Efesia 2

Wɛ ŋwe-doŋa kam taane

1Abam déem ye balo na ve Wɛ ni, ye á to tusim chwoŋa ne to mo. Ko ma pa se á ŋwea tera Wɛ tei ne. 2Á déem ma tɔge chwei selo na ye logo baŋa wo-yɔɔro tem nyem to, ye á daare á tɔge setaana pɛ wolo na tei wɛyuu telaŋ-pwolo chichiri sem to. Wonto maa ye setaane delo laam na tei balo na ve Wɛ ni to. 3Debam maama déem tɔge nɔɔna bam konto chwei sem mo, ye dé ke wo-zɔɔna yalo dé fera na zoore to. Dé ma yeini dé tɔge wo-zɔɔna keim, ne dé boboŋa de dé yera na lage tei to mo. Debam na maŋe dé ye tei to mo bere we, Wɛ ban-zɔŋɔ kom ya jege se ko ba debam baŋa, nenɛɛne nɔɔna badaara de na ye tei to.

4Ko daare Wɛ nam tiini o jege nɔɔna ŋwaŋa se ko gaale. O maa tiini o swoi debam dedɛ. 5Konto ŋwaane mo o pɛ debam o ŋwe-doŋa kam, dé na me de Yezu Krista to ŋwaane. Wɛ na zeini debam konto to, ko ye maŋa kalo dé déem na tɔge tusim chwoŋa ye dé ba jege ŋwea o tei ne to mo. Wɛ nam mɛ o zaane dem mo o jwoŋi abam o yage.#Kolosia 2:13 6Dé na me de Yezu Krista to, Wɛ ma pa dé tɔge ded‑o dé bi dé na o ŋwe-doŋa kam, ye o daare o zeiŋi debam se dé tɔge de Yezu dé na jeiŋa jei telaao ne. 7Wɛ na ke debam lanyerane Yezu ŋwaane konto to ye se ko taa bere nɔɔna maŋa maama se ko taa vei wuu we, o zaane dem tiini de beiŋi. 8Wɛ zaane dem mo o mɛ o jwoŋi abam o yage, á na jege wo-dedoa de Yezu to ŋwaane. O nam tɔge de ŋwaane o chɛ abam zɛɛra mo, 9ye ko dae abam kikia ŋwaane, se nɔɔn-nɔɔno yé wane o ke teera Wɛ yiga ne. 10Wɛ ye debam Keiru mo. Dé na me de Yezu Krista to, o ma fɔge debam de o ŋwe-doŋa kam, se dé taa tɔge keim-laaro chwoŋa kalo o na maŋe o tiŋi o pa debam se dé da to.

11Abam nam jege se á guli á déem na ye tei ye Wɛ ta wo jwoŋi abam to. Ba wo loge abam Juu tiina wone. Á ye dwi-gɛ tiina mo. Balo na bere ba tete we ba ye Wɛ nɔɔna ye ba gwoni ba peina to mo yaale abam de á na yeiri peina gwonim to. Banto na gwoni ba yera tei to nam tɔge nabiina kikia mo. 12Kanto maŋa kam ne, abam de Yezu Krista déem yeiri da-jei. Ko ná ye Isarele dwi tiina kɔgɔ kom, á déem tere ba wone. Ko ta ná ye Wɛ nia yalo o na gwoni de o nɔɔna ye ya tɔge o kampwola kam ŋwaane to, abam yiga ta tɔge ka tera de-ya. Á déem na jege á ŋwea logo baŋa ne tei to, Wɛ tera á tei ne, ye á ba jege teena kolokolo baŋa ne. 13Ko daare abam laam tu á me de Yezu Krista. Wonto toone jana bam ŋwaane ma pa se á ba á yi Wɛ tei, ye á ya maŋe á ye balo na ye yiga yiga ded‑o to mo.

14Yezu Krista mo ye bochare-zuru tu ye o pa se ywoni wo debam laŋa ne, de o na pɛ Juu tiina bam de dwi-gɛ tiina bam ba ba ji bedwe to. O ma saare siseini delo na pwɛ-ba ye ba chuli daane to. 15O na sɛ se ba go o yera to mo pɛ se Juu tiina ni-kaana yam ji kafɛ, de ya na bere chullu telo maama to. Konto baŋa ne mo o fɔge Juu tiina bam de dwi-gɛ tiina bam o ke daane, se ba maama ji Wɛ kɔgɔ dedoa, ba na me ded‑o to ŋwaane. 16Ba maama na ye kɔgɔ dedoa konto to, o ma fɔge ba de Wɛ daane. O tɔge o toone dem dagara yuu ne ŋwaane mo o pa se ba daa ba chuli daane.#Kolosia 1:20

17Yezu Krista na tu to, o ma pa dé lɔre Wɛ kwor-ywoŋa kam we, debam maama fɔge daane, ko ná ye abam dwi-gɛ tiina balo déem na ye yiga yiga ded‑o to, naa debam Juu tiina balo na maŋe dé bwola ded‑o to de.#Izaya 57:19 18Yezu Krista ŋwaane mo debam maama jege chwoŋa se dé taa vei Wɛ tei, Wɛ Sin-laao kom na ye dedoa ye ko wo dé maama tei ne to ŋwaane.#1 Korinti 12:13

19Abam balo na ye dwi-gɛ tiina to daa dae veira, nenɛɛne balo yiga na tera Wɛ nɔɔna bam wone to. Abam laam ye tembia mo Wɛ nɔɔna bam wone, ye á tɔge á ye Wɛ sɔŋɔ kom bia. 20Á tɔge á ye Wɛ kɔgɔ kom nɔɔna mo, ye kɔgɔ kom konto nye de o tete sɔŋɔ kom. Yezu Krista totoŋa nakwa bam de Wɛ sampwori sem mo chwi sɔŋɔ kom kuri, ye ko maama zege Yezu ŋwaane. Wonto mo ye kandwɛ-zane delo na pae diga kam zega dana to.#Lei 118:22-23 21O maa pae se sɔŋɔ kom lɔɔm maama tɔge daane lanyerane, ye o pa ko puli dedɛ se ko taa ye dé Teiru wom wara-jei. 22Abam tete de tɔge de Wɛ nɔɔna bam maama á woli o kɔgɔ kom wone, á na me de Yezu to ŋwaane. Konto mo á nye de Wɛ sɔŋɔ kolo o na wora o lɔa, ye o laam wó tɔge o Sin-laao kom ŋwaane o taa zoore ko wone to.

Currently Selected:

Efesia 2: KBG

Highlight

Copy

Compare