Nia Gulim 20

Tigura seeni taane

1“Á ná nwoŋi se á kwaare jara de á dona, ye á ná nɛ we ba jar-keira, de ba torokooro, de ba sisein-nɔɔna daga te dwoi abam, yé kɔre-na foone. Á Tu Baŋa Wɛ wom na vere abam Ejipti tiina jeŋa ne to wó taa wo á tei ne. 2Á ná nwoŋi se á ke jara yam, Wɛ kaanem tu mo wó nwoŋi o zege á yiga ne o ta de jar-keira bam o we:

3‘Cheigi-na, Isarele tiina bam, á zem na lage á kwaare jara de á dona to, yé kɔre-na foone. Nam yé pa-na se á yera ta sae, naa se á vɔna pare. 4Abam Tu Baŋa Wɛ wom mo lage o da á yiga o ja jara yam o pa abam, se á wane á dona á di.’#2 Tigisim 20:15-17

5Ko kwaga ne jar-keira dedɛɛra bam wó zaŋe ba ta de nɔɔna bam maama ba we:

‘Abam wolo maama ná lɔge diga ye o ta wo lwoori Wɛ swolim o yage ka baŋa ne, se kotu jwoori sɔŋɔ! Kotu ná zo jara wone ye o te, nɔn-gaa mo wó jwoŋi-ka o taa tei.

6Abam wolo nam ná puli o Vini teeni gaare ye o ta wo nɛ chwoŋa se o di tio-bia bam ywoni, se kotu de jwoori sɔŋɔ! Kotu ná zo jara wone ye o te, nɔn-gaa mo wó vo o di tio-bia bam.

7Abam wolo de ná jei se o wuli kaane leile ye o ta wo di‑o, se kotu jwoori sɔŋɔ! Kotu de ná zo jara wone ye o te, nɔn-gaa mo wó di kaane wom.’

Dedɛɛra bam ta wó ta ba woli da ba we:

8‘Abam wolo baare ná jei ye foone jege‑o, kotu jwoori sɔŋɔ, se o yé pa se nɔɔna badwonna bam wo leere.’ 9Dedɛɛra bam ná ŋɔɔne tento ba ti, ba laam wó kuri yiga tiina se ba taa nii jar-keira bam popɔra maama baŋa ne.

10Abam ná yeini á lage á kwaare jara de teo kolo, pa-na ko nɔn-bia bam pwola se ba lwoori yibwona abam tei ne. 11Ba ná sɛ ba pa abam ye ba pore ba teo kom ni se á wane á zo, á wó fe teo kom nɔɔna bam maama se ba taa toŋe totoŋ-chɛɛra ba pa abam. 12Ko daare teo kom nɔɔna ná ve, ye ba daare ba kwaare jara de abam, ko jege se á kaare-ko mo á pu. 13Á Tu Baŋa Wɛ wom ná ke teo kom konto á jeŋa ne se á wane-ko, se á go baaro wolo maama na wo ko wone to. 14Ko nam ná ye kaana bam, de bia bam, de vara bam, á wae á kuri ba wone se á kwei á pa á tete, ko woli de jejegero telo maama na wo teo kom ne to. Á jege chwoŋa se á kwei kolo maama na ye á dona nyem to á ta‑á jega. Ko ye Baŋa Wɛ mo kwei-te o pa abam. 15Mo abam na wó toŋe tei de teene delo na ye yiga yiga, ye de dae tega kanto teene mɛ ne abam na wó zo to.

16Ko daare ko ná ye teene delo á Tu Baŋa Wɛ wom na lage o pa abam se á ta‑á tei to, á jege se á go nɔɔna balo maama de vara balo maama na wo de wone to mo. 17Yɔɔre á chɔge ba maama fase Wɛ ŋwaane. Ko ná ye Hiti tiina, de Amori tiina, de Kanaan tiina, de Pɛrizi tiina, de Hivi tiina, de Jebusi tiina bam maama, se á chɔge-ba ne Baŋa Wɛ na pɛ abam ni se á ke tei to. 18Ko ná dae konto, ba wó pa se á ke wɛleere á chɔge á Tu Baŋa Wɛ yiga ye á lwoni totoŋ-zɔɔna yalo ba na toŋe ba ma zuli ba jwona yam to mo.

19Abam ná vei á kwaare jara de teo kodwoŋi, ye á ná kaare-ko á pu á dáane, yé zage-na teeni delo na wo teo kom ni ne to á de tega ne. Á jege chwoŋa se á di de tio-bia bam, se á yé chɔge teeni dem. Teeni dem dae á dona se á kwaare jara de dento. 20Ko nam ná ye teeni delo á na yei we de ba leiri bia to, á jege chwoŋa se á zage-de ye á daare á kwei dɛ sem á ma‑á ke jara zela yalo na wó woli abam se á kaare teo kom á pu se á laam wane ko nɔn-bia bam to.”

Currently Selected:

Nia Gulim 20: KBG

Highlight

Copy

Compare