Nia Gulim 24

Baaro de o kaane taane

1“Abam wolo ná swo o kaane ye o laam ba o ba lage kaane wom, o na ke kolo na jege chaveera to ŋwaane, kotu wó wane o popone kaane yagem tɔnɔ o pa‑o ye o zeili‑o se o viiri.#Maake 10:4 2O ná ke konto ye kaane wom vo o zo baaro wodwoŋi, 3pa se wonto de laam ba o boŋe we o daa ba lage kaane wom ye o de popone kaane yagem tɔnɔ o ma zeili‑o o sɔŋɔ ne, naa o baro balei tu wom ná tega, 4o boboa baro wom ba jege chwoŋa se o jwoori o swoi‑o maŋa de maŋa, kaane wom na chɔge o tete de baaro wodwoŋi wom to ŋwaane. O ná jwoori o swoi‑o, o chugi Baŋa Wɛ yi mo. Yé ja-na wɛleere dem konto dwoŋi á vo á chɔge tega kalo á Tu Baŋa Wɛ wom na lage o pa abam se á ta‑á tei to.

5Nɔɔno ná swo ka-dooro ye ba ta wo ke bene dedoa daane, o dae se ba woli‑o jar-keira wone, naa se ba pa o toŋe kɔgɔ wo totoŋa. Pa-na se o kwɛ totoŋa bene dedwe se o wane o maŋe sɔŋɔ ne o pa se o kaane wom wo pwoli.

Wɛ nia yadwonna

6N ná kwei woŋo n jene n pa nɔɔno ye o lage se o tiŋi daare, nam yé kwei o diga kam namim n ja n viiri, ko na ye kolo o de o diga tiina na mae ba ke ba ni-wodiu to ŋwaane.

7Nɔɔno wolo maama ná zi o ja o dwoŋi Isarele tu se o fe‑o se o ji o kabaa naa o yeigi‑o mo o pa kabɛɛne ne, kotu jege se o te mo. Ke-na konto se á saare lwarem dem konto á tetare ne.

8Naywaane#24:8 naywaane naa jaweero tedwonna na ke ŋɔna ye te lɔgese nɔɔna to jaweo kom ná jege‑m, fɔge n ta‑n yei se n ke ne Wɛ kaanem tiina bam na wó bere‑m tei maama to. Tɔge-na bera yalo amo na maŋe a pa-ba to chekke. 9Guli-na á Tu Baŋa Wɛ wom na toŋe tei de Miriam maŋa kalo á na nwoŋi Ejipti ne á maa kɛ to.

10N ná kwei woŋo n jene n pa nɔɔno, ye tɔge n zo o diga se n jwoŋi gɔrɔ kolo o na lage o ma tiŋi daare to. 11Ta‑n pɔe pwooni ne se o tete ja o nwoŋi o pa‑m. 12O ná ye yiniga tu, yé pa se o gɔrɔ kom peini n sɔŋɔ ne. 13Wɛ ná lage de zo, se n jwoori n kwei o gɔrɔ kom n pa‑o se o ma o kwoli o tete. Keim dem konto wó pa se o ke nmo lei ko ŋwaane. N Tu Baŋa Wɛ wom de wó pa ko taa ye totoŋ-laao mo n kea.

14Nabwom ná toŋe o pa‑m sabu ŋwaane, se n yé zaŋe n peene‑o, o ya ze ye n choro Isarele tu, naa veiru mo na zoore n teo kom wone to. 15Dɛ maama ŋwe o sabu n pa‑o se wɛ laam zo. O na ye yiniga tu to, o teena wo sabu kom baŋa ne mo. N ná wo ŋwe‑o, o wó kaase o jare Baŋa Wɛ mo n ŋwaane, pa se ko ji wɛleere n yuu ne.

16Kwoa ba jege se ba te ba bia kikia ŋwaane. Bia de nam ba jege se ba te ba kwoa kikia ŋwaane. Nɔɔno ná maŋe se o te, ko wó taa ye o tete yuu lwarem ŋwaane mo.

17Ko ná ye botara de veira balo na zoore á wone to, yé vane-na ba chega se ba yé na bora. Nam yé kwei kadeim gare-jale n ma n tiŋi daare. 18Guli-na we abam déem ye kabɛ mo Ejipti ne, ye á Tu Baŋa Wɛ wom laam ba o jwoŋi abam o yage. Mo kokuri a tage Wɛ ni dem konto a pa abam se á ta‑á tɔga.

19Abam ná wora á gwei á wodiiru tem ye á ná pɛ á daare men-pwoa yadwonna á yage kara ne, daa yé jwoori-na á vo á pɛ-ya. Yage-na-ya á pa veira, de botara, de kadeina se á Tu Baŋa Wɛ zaane taa wo á baŋa ne de kolo maama á na lage á toŋe to.#Chullu 19:9-10 20Á ná sugi á Olivi teeni dem se de tio-bia bam to ye á pɛ-ba, su-na bedwe yerane. Balo laam na daare to wó taa ye veira, de botara, de kadeina nyem mo se ba vo ba lare.

21Á ná gwori á Vini tio-bia bam, se á ta vo á gwori-ba bedwe yerane. Balo na daare to ye veira, de botara, de kadeina nyem mo se ba laam vo ba lare. 22Yé fɔge á swei we abam de déem ye kabɛ mo Ejipti ne. Mo kokuri a tage Wɛ ni dem konto a pa abam se á ta‑á tɔga.”

Currently Selected:

Nia Gulim 24: KBG

Highlight

Copy

Compare