Nia Gulim 25

Wɛ nia yadwonna

1“Abam nɔɔna balei ná saŋe daane se ba di taane, ba wó bore bora ba pa dedoa ye wowom wom to. 2Wolo na to to ná maŋe se ba mage‑o, dedɛɛro wom wó pa se o peini o puga baŋa ne mo se ba laam fere‑o. Ferem dem na wó taa mae tei to nam jege se de maŋe de lwarem delo o na ke to mo. 3Ba jege chwoŋa se ba fere‑o se ko yi kuni finna mo. Ko ba jege se ko dwoni konto. Ko ná dwoni konto, á wó tiini á gwooni kotu mo.#2 Korinti 11:24

4N ná jege nabea n ma n toŋe n faao, yé vɔ ka ni se ka yé wane men-bia bam ka di.

5Chorro telei ná zoore daane sɔŋɔ dedoa ne ye dedoa ná tega ye o ba jege bakeira, o kadeim wom ba jege se o zo pwooni yiga nɔɔno. Too wom choro kom mo jege se o swo kadeim wom, ne ko na maŋe se o ke tei to. 6Ba na wó lo da-yiga bakeira kalo to wó taa ye too wom bu mo, se o dwi dem yé saare Isarele dwi tiina bam wone.

7Too wom choro kom nam ná ba lage se o swoi‑o, kadeim wom wó vo teo kom manchwo-peena yam ni ne o jeeri nakwa bam mo ye o ta de-ba we, ‘Amo baro choro kom ba lage se o toŋe kolo na wó pa se o choro kom na dwi Isarele dwia yam wone to.’ 8Teo kom nakwa bam laam maa wó bwoŋi‑o se o ba ye ba ŋɔɔne ded‑o. O ta ná ve se o swo kadeim wom, 9kaane wom laam wó fɔɔre o yi o tei mo nakwa bam yiga ne, ye o le nɔɔno wom natere dedwe o daare o twe lileeru o ke o yibia ne, ye o ta o we, ‘Tento mo ba jege se ba ke de wolo na ve se o pa o choro kom lo dwi to.’ 10Isarele dwi tiina bam laam wó taa bwoi nɔɔno dwi dem konto we, ‘Ba na le nɔɔno wolo natere dedwe to sɔŋɔ tiina’.

11Baara balei ná jege daane ye ba dedoa kaane yi se o zeini o baro wom, o ná jaane baaro wowom wom manchala seeni mo o vaŋe, 12yé duri-na kaane wom ŋwaŋa. Nam gwoni-na o jeŋa.

13-14Yé zaŋe n pini nɔɔna de n na maŋe wonnu tei n yeigi to. Ko dae se n ta‑n jege luuru telei n tampɔgɔ wone n ma n maŋe wonnu dum, naa n jege bwɛ selei na dae bedwe to. 15Nam ma luuru de bwɛ selo na ye chekke to yerane n ta‑n ma n maŋe wonnu n yeiga. Ke konto se n wane n dáane tega kalo á Tu Baŋa Wɛ wom na lage o pa abam to wone de momwɛ-dɛɛre. 16Kokuri to, abam Tu Baŋa Wɛ wom chuli balo na toŋe yanto totoŋa ye ba pini ba dwonna to.

Amaleki tiina bam chɔgem

17Guli-na Amaleki tiina bam déem na ke abam tei maŋa kalo á na nwoŋi Ejipti ne á maa kɛ to.#Nwoŋim 17:8-14 18Á déem na bugi ye á bwona maŋa kalo to, ba jeeri abam chwoŋa ne ye ba go abam balo na wo kwaga ne ba waleme ba vei to maama. Konto mo ba mɛ ba bere we ba ba kɔre Wɛ. 19Mo kokuri, á Tu Baŋa Wɛ wom ná tu o pa se á dona maama daa yé daane abam ye á sii de wo-zuru tega kalo o na lage o pa abam se á ta‑á tei to wone, se á laam saare Amaleki tiina bam logo baŋa maama ne se nɔɔn-nɔɔno daa yé guli ba gula. Yé swei-na se á ke konto!”

Currently Selected:

Nia Gulim 25: KBG

Highlight

Copy

Compare