Nia Gulim 26

Wodiiru zagem pɛɛra

1“Abam ná tu á zo tega kalo á Tu Baŋa Wɛ wom na lage o pa abam se á ta‑á tei to ye á ná jeini da, 2nɔɔno maama jege se o le wodiiru telo na lwoori yiga te ke o tega kam ne to o ke kayaa wone, se o ja o vo jeiga kalo Baŋa Wɛ na wó kuri se nɔɔna zuli o yere da to mo. 3Nmo wó vo n ta de Wɛ kaanem tu wolo na wora o nii jei sem da yam konto ne to n we:

‘A tɛ chega Baŋa Wɛ wolo nmo na toŋe n pa‑o to yiga ne we amo seene a zo tega kalo Baŋa Wɛ na gwoni ni de dé nabaara bam we o wó pa debam to wone.’ 4Kaanem tu wom wó jwoŋi n kayaa kam o zege Baŋa Wɛ kaanem bimbini dem yiga ne. 5Nmo laam wó ta taane dento nmo Tu Baŋa Wɛ wom yiga ne we:

‘Amo nabaaro déem ye Aram tu na yeini o beeri to mo. O déem ma ja o diga tiina o vo Ejipti o zoore dáane. Ba déem na vei da to, ba ye fenfee yerane mo, ye ba laam ba ba puli ba ji dwi delo na dana lanyerane.#Nwoŋim 1:1-5 6Ejipti tiina bam ma bɛɛse debam de je-dɛa ye ba fe debam pa se dé toŋe totoŋ-dɛɛra dé pa-ba. 7Dé laam ma kaase dé jare dé nabaara Baŋa Wɛ wom se o zeini debam dé chanɛɛre dem wone. O déem ma maane dé yaara yam dedaane dé wo-chechɔgɔ kom, ye o daare o sɛ dé wɛ-lworo kom. 8Baŋa Wɛ ma tɔge o dam baŋa ne o toŋe wo-kamunnu dedaane wo-kenkagela se o ma fugi Ejipti tiina bam ye o daare o vere debam ba jeŋa ne. 9O ma ja debam o ja ba ywo-seeni ye o pa debam te-ŋoŋa kanto na ywomma de varem de kɔnɔ to. 10Mo kokuri amo laam kwei wodiiru telo na lwoori yiga te ke tega kam ne to se a pa‑o. Baŋa Wɛ, ko ye nmo mo pɛ-ne wodiiru tem konto.’

Laam kwei kayaa kam n zege Baŋa Wɛ bimbini dem yiga ne se n daare n tiiri n zuli‑o da. 11Nmo dedaane n sɔŋɔ tiina wó di ywoni lanyerane, wo-laaro telo Baŋa Wɛ na ke o pa abam to ŋwaane. Levi tiina de veira balo na zoore á tetare ne to dé wó tɔge de abam ba di ywoni.

Wodiiru Wɛ-teiri

12Bena yatɔ bene dem maama wone, á ná le popɔra dedoa á wodiiru tem popɔre fuga wone se á pa Wɛ, kwei-na Wɛ-teiri dem konto á pa Levi tiina, de veira, de botara, de kadeina. Á ná ke konto, balo na zoore á teene dem ne to wó na wodiu ba di ba su. 13Á laam maa wó daare á ware á Tu Baŋa Wɛ wom á ta we:

‘Amo seene a tɔge n ni dem ye a le Wɛ-teiri delo na ye nmo nyem to a sɔŋɔ ne a kwei a pa Levi tiina, de veira, de botara, de kadeina mo. A bere a wo lɔge n bera yam kwaga ne naa a swei ya swia de fenfee de. 14Ko ná ye Wɛ-teiri dem, maŋa kalo a na wo lua wone to de, a wo di wodiiru tem konto kolokolo. A na digiri Wɛ chullu tem seeni to, a wo le kolokolo te wone a ja nwoŋi. A nam wo kwei-te a ma zuli twa. Amo Tu Baŋa Wɛ, a tɔge nmo ni dem chekke ye a ke nmo na bere-ne tei to maama. 15Konto to, zege n wɛyuu sɔŋɔ kom ne n tiiri n nii n nɔɔna Isarele tiina bam se n swɛ debam swolim, se n daare n nii tega kalo n na pɛ debam ne n na gwoni ni de dé nabaara bam se n ke tei to. Ka maa ye te-ŋoŋa na ywomma de varem de kɔnɔ to.’

Baŋa Wɛ nɔɔna na maŋe se ba toŋe tei to

16Abam Tu Baŋa Wɛ wom zem bere abam se á toŋe á tɔge o nia yanto de o chullu tento lanyerane. Ta‑á sɛ-na-ya de á boboŋa maama de á bochare maama. 17Á zem tage jaja we Baŋa Wɛ mo ye abam Tu Wɛ, se á ta‑á tɔge o chwei sem chekke. Á nam ta wó toŋe á tɔge o nia yam, de o bera yam, de o chullu tem maama, ye á sɛ o kwora kam. 18Baŋa Wɛ de zem tage jaja we o kuri abam se á ta‑á ye o tete nɔɔna balo o na jega lonne ŋwaane to, ne o na maŋe o pwooli tei to. Abam nam ye se á ta‑á sɛ o nia yam mo. 19O ta wó pa se á yere zaŋe de dwoni dwia yalo maama o na ke to, pa se á na zula de tia ba tei ne. Abam wó ta‑á ye nɔɔna balo á Tu Baŋa Wɛ wom na pwɛ o pa o tete, ne o na maŋe o pwooli se o ke tei to.”

Currently Selected:

Nia Gulim 26: KBG

Highlight

Copy

Compare