Nia Gulim 23

Baŋa Wɛ kɔgɔ kom chullu

1“Nɔɔno wolo ba na lwe to de wolo ba na gwoni o peini ba yage to ba jege chwoŋa se o tɔge o taa wo Baŋa Wɛ nɔn-kɔgɔ kom wone.

2Bia balo de ba na wo loge kadiri wone to de ba naaro se ko taa vei kuni fuga laŋa ne to de bá tɔge ba taa wo Baŋa Wɛ nɔn-kɔgɔ kom wone.

3Ko ta ná ye Amon de Moaba tiina bam, banto de ba jege chwoŋa se ba tɔge ba taa wo Baŋa Wɛ nɔn-kɔgɔ kom wone, ko woli de ba naaro se ko taa vei kuni fuga laŋa ne. 4Kokuri á déem na nwoŋi Ejipti ne á maa kɛa to, ba ve se ba woli abam de na de wodiu, ye ba kwori ba yeigi Beora bu Balaam de sabu se o sɔɔle lwarem o yage á baŋa ne. Beora déem zoore Mesopotamia teo Petora ne mo. 5Abam Tu Baŋa Wɛ wom déem maa wo sɛ Balaam sɔɔlem dem, o na tiini o swoi abam to ŋwaane. O ma pipiri sɔɔlem dem o pa de ji swolim de pa abam.#Jeelim 24:10 6Maŋa kalo maama abam dwi dem na wó taa wora to, se á yé zaŋe á toŋe totoŋa á ma‑á zeini Amon de Moaba tiina bam se á pa ba taa zoore de yazura.

7Nam yé gwooni-na Edom tiina, se ba ye á chorro mo. Á ta yé gwooni Ejipti tiina bam, se á déem ye veira mo ba teo kom ne. 8Banto naaro tem ko zege dwi kuni betɔ laŋa ne se ko taa tua jege chwoŋa se ba tɔge ba taa wo Baŋa Wɛ nɔn-kɔgɔ kom wone.

Jar-keira bam tigisim jeiga kwɛɛm

9Á ná tigisi daane se á kwaare jara de á dona, se á ta‑á cho-na á tete de kolo maama na jege digiru Wɛ chullu tem seeni to.

10Nɔɔno wolo nywanno tem ná lwogi tete ne, kotu jege se o nwoŋi dáa mo se o daa yé jwoori nɔn-kɔgɔ kom wone dɛ dem konto ne, o na chɔge o tete de Wɛ chullu tem to ŋwaane. 11Dedaan-ni ne mo o wó swɛ o yera, ye wɛ ná zoa, o laam jege chwoŋa se o jwoori o peini jar-keira bam tigisim jeiga kam ne.

12Lage-na jei na ye dáa dáa de á tigisim jeiga kam to se á ta‑á vei á zege nɛ da. 13Á ná lage á vo á zege nɛ sem, le-na vɔrɔ á zela yam ne á ja vo se á ko gwoŋo. Á ná zege á ti, se á daare á suli beinnu tem. 14Pa-na se á tigisim jeiga kam taa ye wose, á Tu Baŋa Wɛ wom na kare o choa abam se o pa á wane á dona á di to ŋwaane. Ko dae se o na wo-zɔɔne á tetare ne se o viiri o daare abam.

Wɛ nia dwi dwi

15Dwi-gɛ tu kabaa ná duri ka yi á teo kom se ka dale á tei ne, yé zeili‑o á pa o jwoori o tu tei. 16Pa‑o chwoŋa se o kuri á teene dem wone mɛ o na wó taa zoore to. Á ba jege se á bɛɛse‑o.

17Isarele tu, baaro naa kaane, ba jege se o bwoori jwona zulim ŋwaane. 18Á nam ba jege se á kwei kabworim kikia sabu á ja á vo Baŋa Wɛ wara-jei sem se á ŋwe kampwola jene. Abam Tu Baŋa Wɛ wom chuli kabworim dwi maama.

19N ná mɛ wodiu mo naa sabu naa woŋo kolo maama mo n jene n pa n dwoŋi Isarele tu, yé ta‑n lage nyɔɔre ko baŋa ne. 20Ko nam ná ye veira, n jege chwoŋa se n na nyɔɔre ba jena baŋa ne, se n yé ta‑n lage nyɔɔre n dwoŋi Isarele tu tei ne. Á ná tu á zo tega kam á tei, tɔge-na ni dem konto se á Tu Baŋa Wɛ wom wó swɛ abam swolim se kolo maama á na jege á toŋe to ke lanyerane ko pa abam.

21N ná gwoni ni n pa Baŋa Wɛ, yé dáane se n kwei n ni dem.#Matiyu 5:33 Á Tu Baŋa Wɛ wom wó bwei‑m n wɛleere dem konto ŋwaane. 22N nam ná wo gwoni ni n pa Wɛ, wɛleere de bá taa wora. 23N ná gwoni ni, ko ye n tete boboŋa ŋwaane mo pɛ se n pwooli. Konto to, nii ko baŋa ne se n kwei n ni dem lela.

24N ná tɔge n dwoŋi gaare o na dugi Vini teeni de wone to n via, n jege chwoŋa se n di de tio-bia bam ne n na wae tei to. Za n yé gwori n ke n tampɔgɔ ne n ja n viiri. 25Ko ta ná ye n dwoŋi kara mo n tɔge da n via, n jege chwoŋa se n bwori mena n yu n done. Za n yé ma sekwara n ma‑n gaane-ya.”

Currently Selected:

Nia Gulim 23: KBG

Highlight

Copy

Compare