Nia Gulim 19

Ka-duri-ka-zo-ka-seigi teene

Jeelim 35:9-34; Josua 20:1-9

1“Abam Tu Baŋa Wɛ wom laam wó chɔge dwia yalo á na lage á kwei ya tega á ta‑á tei to. Á wó vo á zeili-ba ye á daare á ta‑á zoore ba teene de ba sam wone. 2Á ná tu á zoore tega kam ne, se á kuri teene detɔ se nɔɔno maama wane o ke lela o duri o vo o yi de dedoa wone. 3Pɔɔre-na tega kam laŋa kam kuni betɔ se á daare á fɔge chwei se nɔɔno ná go o dwoŋi, se o wane o duri o lu o zo teene dem konto dedoa wone o seigi da.

4Mo ko na wó ke tei ko pa nɔɔno wolo na go o dwoŋi ye o wo paale o ke to. Ko ná dae we ba ya maŋe ba done daane, nɔɔno wom konto wó wane o duri o zo teo kom o jwoŋi o tete o yage. 5Ko maŋe de nɔɔna balei ná dɛ daane ba zo kagoa se ba gwoni dɛ. Ba dedoa ná wora o zage tio pa se o dwooru yuu le ko mage wodwoŋi wom ko go, o wó wane o duri o vo o zo teene dem konto dedoa o seigi se o jwoŋi o tete. 6Ko ná dae konto, ye chwoŋa kam ná tiini ka dɔra, wolo na tege to yera nɔɔno wó wane o pare nɔn-goro wom o yi ye o tɔge o ban-zɔŋɔ kom baŋa o ja‑o o go. Kotu nam wo maŋe se o te, o na wo paale o go o dwoŋi wom to ŋwaane. 7Mo kokuri a pɛ abam ni we á kuri teene detɔ ka-duri-ka-zo-ka-seigi ŋwaane.

8Abam Tu Baŋa Wɛ wom ná pɛ se á laŋa kam tiini ka yale, ne o na pwooli de á nabaara bam se o ke tei to, ye á ba á tei tega kam maama, 9ko jege se á ta kuri teene detɔ mo á woli da. Á nam wó ta‑á tɔge Wɛ nia yalo maama amo na pɛ abam zem tento to, se á ta‑á swoi á Tu Baŋa Wɛ wom ye á tɔge o chwei sem, se o laam woli tega kam maama o pa abam se á ta‑á tei. 10Á jege se á kuri teene detɔ á woli da, se nɔɔna balo na wo maŋe se ba te to yé te. Abam ná wo ke konto, ye nɔɔno ná tega konto dwoŋi tega kalo Baŋa Wɛ na lage o pa abam to wone, o jana wó ta wo á yuu ne.

11Nɔɔno nam ná maŋe o chuli o dwoŋi ye o beeri pwola se o go‑o, ko ye o paale mo. Konto tu laam ná duri o vo o zo teene dento dedoa wone se o seigi, 12o tete teo kom nakwa mo jege se ba toŋe ba ja‑o ba jwoori ba teo kom, se ba daare ba ke‑o wolo o na go to yera nɔɔno jeŋa ne. O jege se o te mo. 13Yé duri-na nɔn-goro ŋwaŋa. Saare-na keim-lɔŋɔ konto dwoŋi Isarele laŋa kam ne se á ŋwea wane ka ke lanyerane ka pa abam.

Faŋa faŋa siseina yam

14Abam ná tu á zo tega kalo á Tu Baŋa Wɛ wom na lage o pa abam se á ta‑á tei to wone, nɔɔn-nɔɔno yé zaŋe o di o zo o dwoŋi siseini delo na maŋe de lɔ de tiga faŋa faŋa to.

Maana para taane

15Taane ná wora ye nɔɔno dedoa yerane mo ná pɛ maana keim-lɔŋɔ ŋwaane, ko bá wane ko pa se nɔɔno to de o bora. Ko jege se maana-para taa ye balei naa batɔ mo se ba bere we kotu gɛ bora.#Matiyu 18:16 16Nɔɔno ná kwaane se o pa ko zo o dwoŋi yera ye o bwɛ‑o Wɛ nia chɔgem baŋa ne, 17ba maama balei mo jege se ba vo ba zege Baŋa Wɛ yiga ne ba tole taane dem ba bere Wɛ kaanem tiina bam de balo na nii taana yam baŋa ne da yam konto ne to. 18Banto mo wó nii ba taane dem wone zii ba kwaane ba lɔre ko ye chega naa vwa. Ba ná nɛ we nɔɔno wom bwɛ o dwoŋi Isarele tu vwa wone, 19ba jege se ba waare kotu de waarem delo o ya na boŋe se o pa o dwoŋi na to mo. Kanto chwoŋa kam mo á wó tɔge á ma‑á saare lwarem dem konto abam tetare ne. 20Ko kwaga ne Isarele tiina bam maama ná nigi kolo na ke to, foone wó ja-ba, pa se nɔɔn-nɔɔno daa bá ke keim-lɔŋɔ konto dwoŋi. 21Yé duri-na vwa-nyem ŋwaŋa. Ŋwea mo ba wó chɔge ba ma ba leiri ŋwea, yi mo ba wó le ba ma leiri yi, yeili mo ba wó guri ba ma leiri yeili, jeŋa mo ba wó le ba ma leiri jeŋa, naa naga mo ba wó ma leiri naga.”

Currently Selected:

Nia Gulim 19: KBG

Highlight

Copy

Compare