Nwoŋim 23

Ka-taa-jege-chega taane

1Yé zaŋe n pa vwa taane jage. Nam yé bore vwa bora n woli nɔn-balɔrɔ.

2Yé tɔge kɔgɔ kom se n sɛ keim-lwanno totoŋa. Taane ná wora ye n jege maana, se n yé kweele chega kam, nɔɔna dedɛ ná maŋe ba fɔ vwa tei maama de. 3Yé pa nɔɔno di bora o na ye yiniga tu to ŋwaane.#Chullu 19:15

4Nmo ná beeri n yi n dono nabea, naa o bonaga, se n ja-ka n jwoori n vo n pa ka tu. 5Nmo ná nɛ we n dono bonaga zela dum pane-ka tega ne, yé gaale n kɛ. Woli-ka se ka zaŋe wɛɛne.

6Yiniga tu ná jege taane, se n yé kweele o chega kam. 7Yé zaŋe n fɔ vwa n pa nɔɔno se n ma n de‑o taane dim baŋa ne. Nɔɔno ná jege chega, se n yé go‑o. Nmo ná ke konto dwoŋi, a bá ma a chɛ‑m. 8Yé sɛ se n jwoŋi dim bora borem ŋwaane. Keim dem konto yeini de dwei dedɛɛra yia mo pa se chega ba tɛa. Nɔn-ŋona de maa gugwoli ba ni taane.

9Ko dae se á yaare veira, kolo ŋwaane abam de déem ye veira mo Ejipti teo ne, ye á yei ŋwea kam konto na ye tei to.

Ka-toŋe-ka-daare chullu

Chullu 25:1-7

10Kwei-na bena yaredo maama á du wodiiru á kare ne se á ta‑á zage-te. 11Bene delo maama na wó ke yarepɛ to, se á yage á kare se se taa tigi da kafɛ.#Chullu 25:2-7 Bene dem konto ne, yiniga tiina balo na zoore á tetare ne to laam wó zo se wo ba lare wodiiru tem ba di. Ba ma ná daare kolo, se á yage-na se kago-vara de zo ba di. Ta ke-na konto dwoŋi de kare selo á na jeiri Vini teeni de Olivi teeni se wone to de.

12Abam jege da yaredo mo se á ma á toŋe. Da yarepɛ dɛ dem ne, yé toŋe-na kɔtaa! Konto wó pa á na siu, de á nabɛ, de á bonɛ, de á kabɛ, dedaane veira balo na zoore á tetare ne to. Konto wó taa pae á jege dam.#Chullu 23:3; Maake 2:27

13Yɔɔre á ta‑á ke á tɔge a na bere abam tei maama to. Yé zuli-na wɛ dedwoŋi, ye ko dae amo. Yé bwoŋi-na wɛ dedwoŋi naa jwoni dedwoŋi yere.

Bene maama wo kura yatɔ

14Bene maama wone abam jege se á yeini á di kuri kuni betɔ mo se á ma‑á zuli amo:

15Bene maama Abibi chana kam#23:15 Abibi chana kam = Lweeru chana da yadwonna wone, se á di Bworobworo-memene kuri dem. Kwei-na da yarepɛ á di bworobworo kolo na ba jege sabɔle ko wone to. Kanto chana kam ne mo á déem nwoŋi Ejipti teo kom ne.#Nwoŋim 12:14-20; Jeelim 28:16-25; Nia Gulim 16:1-8 Á na yeini á zuli amo konto to, nɔɔn-nɔɔno yé ba amo yiga ne ye o ba zei kaanem pɛɛre.

16Mena zagem maŋa nam ná yia, se á di Ga-kwea kuri dem. Kwei-na mena yalo á na dɛ yiga á zage to, á ba á pa-ne.#Nwoŋim 34:22; Chullu 23:15-21; Nia Gulim 16:9-12

Ko woli da, abam ná yeini á toŋe á kare totoŋa maama á ti, se á laam di Faao kuri dem.#Nwoŋim 34:22; Chullu 23:33-43; Nia Gulim 16:13-15

17Kuni betɔ bene maama wone á baara bam jege se ba jeeri amo wolo na ye Yuu-tu Baŋa Wɛ wom to yiga ne mo konto dwoŋi.

