ba kwei sabu-seŋa na tiini ka ye chekke to ba ma kwoli ka yiga de ka kwaga maama, se sabu-seŋa tɔge ka nia yam maama. 12Kwei-na sabu-seŋa á ma á mɔ kwana yana se á kwei ya dedoa dedoa á lei dakaa kam nɛ sena maama yera ne. Kwana yalei wó ke dakaa kam saŋa dedoa ne, yalei maa wó ke saŋa kadwoŋi ne. 13Ba ta wó gwoni golesaa dɛ selei ba daare ba kwei sabu-seŋa ba kwoli dɛ sem konto maama. 14Laam pa se ba kwei dɛ sem ba tore dakaa kam kwana yam wone, se ba daare ba ja dɛ sem ba ma zeŋe dakaa kam. 15Maŋa maama dɛ sem konto wó maŋe kwana yam ne mo. Ba ba jege se ba daa le-se.#Hiburu 9:4-5

16Amo ná pɛ‑m amo ni-gwonim kandwa yalei yam#25:16 ni-gwonim kandwa yalei yam: kandwa yalo Wɛ na popone o nia yam ya baŋa ne to, se n kwei-ya n ke dakaa kam wone.

17Kwei-na sabu-seŋa kalo na tiini ka ye chekke to á ma á ke wɛleera saarem ni-pugu#25:17 ni-pugu kuri dedwoŋi ye jeiga kalo Wɛ na saare wɛleera mɛ to se ko pu dakaa kam. Ka dedɔrɔ baŋa nam wó taa ye jatwogo de noa ni maŋem belei de chichworo mo, se kayɔlɔ baŋa taa ye jatwogo de noa ni maŋem dedoa de chichworo. 18-19Nam kwei-na sabu-seŋa á ma á mɔ wonnu telei na nye de malese ye ba bwoi-ba we cherubi to. Pa se cherubi selei sem meeli se taa zege ni-pugu kom dɛ selei sem ne. Kwei-na sabu-seŋa kandwɛ-dale dedwe á mage-de á ke cherubi sem dedaane ni-pugu kom tete. 20Cherubi sem wó jeeri daane mo, ye se yibia chɔɔle tega ne se se taa nii dakaa kam ni-pugu kom seeni. Se vɔna de maa wó yarege wɛɛne, ye se laam kwaare se vɔna yam daane se ma-ya se kwoli ni-pugu kom. 21Laam kwei-na amo ni-gwonim kandwa yalei yam á ke dakaa kam wone, se á daare á kwei ni-pugu kom á pu ka ni. 22Amo wó taa tui ni-gwonim dakaa kam baŋa seeni a jeeri‑m cherubi selei sem tetare laŋa ne.#Lei 99:1 Dáane mo amo wó bere‑m a nia yam maama se Isarele tiina bam taa tɔge-ya.

Tabolo Kom

23Ta kwei-na golesaa dɛ á ma á ke tabolo. Ko dedɔrem baŋa maŋem wó taa ye jatwogo de noa ni kuni belei mo, se kayɔlɔ baŋa maŋem dem taa ye jatwogo de noa ni maŋem bedwe. Nam pa-na se tabolo kom wɛ-baŋa seeni maŋem taa ye jatwogo de noa ni maŋem dedoa de chichworo. 24Kwei-na sabu-seŋa na ye chekke to á kwoli ko yiga de ko kwaga maama, se á daare á pa sabu-seŋa kam tɔge ko nia yam. 25Sabu-seŋa kam na wó tɔge tabolo kom nia yam to wó taa ye da-yiga noa maŋem mo. 26Nam mɔ-na sabu-seŋa kwana yana á meeli tabolo kom nɛ sena sem na wo mɛ to. 27Kwana yam wó meeli ya taa bwola de tabolo kom nia yam mo, se dɛ selo ba na wó taa mae ba zeŋe tabolo kom to tore ya wone. 28Ko nam wó taa ye golesaa dɛ mo nmo wó kwoli de sabu-seŋa, se ba taa maa zeŋe-ko. 29Nam ta kwei-na sabu-seŋa na ye chekke to á ma á ke zon-tanlɛ, de zwe dwi dwi, de kabeili, de kambi selo na wó taa toŋe sana-pɛɛra kaanem totoŋa to. 30Tabolo kom wó taa wo amo wara-jei di-yuu kom ne mo maŋa maama, ye bworobworo kolo na ye ko yera ko tigi amo yiga ne to taa wo ko baŋa ne.

Min-zwon-zego kom

31Kwei-na sabu-seŋa na ye chekke to á ma á ke woŋo kolo min-zwonnu na wó taa zege ko baŋa ne to. Ma-na sabu-seŋa kandwɛ-dale dedwe á mage se á mɔ ko kuri, de ko daa kam, de zwe selo min-zwonnu tem na wó zege se wone to. Zwe sem wó taa nye de pun-kogela mo. 32Laam ke nɛ seredo se se nwoŋi daa kam yera ne. Nɛ setɔ wó taa wo jazem baŋa ne se setɔ taa wo jagwia baŋa ne. 33Nenɔŋa punnu tetɔ mo wó taa wo naga maama ne, se te taa nye de Aamonda pun-kogela de te vɔɔro. Nɛ seredo sem maama wó taa ye konto mo. 34Ko daa kam tete wó taa jege nenɔŋa punnu tena mo na nye de Aamonda pun-kogela de te vɔɔro to. 35Pun-kogele dedwe maama na wo daa kam yera ne to wó teili nɛ selei selo maama na jeeri daane ka yera ne to. Konto to, pun-kogela yatɔ mo wó teili nɛ seredo sem. 36Pun-kogela yam, de nɛ seredo sem, de daa kam tete maama ye se ba mage sabu-seŋa kandwɛ-dale dedwe mo ba ma ke-te.

37Nam pa se ba ke min-zwonnu terepɛ se te taa zege nɛ seredo sem yuni ne de daa kam yuu ne. Kwei-na-te á zege se te taa di te pae pwooni min-zwon-zego kom yiga seeni. 38Á ta wó kwei sabu-seŋa kam na ye chekke to á ma á ke wonnu telo na wó fɔge te kwɛ mini dem to, dedaane zon-tanlɛ selo ba na wó taa mae ba pɛ tentwarem dem to. 39Kwei-na sabu-seŋa kalo dunni na maŋe de kilo fintɔ-tenu ye ka ye chekke to á ke min-zwon-zego kom de ko zela yam dwi dwi. 40Nam pa se ba ke woŋo maama se ko maŋe de tetei amo na bere‑m peo kom yuu ne to.”

Currently Selected:

Nwoŋim 25: KBG

Highlight

Copy

Compare