Nia Gulim 22

Chullu tedwonna

1“N ná nɛ n dwoŋi naao naa o pia na maa jia, yé pu n yia n yage se varem wom jei. Nam ja-ko n jwoori n vo n pa kotu. 2Kotu nam ná wo yiga yiga naa n ná yeiri wolo na tei varem wom, ja-ko n vo n sɔŋɔ se n ta‑n nii-ko. Kotu laam ná tu o beeri o varem wom, se n kwei n pa‑o. 3Ko ta ná ye n dwoŋi bonaga, naa o gɔrɔ, naa o woŋo kolo maama mo ná jei, se n ke konto dwoŋi. Yé pu n yia n yage se ko jei. 4N ná wo chwoŋa ne, ye n ná nɛ n dwoŋi bonaga naa o naao ná toa, yé gaale n kɛ. Woli‑o se o ja-ko o zege.

5Kaana dae se ba zo baara gwaaro. Baara de nam ba jege se ba zo kaana gwaaro. Abam Tu Baŋa Wɛ wom chuli balo na toŋe yanto totoŋa to.

6N ná nɛ zuŋa na jei ka pwogo ne tio yuu ne naa tega ne, ye ka ná vɔge chechara baŋa ne mo naa ka wora de ka bia mo, ko dae se n kwei zuŋ-nu wom. 7N jege chwoŋa se n ja ka bia bam, naa chechara yam n viiri se n daare nu wom se o kɛ. Ke konto se n ŋwea ke lanyerane ye n wane n dáane tega kam baŋa ne.

8Abam wolo ná lage o lɔ diga, kotu jege se o lɔ naware mo o kaare ka nayuu kom o che. N ná ke konto, ye nɔɔno ná zege ko yuu ne o to tega ne, kotu jana bá taa wo n yuu ne.

9Abam wolo ná dugi Vini teeni o gaare ne, kotu yé du wo-gaa o woli o gaare dem konto ne. N ná ke konto, wodiiru dwi dwi dem konto bá taa ye nmo nyem. N jege se n pɔɔre-te mo n pa Wɛ.

10Yé pa se nabea de bonaga sale daane se vaŋe vɔrɔ.

11Nam yé zo gɔrɔ kolo ba na mɛ gare-ŋone yera yera ba ma sɔ-ko to, ne ko ná ye lɔŋɔ dedaane pei koro gare-ŋone.

12Ko ná ye gare-daŋɔ kolo n na wó zo to, se n seere-ko se kuna taa wo ko nia yana yam ne.

Baro de o kaane taane

13Nɔɔno ná swo kaane o peini ded‑o ye ko kwaga ne o daa ba lage‑o, 14o wó wane o fɔ vwa o daŋe o baŋa ne we, o na tu o peini de kaane wom to, o lɔre we o maŋe o lɔre baara ye o laam swoi‑o. O ná pɛ se kaane wom tiini o na chaveera konto dwoŋi, 15bukɔ wom kwo de o nu mo jege se ba kwei gɔrɔ kolo na bere we bukɔ wom lɔre baara o baro wom tei ne to mo ba ja vo teo kom manchwo-peena yam ni ba bere teo kom nakwa. 16Bukɔ wom kwo wó ta we, ‘A kwei a bukɔ a pa nɔɔno wonto se o di o ma ke o kaane, ye leile o daa ba lage‑o. 17O nam fɔge vwa o pa‑o we, o lɔre baara ye o laam zo‑o. Nii-na ba boboa sare-peiga gɔrɔ na taŋe de jana to mo tento. Konto nam bere we a bukɔ wom lɔre baara wonto tei ne mo.’

18Teo kom nakwa bam laam wó ja nɔɔno wom mo ba waare‑o lanyerane. 19Ba ta jege se ba jwoŋi lu-nyenno sabu-dala bi mo baaro wom tei ne se ba kwei ba pa bukɔ wom kwo, baaro wom na chɔge Isarele tiina bukɔ to ŋwaane. Bukɔ wom daa ta wó taa ye o kaane se ko taa nii o toone mo. O ba jege chwoŋa se o yage‑o.

20Baaro wom nam na tage tei to ná ye chega mo ye kolokolo tera se ko bere we bukɔ wom maŋe o wo lɔre baara, 21ba jege se ba ja bukɔ wom mo ba nwoŋi o kwo sɔŋɔ ne, ye ba zege‑o pwooni yiga ne se teo kom baara bam dole‑o de kandwa ba go. O ta na zoore o kwo sɔŋɔ ne to o ke ka-bworo totoŋ-zɔɔna pa se chaveera di Isarele tiina bam. Konto ŋwaane, á jege se á saare lwarem dem konto mo á tetare ne.

22Baaro ná peini de nɔɔno wodwoŋi kaane ye á peere-ba, á jege se á go ba maama balei mo, se á wane á saare lwarem dem konto Isarele laŋa kam ne.

23Ba ná kwei bukɔ ba pa se o zo baro ye kotu ta wo peini ded‑o, nɔɔno wodwoŋi ná nɛ‑o teo wone o ja o peini, 24á wó ja-ba á nwoŋi teo kom dáa mo á dole de kandwa á go. Bukɔ wom jege se o te, o na wo teo wone ye o wo kaase se ba jwoŋi‑o ba yage to ŋwaane. Ko daare baaro wom jege se o te de o na chɔge bukɔ wolo na ye nɔɔno wodwoŋi kaane to mo. Konto ŋwaane, á jege se á saare lwarem dem konto mo á tetare ne.

25Nɔɔno nam ná wo pwola ne mo ye o zi bukɔ wolo na lage o zo baro to, baaro wom yerane mo jege se o te. 26Á ba jege se á ke busankana kam kolokolo. O wo ke o tusi se ko maŋe de o toone. Keim konto dwoŋi nye de nɔɔno na li o dwoŋi o go to mo, 27se baaro wom zi bukɔ wom pwola ne mo ywoo. Nɔɔn-nɔɔno tera se o jwoŋi bukɔ wom o yage, de o na maŋe o kaase tei to de.

28Nɔɔno ná jeeri bukɔ wolo ta na yeiri baara to o zi‑o, ye ba ná peere-ba, 29o wó ŋwe bukɔ wom kwaga kwora mo o pa bukɔ wom kwo se ko maŋe de lu-nyenno sabu-dala finnu. O ta jege se o di‑o o ma ke o kaane mo, o na zi‑o o peini ded‑o to ŋwaane. O ŋwea maama wone pwola tera se o yage‑o maŋa de maŋa.#Nwoŋim 22:16

30Nɔɔn-nɔɔno yé fɔge o ke o kwo chaveera se o peini de o kwo kaane wodwoŋi.”

Currently Selected:

Nia Gulim 22: KBG

Highlight

Copy

Compare