Nia Gulim 33
33
Moses lwoori Wɛ swolim Isarele dwia yam maama ŋwaane
1Wɛ swolim delo o tontoŋeno Moses déem na sɔɔle o ke Isarele tiina bam yuu ne ye o laam te to mo tento:
2“Baŋa Wɛ déem zege Sinayi peo kom ne
o ba o veere o tete o pa o nɔɔna bam.
O ma zaŋe Edom zwonnu tem yuu ne
nenɛɛne wea na puli tei to,
ye o zege Paran peo yuu ne
o nyeene pwooni ba baŋa ne.
Malese kɔgɔ kɔgɔ mo wo o tei ne,
ye mini de wo o jazem seeni de pepela.
3Chega to, Baŋa Wɛ jege o nɔɔna bam swono.
O maa cho balo o na pɔɔre o pa o tete to.
Konto ŋwaane mo ba chɔɔle ba tete o yiga ne
se ba sɛ o bera yam.
4Dé sɛ Wɛ nia yalo Moses na pɛ debam to,
ya na ye debam dwi dem lonne na dwoi maama to.
5Isarele dwi tiina de ba yiga tiina bam maama na lage daane to,
Baŋa Wɛ déem mo jigi pɛ o nɔn-swonnu tem #33:5, 26 nɔn-swonnu tem: Hiburu = Jesurun baŋa ne.”
Ruben dwi dem yera taane:
6“Wɛ bá pa se Ruben dwi dem saare,
de ba na maŋe ba ba daga to de.”
7Judah dwi dem yera taane:
“Baŋa Wɛ, cheigi Judah dwi tiina bam,
de ba na lwoori zeinim nmo tei ne to.
Pa se ba jwoori ba fɔge de ba dwia yadwonna yam.
Kwei dam n ke ba jeŋa ne,
se ba dona yé wane-ba.”
8Levi dwi dem yera taane:
“Baŋa Wɛ, kwei n Yurim de Turim kandwa yam
n ke n tontoŋena Levi dwi tiina bam jeŋa ne
se ba ma lɔre n boboŋa. #Nwoŋim 28:30
Ba na wo Massa ne to,
nmo déem faŋe-ba mo n nii.
Ba ta na wo Meriba buli-yi dem seeni to,
n ta jaane de-ba mo.
9Ba nam bere ba chega de nmo,
ye ba toŋe ba tɔge n bera yam de n ni-gwonim dem,
se ko dwoni ba kwoa, de ba niina, de ba chorro, de ba bia.#Nwoŋim 32:25-29
10Ba yeini ba bere n nɔɔna Isarele tiina bam
se ba taa sɛ n bera yam.
Ba ta zwɛ talwoŋ-ywoŋa nmo yiga ne,
ye ba daare ba zwɛ vara n bimbini dem baŋa ne
ba ma ke kaanem ba pa‑m.
11 Baŋa Wɛ, swɛ Levi dwi dem swolim,
se ba taa jege dunni,
se ba kikia de taa pwoli nmo wo.
Chɔge ba dona maama,
se ba daa yé jwoori ba zaŋe.”
12Benjamin dwi dem yera taane:
“Dwi dento mo Baŋa Wɛ tiini o swoi.
O maa cho-ba se kolokolo yé yi-ba.
O maa wo ba tei ne maŋa maama,
pa se ba sii o woro wone.”
13Josɛf dwi dem yera taane:
“Baŋa Wɛ wó swɛ ba tega kam swolim,
pa se nyɔnɔ nwoŋi wɛyuu,
se na de taa bura ba nwoŋi tega kuri ne ba pa-ba.
14Wea wó taa pae se ba wodiiru taa bera lanyerane,
ye ba na dedɛ chane sem maama wone.
15Faŋa faŋa zwonnu tem wó faare de teeni-bia,
ye wodiiru de wó ke lanyerane peero tem yuu ne.
16Josɛf dwi tiina wó na wo-laaro telo maama na puli tega baŋa ne to.
Baŋa Wɛ wolo déem na zege sabara kam wone o ŋɔɔne to
wó ke zaane ba yuu ne.#Nwoŋim 3:2-6
Wɛ wó zeini-ba konto,
Josɛf déem na jigi o chorro tem yiga tu to ŋwaane.
