Nia Gulim 21

Nɔn-gora taane

1“Abam ná tu á zoore tega kalo wone á Tu Baŋa Wɛ wom na lage o pa abam se á ta‑á tei to, á ná nɛ ba na go nɔɔno pwola ne ye á yeiri wolo na go‑o to, 2á nakwa de balo na nii taana baŋa ne to mo wo nwoŋi ba vo ba maŋe too wom na tigi mɛ to se ko vo yi teene delo na bwola de ka jeiga kam to. 3Teo kolo na ye bwola bwola de jeiga kam to nakwa bam laam maa wó lage na-chwɛ delo ba ta na wo mɛ ba toŋe to. 4Ba jege se ba ja naao kom ba vo bwolo kolo nɔɔna ta na wo vage naa ba du wodiiru da ye nabara kalo na na buri to wora. Dáane mo ba wó jujugi ko ba ba bwori. 5Levi dwi kaanem tiina de jege se ba taa wora mo se ba nii totoŋe dem. Kokuri to á Tu Baŋa Wɛ wom kuri banto mo se ba taa toŋe ba pa‑o ba daare ba taa sɔɔle Wɛ swolim ba ke o nɔɔna yuu ne. Baŋa Wɛ pɛ-ba dam se ba kwɛ taane delo maama na jege ni-kantɔgɔ naa zonne keim to. 6Teo kolo na bwola de jeiga kam to nakwa bam laam maa wó sane ba je na-teko kom baŋa ne, 7ye ba ta jaja ba we, ‘Ko dae debam mo go nɔɔno wom. Dé yia nam wo nɛ wolo na toŋe dento totoŋe dem to. 8Baŋa Wɛ, dé lwoori‑m se n yage Isarele tiina tusim n ma‑n chɛ-ba, se dé ye nmo nɔɔna mo nmo na vere n yage to. Nɔɔno wonto na wo ke kolokolo ye ba go‑o to, yé pa se ko taa wo debam yuu ne.’ Ba ná tage konto, Baŋa Wɛ wó yage keim-balɔrɔ kom o ma chɛ abam. 9Á ná tɔge ni delo Baŋa Wɛ na pɛ abam to, á wó saare lwarem dem á tetare ne, ye o toone dem bá taa wo á yuu ne.

Kaana balo ba na vere jara baŋa ne to taane

10Abam ná kwaare jara de á dona ye á Tu Baŋa Wɛ wom kwei-ba o ke á jeŋa ne pa se á wane-ba ye á ja ba badwonna á ja viiri, 11abam wolo ná nɛ kaane na lamma ba wone ye n lage se n di n ma‑n ke kaane, 12n jege chwoŋa se n ja kotu n vo sɔŋɔ. O laam wó cheeri o yuu, ye o daare o dɔɔre o ja-fwa. 13O jege se o lɔɔre gwaaro telo o ya na zo o tete teo ne to ye o leiri o zo tedwonna. O maa wó maŋe nmo sɔŋɔ ne chana dedoa o keeri o kwo de o nu. Chana dedoa kam kwaga ne n laam jege chwoŋa se n peini ded‑o, n na pɛ se o ji n kaane to ŋwaane.

14Ko ná wora ko wora ye n daa‑n ba lage‑o, se n yage‑o se o viiri zɛɛra. O jege chwoŋa se o vo mɛ o na lage to. N na fe‑o pa se o peini dede‑m to ŋwaane, n bá‑n wane n yeigi‑o n jwoŋi sabu naa n bɛɛse‑o ne n kabaa tei.

Bu-kwea taane

15Nɔɔno wolo ná jege kaana balei pa se ba maama lo bakeiri ba pa‑o, ye bu-kwea kam ná maŋe o dae o ka-swono kom bu, 16o na wó pɔɔre o jejegero tem o pa o bia bam tei to, o ba jege chwoŋa se o kwei-te o woli o ka-swono kom bu wom de pɛɛre delo na ye bu-kwea kam nyem to. 17O nam jege se o zege wolo na ye o bu-kwea kam chekke to kwaga ne, ye o pa‑o o jejegero tem maama wone popɔra kuni belei, ne ko na maŋe se bu-kwea jwoŋi tei to, ko ná maŋe ko dae o ka-swono kom bu de.

Zwabani-nyem taane

18Nɔɔno wolo ná jege bu na ye yi-dɛɛre de zwabani-nyem ye o ba sɛ o kwo de o nu, ne ba na maŋe ba waare‑o tei maama de, 19o tiina bam jege se ba ja‑o mo ba vo o teo kom manchwo-peena yam ni ne ba jeeri teo kom nakwa bam se ba di o taane. 20Ba wó ta de nakwa bam ba we, ‘Dé bu ye yi-dɛɛre de zwabani-nyem mo. O yeini o ba sɛ debam ni taane. O ta kwori o ye nɔn-kwolo de sa-nyɔro.’ 21Teo kom baara bam maama laam jege se ba la mo ba dole‑o de kandwa ba go. Á ná ke konto, á wó saare lwarem dem á tetare ne. Isarele tiina bam maama ná nigi kolo na ke to, foone wó ja-ba.

Chullu tedwonna

22Nɔɔno ná ke keim-lɔŋɔ kolo na maŋe de toone to, ye ba ná go‑o ba daare ba lei o yera daa baŋa ne, 23ko dae se á pa se too wom taa page daa kam baŋa ne se tega ba ka poore. Á jege se á ke too wom dɛ dem konto ne mo. Wolo ba ná leigi daa yuu ne ba go, Wɛ sɔɔlem mo wo kotu yuu ne.#Galatia 3:13 Á nam jege se á suli‑o mo tega ne se ko yé chɔge tega kalo á Tu Baŋa Wɛ wom na lage o pa abam se á ta‑á tei to.”

Currently Selected:

Nia Gulim 21: KBG

Highlight

Copy

Compare