Nia Gulim 30

Ba na wó ke tei se Baŋa Wɛ jwoori o ke-ba lanyerane

1“Amo laam nam bere abam Wɛ swolim dem de o sɔɔlem dem na wó taa ye tei to. Wonnu tento maama ná seene te ke abam baŋa ne, ye á Tu Baŋa Wɛ wom ná zeili abam o jage se á ta‑á zoore dwi-gɛ tiina tetare ne, á wó guli te gula. 2Abam de á kwaga kam laam ná pipiri á jwoori á Tu Baŋa Wɛ wom tei ye á sɛ o ni de á boboŋa maama de á wo maama, ne amo zem na bere abam tei maama to, 3Baŋa Wɛ wó duri á ŋwaŋa ye o jwoori o ke abam lanyerane. O wó pa á zege teene delo wone o na jage abam to se á jwoori ywo. 4Á ná maŋe á jage mo a zo logo kom gugworru yiga yiga de, Baŋa Wɛ wó la abam dáane o ja jwoori ywo. 5O wó pa á jwoori á zo tega kalo á nabaara déem na tei to, se abam tete de taa tei-ka. O ta wó pa se á fɔge á puli á dwoni á nabaara bam déem na ye tei to. 6Baŋa Wɛ wó kwɛ abam de á bia bochara, se á ta‑á wae á swoi‑o de á boboŋa maama, de á wo maama, se á dáane tega kam ne. 7O ta wó pa se lwarem delo o ya na sɔɔle o ke abam baŋa ne to yage abam se de pipiri de ba á dona baŋa ne, de balo maama na chuli abam to. 8Á wó jwoori á sɛ Baŋa Wɛ kwora ye á toŋe á tɔge o nia yam maama amo na pɛ abam zem to. 9Á Tu Baŋa Wɛ wom wó pa se á ŋwea ke lanyerane ye á totoŋa maama taa jege nyɔɔre. O ta wó pa á ta‑á jege bia dedɛ, de vara dedɛ, de wodiiru dedɛ. Ko wó pwoli o wo se o ke abam lanyerane, ne o yi déem na page á nabaara bam baŋa ne tei to mo. 10Abam nam jege se á sɛ á Tu Baŋa Wɛ wom kwora ye á toŋe á tɔge o nia de o bera yalo na popone ya tiŋi Wɛ nia tɔnɔ konto ne to mo. Á jege se á pipiri á jwoori o tei mo de á boboŋa maama de á wo maama.

Ŋwea de toone taane

11Wɛ nia yalo amo na pɛ abam zem to ba tiini ya dwoi á jaanem. 12Ko dae we ya tigi wɛyuu ne mo, se á ta‑á bwei da-tei ne we, ‘Wɔ mo wó wane o di o ja-ya o jwoori o ba o pa debam, se dé wane dé ni se de daare dé sɛ?’ 13Ko dae we ya wo naneo kom kakam daa ne, se á ta‑á bwei nenɛɛne, ‘Wɔ mo wó yɛ na o bɛ naneo kom o ja-ya o jwoori o ba o pa debam, se dé wane dé ni ye dé daare de sɛ?’ 14Aawo, ya zege ywo mo ya bwola de abam. Ya maŋe ya wo á ni ne de á bochara ne. Konto to, sɛ-na-ya chekke.#Rom 10:6-8

15Amo zem pɛ abam chwoŋa mo se á kuri lanyerane de balɔrɔ tetare ne kolo á na lage to, se á ta kuri ŋwea de toone de tetare ne. 16Amo zem pɛ abam ni se á ta‑á swoi á Tu Baŋa Wɛ wom se á daare á ta‑á tɔge o chwei sem, ye á sɛ o nia yam de o bera yam de o chullu tem maama. Á ná seene á ke konto, Baŋa Wɛ wó swɛ abam swolim pa se á fɔge á puli tega kalo á na lage á zo á jeini ka wone to. 17Ko daare, á ná lɔge o kwaga ne ye a ve o nia yam, ye á fera ná zo wa-yɔɔro se á zuli-te, 18ta‑á yei-na we á wó na chɔgem se á ti lela. Á ná vei á bɛ Jɔdan buga kam se á zo tega kam á ta‑á tei, á bá dáane ka wone ye á te.

19Zem dɛ dento ne a kwei wɛyuu kom de tega kam baŋa maama mo, se te taa ye maana abam de Baŋa Wɛ tetare ne. A pɛ abam chwoŋa se á kuri ŋwea de toone tetare ne, se á ta kuri Wɛ swolim de o sɔɔlem dem tetare ne. Konto to, twori-na ŋwea, se abam de á kwaga kam wane á ta‑á ŋwe, 20se á daare á ta‑á swoi á Tu Baŋa Wɛ wom á kwori á sɛ o kwora ye á sale‑o. Baŋa Wɛ ye wolo na wó pa abam momwɛ-dɛɛre, ne á ná zo tega kalo o na pwooli de á nabaara Abaraham de Izaak de Jakob se o pa-ba to wone.”

Currently Selected:

Nia Gulim 30: KBG

Highlight

Copy

Compare