17Josɛf jege dam ne nabea mo tei.
O bia balei, Efrayim de Manasɛ nye de kago-vara nyea yam
na wae ba dona ya chua to mo.
Efrayim jege jar-keira morro kuni fuga,
ye Manasɛ de jege jar-keira morro morro.
Ba wae dwi-gɛ tiina bam ba zeila
ba ja vo ba yi logo baŋa kweelim jei.”
18Zebulun de Isakara dwia yam yera taane:
“Zebulun dwi tiina bam, ta‑á jege-na wopwolo,
de á na nwoŋi á beeri yiga yiga tei to.
Isakara dwi tiina bam, ta‑á jege-na wopwolo,
de á na maŋe sɔŋɔ ne tei to.
19Ba wó bwoŋi dwia yadwonna tiina
se ba ba ba di peo kom yuu
ye ba ke kaanem delo na ye chekke to ba pa Wɛ.
Ba nae ba dunni dem pipiu baŋa ne mo,
ye ba na tɔge naneo kom wo ba beeri to
ba ta guri wonnu telo na seigi kasolo kom wone to de.”
20Gad dwi dem yera taane:
“Baŋa Wɛ ye wolo na wó pa Gad laŋa kam taa daga to.
Tei-na o yere!
Gad yɔɔre o pɔe mo ne nywoŋo tei.
O lage o zi varem
se o ja ko jeŋa naa ko yuu o kaare.
21O ma kuri tega kalo na tiini ka lamma to o pa o tete.
Isarele dwia yam yiga tiina bam na gilimi daane
se ba pɔɔre tega kam to,
mo ba le nakwe popɔra ba pa‑o.
O ma toŋe o tɔge Baŋa Wɛ chwoŋa kam chekke,
ye o sɛ Wɛ nia yalo o na pɛ Isarele tiina bam to.”
22Dan dwi dem yera taane:
“Dan nye de nywoŋ-pɔla mo.
O zege Basan ne mo o faŋe o nwoŋi.”
23Nafitali dwi dem yera taane:
“Nafitali dwi tiina totoŋa yam mo su Baŋa Wɛ yi,
ye Wɛ tiini o swɛ ba swolim.
Ba laŋa kam wó tɔge naneo kom#33:23 naneo kom = Galili naneo kom
de tega-kuri seeni maama.”
24Asere dwi dem yera taane:
“Wɛ wó swɛ Asere dwi tiina bam swolim,
se ko dwoni dwia yadwonna yam maama.
Ba chorro tem wó taa swoi-ba.
Ba ta wó na Olivi nuga dedɛ ba tega kam ne.
25Ba wó ma luuru de channa mo
ba fɔge ba pe ba teene dem manchwo-nia yam.
Ba ta wó na dam se ko yi ba ŋwea da yam maama.”
26“Baŋa Wɛ nɔn-swonnu tem,
wɛ dedwoŋi daa tera de na nye de Baŋa Wɛ wom.
O jege nenɔŋa mo ye o dɔge kunkwonnu baŋa ne
o kaare wɛyuu maama o duri o ba se o zeini abam.
27Taa-wuu Baŋa Wɛ mo ye abam dalem jei.#Lei 18:2
O maa teili abam o jea ne ye o ba yaga.
O daa ta zeili á dona á yiga ne
ye o we, ‘Yɔɔre á chɔge-ba-na!’
28Konto to, Isarele dwi tiina bam nɛ pwola
se ba taa zoore de wo-zuru.
Jakob kwaga kam nɛ ba kugu jei.
Wɛyuu nyɔnɔ maa bugi tega kam
ye ka su de mena de sa-ywoŋo.
29Isarele dwi tiina bam, á jege yu-ywoŋo!
Dwi tera de na nye de abam.
Ko ye abam mo Baŋa Wɛ jwoŋi o yage.
O maa kwoli abam
ne jara nantana na kwoli nɔɔno jara wone tei to.
O daa ta nye de se-zɔɔ á jeŋa ne
se o zeini abam jara wone.
O wó pa á wane á dona á di,
pa se ba lwoori yibwona á tei ne.
Á nam wó nɔne-ba á se tega ne.”
Currently Selected:
Nia Gulim 33: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
