Efesia 3
3
Pɔɔl na toŋe o pa dwi-gɛ tiina tei to
1Konto ŋwaane mo amo Pɔɔl yeini a lwoori Wɛ a pa abam. Amo na toŋe Yezu Krista totoŋa a pa abam dwi-gɛ tiina to laam mo pɛ se ba ke-ne peena diga ne. 2Abam wó ta‑á yei amo ni ne, de Wɛ na pɛ se a toŋe a pa abam o zaane dem ŋwaane to. 3Abam nam nigi we, Wɛ mo le chega kalo déem na seigi o wone to o bere-ne. Amo maŋe a popone chega kam konto taane fenfee. 4Abam nam ná gaga amo na popone kolo to, á wó lɔre amo boboŋa na zo Yezu Krista chega kam tei to. 5Faŋa faŋa to, Wɛ wo pɛ se nabiina lɔre o chega kam konto. O laam tɔge o Sin-laao kom baŋa mo o le-ka o bere Yezu totoŋa nakwa bam de o ni-jwoŋina bam. 6Wɛ chega kam konto tɔge o kwor-ywoŋa kam ŋwaane mo, ye ka bere we, dwi-gɛ tiina balo na me de Yezu Krista to wó tɔge de Juu tiina ba jwoŋi wo-laaro telo Wɛ na tiŋi se o pa o nɔɔna bam to. Ba na me de Yezu Krista to, ba de ye Wɛ tete kɔgɔ kom nɔɔna mo, ye ba laam wó jwoŋi kolo maama Wɛ na pwooli se o pa o nɔɔna bam to.
7Wɛ tɔge o zaane dem ŋwaane mo o zeini-ne de o dam-fɔrɔ kom se a taa toŋe o kwor-ywoŋa kam totoŋa. 8Amo nam mo ye wolo na tiini a muri Wɛ nɔɔna bam maama wone, ye Wɛ daa ta pa-ne totoŋ-ŋom dem konto, se a taa vei dwi-gɛ tiina tei a tɔɔle o kwor-ywoŋa kam a bere-ba, se ba lɔre Yezu Krista wo-laaro tem na tiini te beiŋi ye te ba jege tiim to.#1 Korinti 15:9 9Amo maa jege se a pa nabiina maama mo lɔre Wɛ chega kam jaja, de Wɛ na pɛ se ka tɔge chwei selo to. Wonto mo naane wonnu maama. Ko zege boboa ne, chega kam konto maŋe ka seigi o wone. 10O ma seigi-ka se ko ba ko yi zem maŋa kam, se o laam tɔge Yezu kɔgɔ kom ŋwaane o pa se dedɛɛra balo maama na jege dam wɛ-baŋa jei sem ne to lɔre o swa yam na daga yera yera tei to. 11O maa tɔge o boboŋa yalo o na maŋe o ja faŋa faŋa to, ye o laam pa se ya seene ya ke dé Teiru Yezu Krista ŋwaane. 12Dé na me de Yezu Krista to, o maa pae dé jege baare. O ta ma pa debam chwoŋa se dé taa vei Wɛ tei ye dé ba kɔre foone, dé na ke dé wo-dedoa ded‑o to ŋwaane. 13Abam nam yé pa se á boboŋa chɔge de amo na yaare tei abam ŋwaane to, se ko ye abam yuu zeiŋim ŋwaane mo.
Yezu swono kom na ye tei to
14Konto ŋwaane mo amo yeini a kuni dwoona dé Kwo Wɛ yiga ne. 15Ko ná ye Wɛ telaao ne, naa logo baŋa ne, balo maama nɔɔna na jege-ba ba bwoi we ba kwoa to kuri nwoŋi dé Kwo Wɛ wone mo. 16Wɛ zaane dem na tiini de beiŋi to ŋwaane, amo yeini a lwoori‑o mo se o tɔge o Sin-laao kom baŋa o pa á bochara na dam, 17se Yezu Krista taa tigi á boboŋa ne, de á na ke á wo-dedoa ded‑o to ŋwaane. Amo ta lwoori‑o mo se o pa á ta‑á jege swono kolo na wó pa á nɛ tiini se kwaare tega ne to, 18se á wane á tɔge de Wɛ nɔɔna bam maama á lɔre Yezu Krista swono kom na mae tei to. Yezu Krista swono kom na tiini ko gaale tei to nye de woŋo na tiini ko yala ye ko dɔra, ko daare ko ye baŋa baŋa ye ko luuna dedɛ to mo. 19O swono kom maa dwoi se nabiina lɔre ko na ye tei to ba ti. Wɛ nam wó pa se abam lɔre-ko, se Wɛ ŋwea kam laam su á bochara maama.
20Pa-na se dé zuli Wɛ wom na wae wonnu maama o ke to, de o na yeini o zeini debam de o dam dem se ko tiini ko dwoni kolo dé boboŋa na laga ye dé lwoori‑o to. 21Debam balo na ye o nɔn-kɔgɔ kom ye dé me de Yezu Krista to, Wɛ maŋe se o taa nae zula debam tei ne maŋa maama se ko taa vei wuu. Ameena.#Rom 16:25-27; Judi 24-25
Currently Selected:
Efesia 3: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