18Abam ná lage á go varem se á ma o jana bam á ke kaanem á pa amo, se á yé woli bworobworo kolo na jege sabɔle ko wone to. Nam lɔre-na se á zwɛ varem wom lara kam maama dɛ dem konto ne. 19Bene maama wone se á ja á kare wodiiru telo na lwoori yiga te ke ye te lamma to á ja á jeeri abam Tu Baŋa Wɛ wara-jei sem ne.#Chullu 23:9-14

Nɔɔn-nɔɔno yé kwei bebala de ka nu nayela o saŋe mini wone.

Baŋa Wɛ bera

20Nii-na! Amo lage a toŋe amo maleka mo se ka che abam ka ja ka yi jei selo amo na kwɛ se a pa abam to. 21Ta‑á nege-na maleka kam se á daare á sɛ ka taane dem maama. Amo pɛ-ka dam se ka taa toŋe amo totoŋa. Abam wolo ná ve-ka, ka bá yage ka ma chɛ kotu. 22Abam nam ná sɛ ka ni ye á daare á ke a na we á ke tei to chekke, amo laam wó sɛ se abam dona taa ye amo dona, se a daare a chuli balo na zege abam zega to. 23Ko ná ye Amori tiina bam, de Hiti tiina bam, de Pɛrizi tiina bam, de Kanaan tiina bam, de Hivi tiina bam dedaane Jebusi tiina bam, amo maleka kam wó ja abam se á zo ba tega kam á jwoŋi, ye a daare a chɔge-ba pa se ba jei.#Josua 5:14 24Abam nam ná yi-da, yé tɔge á tiiri teene dem konto jwona yam yiga ne á zuli-ya. Nam yé lwoni-na ba totoŋ-balwaaro tem. Chɔge-na ba jwona yam dedaane kandwa yalo ba na chwi ya ŋwaane to.

25Ta‑á zuli-na amo na ye á Teiru Baŋa Wɛ to yerane. Abam ná ke konto, amo wó ke zaane a yage á wodiu dedaane á na baŋa ne. Amo wó taa cho se jaweero yé ja abam. 26Abam kaana bam de wone, ba wolowolo bá ja puga se ka chɔge. Kadega maa bá taa wora. Á maama ŋwea maa wó tiini ka dáane lanyerane.

27Amo wó pa se foone tiini de ja balo maama abam na wó jeeri to, pa se vuvuga to ba tetare ne.#Josua 2:9 Amo wó pa se á dona maama pipiri ba duri ba daare abam. 28Amo ta wó pa se keilimuni taa tɔge á yiga ye se daare se zeili Hivi tiina bam, de Kanaan tiina bam, de Hiti tiina bam na chege abam chwoŋa to. 29A nam bá zeili ba maama abam yiga ne bene dedoa wone. Amo ná ke konto, tega kam wó ji kagoa yerane mo. Ko wó pa kago-vara tiini ba gaale se ba daane abam. 30A lage a taa zeili-ba fenfee mo se ba nwoŋi abam yiga ne, se ko yi maŋa kalo abam na wó puli á su logo kom maama to. 31Abam tega kam laŋa wó zege Nane-soŋo kom ni ne mo se ka taa vei Mediterania naneo kom seeni. Ka ta maa wó zege kagoa kam seeni ka vo ka yi Yuferata buga kam ne. Ko ná ye balo na zoore jei sem konto ne leile to, amo wó ke-ba abam dam kuri ne. Abam maa wó zeili-ba se ba nwoŋi á yiga ne.

32Yé ke-na ni-sɛɛm de-ba. Nam yé sɛ-na ba jwona yam. 33Bere á yé sɛ se banto taa zoore abam tega kam baŋa ne. Kolo ŋwaane, ba wó soge abam mo se á tusi amo yiga ne, ye ba ja abam se á zuli ba jwona yam.

Currently Selected:

Nwoŋim 23: KBG

Highlight

Copy

Compare