Efesia 1

1Amo Pɔɔl wolo Wɛ na tiŋi-ne de o tete boboŋa se a taa ye Yezu Krista totoŋa nakwe to mo popone tɔnɔ konto. A popone se a pa abam balo na ye Wɛ nɔɔna ye á zoore Efesia ne to.#Kikia 19:1-20 Abam maa ye balo na tɔge Yezu Krista de á wo maama to.

2Dé Kwo Wɛ, de dé Teiru Yezu Krista wó pa abam zaane de yazura.

Wɛ na zeini o bia tei to

3Baŋa Wɛ wolo na ye dé Teiru Yezu Krista Kwo to maŋe de teem. O yɔɔre o swɛ debam swolim, ye o fɔge dé bochara de wo-laaro telo maama na ye o Sin-laao kom nyem ye te nwoŋi Wɛ telaao ne to, dé na me de Yezu Krista to ŋwaane. 4Boboa ne ye logo baŋa daa ta tera to, Wɛ tɔge Yezu ŋwaane mo o kuri debam se dé taa jege wo-pwoŋo o yiga ne ye tusim tera. 5O na jege debam swono to mo o wuuri o ke o boboŋa ne se o pa dé tɔge Yezu Krista ŋwaane dé ji o bia. Mo o boboŋa na lage se o ke kolo to. 6Konto ŋwaane Wɛ maŋe se o na zula lanyerane de o zaane dem na ba jege dwoŋi to. Wɛ kwei o zaane dem konto o pa debam zɛɛra, dé na ye balo na me de o Bu-swono Yezu to ŋwaane.

7Dé na me ded‑o konto to, o mɛ o toone jana bam mo o ŋwe dé wɛleera jene, se ko pa Wɛ saare dé wɛleera yam.#Kolosia 1:14 Mo Wɛ zaane dem na tiini de beiŋi tei, 8ye o ma-de o zeini debam se ko ja gaale, ye o pa dé na swa de yi-poro lanyerane. 9O ma pa dé lɔre o chega kalo déem na seigi to. Mo o na lage se o ke kolo to, se ko pa dé lɔre we, o boboŋa maŋe ya ja se o tɔge Yezu ŋwaane mo o fɔge wonnu maama o ke daane. 10O nam boŋe se, maŋa kam o na lage to ná yi ka ti, se o pa o boboŋa seene ya ke, se wonnu maama mo ke daane se Yezu Krista taa ye te maama yuu tu, ko ná ye telaao wonnu tem, de tega baŋa wonnu tem maama de.

11Dé na me de Yezu to ŋwaane mo Wɛ kuri debam se dé taa ye o nyem. Konto mo ye kolo Wɛ na maŋe o ke o boboŋa ne se o ke o pa debam to. O maa ye wolo na pae se wonnu maama yɔɔre te ke nenɛɛne o boboŋa na lage tei to. 12Ko ná ye debam balo na dɛ yiga dé kwei dé teena dé daŋe Yezu Krista baŋa ne to, Wɛ déem kuri debam se dé taa ye balo na wó pa o na zula o nenɔŋ-fɔrɔ kom ŋwaane to mo. 13Ko woli de abam balo laam na tu á sɛ Wɛ chega kam to, abam nigi Wɛ kwor-ywoŋa kalo na pɛ á na verem to, ye á ke á wo-dedoa de Yezu Krista. Á na me ded‑o konto to, Wɛ ma ke o Sin-laao kom á bochara ne, nenɛɛne o na pwooli se o ke tei to, ye ko ye maana mo ko pa abam se ko bere we á seene á ye o nyem. 14Wɛ Sin-laao kom na wo dé bochara ne to, ko dɛ yiga ko tiŋi chwoŋa se ko pa dé lɔre we, dé laam wó ba dé na wo-laaro telo maama Wɛ na tiŋi se o pa debam to. Ko ta bere debam we, maŋa wó yi se Wɛ fɔge o jwoŋi debam balo maama na ye o nyem to. Ko maama wó pa se Wɛ na zula o nenɔŋ-fɔrɔ kom ŋwaane.#2 Korinti 1:22

Pɔɔl lwoori Wɛ o pa-ba

15Wɛ na tiini o zeini abam konto to, amo yeini a ke‑o lei abam ŋwaane maŋa maama. Amo nigi abam taane we, á tɔge dé Teiru Yezu de á wo-dedoa, ye á kwori á jege Wɛ nɔɔna bam maama swono. 16Konto ŋwaane mo a ke Wɛ lei ye a kwori a lwoori‑o a pa abam. 17Baŋa Wɛ maa ye dé Teiru Yezu Krista Yuu-tu, ye o ye debam Kwo wom na jege paare telaao ne to. A maa yeini a lwoori‑o se o tɔge o Sin-laao kom baŋa o zeini abam de swa de boboŋ-dɛɛra, se á wane á lɔre o chega kam maama. 18Wɛ wó pa á yia poore se á wane á lɔre o na kuri abam se á ta‑á jege teena o tei ne tei to, se á daare á lɔre o wo-laaro tem na tiini te beiŋi tei ye o tiŋi o ni se o kwei-te o pa balo na ye o nyem to. 19Wɛ wó pa se á lɔre o dam dem na daga de gaale tei, ye o ma-de o zeini debam balo maama na sɛ‑o to. O dam-fɔrɔ kom konto bere o na wae o toŋe totoŋ-kamunnu tei to. 20O déem mɛ-de o bi Yezu Krista toone wone mo, ye o daare o ma-de o zeiŋi‑o o pa o jeini o jazem seeni telaao ne.#Lei 110:1 21Konto mo Yezu Krista laam tei wonnu telo maama na jege dam nabiina baŋa ne to. Ko ná ye dedɛɛra maama, de paare maama, o dam dem dwoi te maama. Ko ná ye zem wonnu tem dam mo, naa jwa wonnu telo na lage te ba to, Yezu dwoi woŋo kolo maama na jege yere ko pa nabiina to. 22Wɛ ma kwei wonnu maama o ke Yezu Krista dam kuri ne, ye o daare o tiŋi‑o se o taa ye o kɔgɔ kom yuu tu, se o taa tei wonnu maama o pa-ba.#Lei 8:6 23Yezu kɔgɔ kom konto nam mo nye de o yera yam, ye ko pae se o ŋwea jege kuri. Yezu tete de maa pae se woŋo maama na wo jei maama ne to jege kuri.

Currently Selected:

Efesia 1: KBG

Highlight

Copy

Compare